Tagata Sailiili e Toulu mai i Laau

Yamila Caminos

Buenos Aires, Atenitina

I faifeautalai talavou o loo tala’i tu’itu’i i magaala o Buenos Aires, Atenitina, i le 1955, o le folafolaga na laua mauaina mai se sui o le Au Peresitene o le Eria sa foliga na ese lava: “Afai tou te galulue malosi ma usiusitai atoatoa lelei, o le a toulu mai tagata sailiili mai i laau ina ia papatisoina.” Sa matou iloa e uiga i lena folafolaga i se taimi sa le’i mamao mulimuli ane.

Sa faagata e lo’u tama se tasi o laau sa i le auala savali i luma o le matou fale. A o i luga o ia i le laau e faagata, sa ia matauina ni alii talavou se toalua o savavali agai atu ia te ia i luga o le auala. A o la pasia lalo o le laau, sa ia valaau ifo ia i laua i le faaPeretania.

Sa le’i iloa lelei e lo’u tama tautala i le Igilisi, ae sa ia iloaina ni nai upu, ma sa ia fiailoa foi. O ai nei alii talavou, ae o le a foi le la mea o loo fai i le matou pitonuu?

Sa tutu faifeautalai, sa taumafaufau po o fea sa sau ai le leo. Ona pe’a mai lea i lalo o lo’u tama mai le laau e talanoa ia i laua. O le faagaeetia ai i le la savali ma amioga, sa ia valaaulia ai i laua i totonu o lona fale.

O le aafiaga sa i ai muamua o lo’u tama i mea taulotu sa faaletonu ai o ia, ae o le savali o le talalelei toefuataiina sa talanoa atu i lona loto. Sa ola o ia i ni taimi faigata, ma sa ia iloaina sa tatau ona sui o ia. Sa faalogologo ma le toto’a ao aoao e faifeautalai o ia, lo’u tina ma lo’u tinamatua ma a’u.

Sa na’o le 11 tausaga o lo’u matua, ae o upumoni sa laua aoaoina mai sa faapena foi ona tagitagi ia te a’u—ma i lo’u tina ma tinamatua. O se taunuuga, sa papatisoina uma i matou i ni nai masina mulimuli ane, ia Setema 1995.

O fatu o le faatuatua sa totoina e faifeautalai i totonu o o matou loto sa le’i umi ae fuga mai e ala i faaaumeaga mai uo i le lotu, aoaoga faaopoopo o le talalelei, ma aafiaga lelei ma taitai malolosi o le Ekalesia. Ona o le faafeiloaiga matagofie sa matou mauaina, o fatu o o matou faatuatua ua “pau i le eleele lelei, ua tupu, ua fua mai taiselau i fua” (Luka 8:8).

O fua o o matou faatuatua ua matou olioli ai i le taimi nei—ua toeitiiti 25 tausaga mulimuli ane—ua aofia ai se tautinoga mautu i le talalelei toefuataiga a Iesu Keriso, o faamanuiaga o le malumalu, ma se olaga e faatumulia ma fiafia faatasi ma se augatupulaga fou o tagata o le aiga ua faatasi mo le faavavau atoa.

O le a matou faafetai pea lava pea mo faifeautalai faamaoni e toalua o e na tofotofoina se folafolaga musuia.