O Le Faamoemoega O Le A Suia Ai A Tatou Auaunaga

E iu ina tele faamoemoega o le auaunaga, ae o a tatou taumafaiga e tatau ona taialaina e se manao e fesoasoani i isi ia ausia se liliuga loloto patino ma avea atili ai e pei o le Faaola.

A tatou alolofa atu i isi e pei ona faia e le Faaola, tatou te mananao e fesoasoani atu ia i latou e pei ona sa Ia faia. I le avea ai ma Leoleo Mamoe Lelei, o Ia o le faataitaiga sili o auaunaga anoa.

O le mamanuina ai o a tatou auaunaga ia te Ia, e taua ona manatu o Ana taumafaiga ia alofa, siia’e, auauna atu, ma faamanuia sa i ai se sini maualuga atu nai lo o le taulimaina o le manaoga o lena taimi. E mautinoa lava ua Ia silafia o latou manaoga i lea aso ma lea aso ma sa i ai le agaalofa i o latou mafatiaga i lea taimi. O lea sa Ia faamaloloina, fafagaina, faamagaloina, ma aoaoina [i latou]. Ae sa finagalo o Ia e faia ni mea e tele atu nai lo o le taulimaina o le matelaina o le aso (tagai Ioane 4:13–14). Sa finagalo o Ia ia i latou sa siomia o Ia ia mulimuli ia te Ia (tagai Luka 18:22; Ioane 21:22), iloa o Ia (tagai Ioane 10:14; Mataupu Faavae ma Feagaiga 132:22–24), ma ausia o latou gafatia paia (tagai Mataio 5:48). Ua tutusa lea ma aso nei (tagai Mataupu Faavae ma Feagaiga 67:13).

E le mafaitaulia auala e mafai ona tatou fesoasoani ai e faamanuia isi, ae afai o le sini taualuga o la tatou auaunaga o le fesoasoani i isi ia iloa le Faaola ma avea atili e pei o Ia, o le a tatou galulue agai atu i le taimi o le a tatou le toe aoaoina ai o tatou tuaoi ia iloa le Alii aua o le a tatou iloaina uma lava o Ia (tagai Ieremia 31:34).

O Le Taulaiga a le Faaola Sa Oo i tua atu o Manaoga o le Taimi Lava Lea

E i ai ni nai tagata sa faia ni taumafaiga tetele e aumai ai a latou uo ia Iesu ina ia faamaloloina i le ma’i supa. I le faaiuga sa faamaloloina e le Faaola le alii, ae sa sili atu ona naunau o Ia i le faamagaloina o le [alii] i ana agasala (tagai Luka 5:18–26).
Ina ua aumai e tagata i le Faaola le fafine na molia i le mulilua, o Lona taofia o le tausalaina sa faasaoina ai lona ola faaletino. Ae sa finagalo o Ia e faasaoina foi o ia faaleagaga, sa fetalai atu ia te ia, “alu ia oe, aua e te toe agasala” (tagai Ioane 8:2–11).
Sa auina atu e Maria ma Mareta se feau ia Iesu e talosagaina ai o Ia e maliu mai e faamalolo Lana uo o Lasalo. O Iesu, o le sa faamaloloina isi i taimi e le mafaitaulia, sa faatuai Lona taunuu atu seia oo ai lava ina maliu Lasalo. Sa silafia e Iesu le mea sa mananao ai le aiga, ae o le faatuina o Lasalo mai le oti, sa Ia faamalolosia ai a latou molimau i Lona paia (tagai Ioane 11:21–27).

O a nisi faataitaiga e mafai ona e faaopoopoina i le lisi lenei?

O Le A Se Mea e Mafai Ona Tatou Faia?

Afai o le tatou faamoemoega ia fesoasoani i isi ia avea atili e pei o le Faaola, o le a faapea ona suia ai le ala tatou te auauna atu ai. O nisi nei o auala e mafai ai e lenei malamalamaaga ona taiala a tatou taumafaiga e auauna atu.

Manatu 1: Faafesootai Auaunaga i le Faaola

O a tatou taumafaiga uma lava e faia mea lelei e tauaogaina, ae e mafai ona tatou vaavaai mo avanoa e faaleleia ai la tatou auaunaga e ala i le faafesootaia i le Faaola. Mo se faataitaiga, afai o mama’i le aiga e te auauna atu i ai, atonu o le a fesoasoani se meatausami, ae o lou faaalia faatauvaa o le alofa e mafai ona faateleina e ala i lau molimau e uiga i le alofa o le Faaola mo i latou. O lau fesoasoani i galuega i le fanua o le a talisapaiaina, ae atonu e mafai ona atili anoa i le ofoina atu o se faamanuiaga faaleperisitua.

Ua aoao mai Elder Neil L. Anderson o le Korama a Aposetolo e Toasefululua: “O se tagata e i ai se loto lelei e mafai ona fesoasoani i se tasi e fai se pa’u [ua pa], ave se soa e potu faatasi i le fomai, fai se taumafaga o le aoauli ma se tasi o faanoanoa, pe ‘ata’ata ma fai atu talofa e faafiafia ai se aso.

“Ae o se soo o le poloaiga muamua o le a faaopoopo lava e pei ona masani ai i nei faatinoga taua o le auaunaga.”¹

Manatu 2: Taulai atu i le Ala o le Feagaiga

I le saunoa atu ai i le au paia mo le taimi muamua i le avea ai ma Peresitene o le Ekalesia, na saunoa ai Peresitene Russell M. Nelson, “Ia tumau i le ala o le feagaiga.” O le osia ma le tausia o feagaiga “o le a matala ai le faitotoa i faamanuiaga uma faaleagaga ma avanoa e maua.”²

I le avea ai ma Au Paia o Aso e Gata Ai, ua papatisoina i tatou, faamauina ma maua le meaalofa o le Agaga Paia. O alii agavaa o le ekalesia e maua le perisitua. Tatou te o atu i le malumalu mo o tatou faaeega paia ma ina ia faamauina faatasi o ni aiga e faavavau. O nei sauniga faaola ma o latou feagaiga e o mai faatasi ai, e taua lea mo i tatou ia avea ai e pei o Ia ina ia mafai ona tatou faatasi ma Ia.

E mafai ona i ai sa tatou matafaioi taua e fai i le fesoasoani atu i isi i le ala a o tatou fesoasoani ia i latou ia tausia a latou feagaiga ma saunia e osia feagaiga i le lumanai.³ E mafai faapefea ona e fesoasoani i tagata taitoatasi po o aiga e te auauna i ai ia maua le isi sauniga e sosoo ai latou te manaomia? O lenei mea e mafai ona faapea, e fesoasoani ia saunia se tama e papatiso lona afafine, faamalamalama atu i ai faamanuiaga o le isi feagaiga o le a osia, po o le faasoa atu i auala ia maua ai se aafiaga e sili atu ona anoa i le faafouina o a tatou feagaiga a o aai ma feinu i le faamanatuga.

Manatu 3: Valaaulia ma Faamalosiau

I le taimi e talafeagai ai, fefautuaai ma i latou e te alofa i ai e uiga i lo latou liliu mai ma taumafaiga ia avea atili ia faapei o Keriso. Ia faailoa atu ia i latou malosiaga e te vaaia ma faamemelo ai ia i latou. Sue po o fea le itu latou te manatu e mafai ona latou faaleleia atili ma talanoa i auala e mafai ona e fesoasoani ai. (Mo nisi faamatalaga atili e uiga i le fefautuaai faatasi ma i latou e te auauna i ai, tagai “Fefautuaai e uiga i o Latou Manaoga,” Liahona, Sete. 2018, 6–9.)

Aua le fefe e valaaulia i latou e mulimuli i le Faaola ma faataga o Ia e fesoasoani ia i latou ia ausia o latou gafatia faalelagi. O lenei valaaulia e mafai ona suia ai olaga, pe a i ai faatasi ma se faaalia o lou talitonu ia i latou ma lou faatuatua ia te Ia.

O Auala e Ono e Mafai ona Tatou Fesoasoani ai i Isi ia Alualu i Luma agai ia Keriso

O ni fautuaga nei mo le lagolagoina o isi i le faia o ni faaleleiga o le olaga ma agaigai atu ai i le ala o le feagaiga. (Tagai, Talai La’u Talalelei, mataupu 11, mo nisi metotia.)

Faasoa atu. Ia moni ma toa pe a faasoa atu i auala ua fesoasoani ai le Faaola ia te oe a o e taumafai e faalatalata atu ia te Ia e ala i le ola i mataupu faavae o le talalelei e ui lava ina i ai faafitauli.
Folafola i ai faamanuiaga. E manaomia e tagata se pogai e ala ai ona sui lea e sili atu ona malosi nai lo o pogai ia le sui ai. O le faamalamalamaina o faamanuiaga e faatatau i se faatinoga e mafai ona tuuina atu ai se faaosofiaga malosi (tagai Mataupu Faavae ma Feagaiga 130:20–21).
Valaaulia. O le ola i se mataupu faavae o le talalelei e aumaia ai se molimau e faapea ua moni (tagai Ioane 7:17) ma taitai atu ai i se liuaina loloto.⁴ E toetoe lava o fegalegaleaiga uma lava e mafai ona aofia ai se valaaulia faatauvaa e faia se mea o le a fesoasoani latou te agaigai ai i luma.
Fuafua faatasi. O a ni mea e manaomia ona tutupu mo i latou ia faamanuiaina ai i le tausiga o tautinoga ia sui? E mafai faapefea ona e fesoasoani? E i ai se faasologa o taimi e aafia ai?
Lagolago. Pe a aoga, atinae se upega o tagata lagolago o e e mafai ona fesoasoani i le tagata ia tumau le faaosofia ma le faamanuiaina. Tatou te manaomia uma lava se taitai aulape.
Tulitatao. Ia fefaasoaai e le aunoa i le alualu i luma. Ia tumau le taulai atu i le fuafuaga ae ia toefaaleleia pe a manaomia ai. Ia onosai, tinou, ma faamalosiau. O le liua e mafai ona alu ai le taimi.

Valaaulia e Faatino

Mafaufau i auala e mafai ai e au taumafaiga e auauna atu—tetele ma laiti—ona fesoasoani i isi ia faaloloto o latou liliuga ma avea atili ai e pei o le Faaola.

Faasoa Mai Ou Aafiaga

Auina mai ou aafiaga ia i matou a o e auauna atu i isi pe na e mauaina ni auaunaga. Alu i le liahona.lds.org ma kiliki le “Submit an Article po o Feedback.”