Autalavou Matutua
Aoao Au e Lele: Ausiaina o le Faalagolago o le Tagata ia te Ia Lava Faalelagona i le Ala a le Alii
E alala le tusitala i Kalefonia, ISA.
O Valerie Durrant e sau mai i Kalefonia, ISA, ma ua fa tausaga o faaipoipo i lana tane o Ryan. Na avea o ia ma se tina lata mai nei i se pepe tama. E fiafia o ia i le yoga, vali ata, faitautusi, ma savaliga sopo.
E manaomia ona tatou faalagolago i le Tama Faalelagi ma Iesu Keriso ma tuu atu a tatou lava taumafaiga a o tatou saili atu ia ola faalagolago le tagata ia te ia lava faalelagona.
Atatusi mai le Getty Images
Pe a tatou mafaufau i se manulele pepe o loo aoao e lele, e mafai ona tatou vaaifaalemafaufau i lana taumafaiga lotoa mulimuli” o le feleleai solo ma puna i fafo mai le faamoega, o le tatalaina o ona apaau, ma le lele faatusa’o i le lagi. Ae a o lei oo i lena faamanuiaina mulimuli, atonu sa tele ni toilalo sa iu ane ina le lele faatusa’o ai le manulele i le lagi, ae palasi i luga o le eleele.
E pei o se manulele o loo aoao e lele, o i tatou foi e mafai ona pauu faafia ma fia i lalo a o tatou aga atu na’o i tatou lava ia ausia le faalagolago o le tagata ia te ia lava faalelagona. Ae afai tatou te liliu atu i le Alii mo le fesoasoani ma tuu i ai le taumafaiga, e mafai ona tatou aoao ai i le ala e toe faamanuiaina ai pe afai e le ogatasi le olaga e pei ona fuafuaina ma ia faalagolago ia te Ia, ma pe a tele naua ia tofotofoga tatou te tauaveina na’o i tatou.
Aoao e Lele
Afai o le aoao e lele o se faagasologa tiga, aisea o le a tuua ai e se manulele le faamoega i le taimi muamua lava? Ona o lona tina. Mo le vaega muamua o olaga o ana pepe, o le a aumai sa’o ai lava e le manulele tina ia meaai ia i latou i le faamoega. Ae i le aluga o taimi, e amata ona ia tuua ia meaai i fafo o le faamoega ina ia felelei i fafo o lo latou nofoaga mafana ina ia maua le meaai.
O le faagasologa lava lea e tasi tatou te onosaia a o tatou aoao ia faalagolago le tagata ia te ia lava faalelagona—ae e le o faamoemoeina ia mafai ona tatou felelei atoatoa na’o tatou i le taimi lea.
E talitutusa ma le manulele tina e faatagaina ana pepe e pauu i fafo o le faamoega, e faataga foi i tatou e le Tama Faalelagi tatou te uia faafitauli ma aafiaga e mafai ona tiga, le fiafia ai, ma lotovaivai ai. O Lana fuafuaga o le faaolataga ua mamanuina e fesoasoani ia tatou avea faapei o Ia, o lea la, o luitau uma lava tatou te feagai e mafai ona avea o se avanoa e aoao ma tuputupu a’e ai. E pei o le manulele tina, e tuuina mai pea lava e le Tama Faalelagi ia i tatou le faamafanafanaga ma le taitaiga aua e na’o Lana fesoasoani lava e mafai ona tatou ausia ma faatumauina ai o tatou soifua maloloina faalelagona ma faalemafaufau.
Apataina o O Tatou Lava Apaau
E ui o le Tama Faalelagi o la tatou paaga, e le tatau ona tatou faamoemoe ia te Ia e faia mea uma mo i tatou. E finagalo o Ia ia faaaoga lo tatou faitalia ma punaoa ua Ia tuuina mai ia i tatou i le ala e tau atu i le ola faalagolago o le tagata ia te ia lava faalelagona.
Mo se faataitaiga, pe a tatou oo i le lototiga, ita, po o le maliu, e finagalo o Ia ia tatou soalaupule faatasi ma Ia, ae e le tatau ona tatou taofi ai iina—e tatau ona tatou faia le mea sili tatou te mafaia e galulue ai i uunaiga Na Te tuuina mai ia i tatou; ia tausi poloaiga; ia auai i le malumalu e saili ai le filemu, faamafanafanaga, ma tali; ina ia nofouta i fautuaga faaperofeta; ma ia faatuatuaina Lana fuafuaga mo i tatou.
Ua tuuina mai e le Tama Faalelagi ia i tatou le tele o meafaigaluega ia ausia ai le ola faalagolago o le tagata ia te ia lava faalelagona, ae afai ua tatou tuu atu i ai mea uma tatou te mafaia ae tatou paulia lava pe tauivi foi ma o tatou soifua maloloina faalemafaufau, atonu o le a manaomia ai ni punaoa faaopoopo. E mautinoa lava e i ai taimi e te ono manaomia ai ona liliu atu i se tagata atamai i le soifua maloloina faalemafaufau pe maua se fautuaga mai lou epikopo mo nisi taitaiga ina ia mafai ai ona agai i luma.
Ae ia manatua, afai tatou te tapa atu mo se fautuaga mai isi i taimi uma lava tatou te fetoai ai ma se faafatiatamai, atonu tatou te le maua ia avanoa taua e aoao ai ma tuputupu ae ai i tatou lava. Ma le isi, e tatau ona tatou tuu atu ia lava a tatou lava taumafaiga e agai ai i luma.
Mulimuli i le Mamanu a le Alii
I le Mataupu Faavae ma Feagaiga vaega e 9, na aoaiina ai Oliva Kaotui ona o le taumafai e faaliliu papatusi o le Tusi a Mamona e aunoa ma se “mafaufau i ai ae nao lou ole mai [i le Atua]” (fuaiupu e 7). Ona apoapoai ai lea o ia e “suesue i ai i [lona] mafaufau” maua lana ia lava faaiuga, ona “ole atu lea i le [Atua] pe ua sao lea” (fuaiupu e 8).
A tatou mulimuli i le mamanu lenei, e le o tuulafoaia i tatou e le Tama Faalelagi ia faalagolago atoa i o tatou lava gafatia ma manatu a o tatou tausia o tatou soifua maloloina faalemafaufau. Ua Ia faatagaina le avanoa mo i tatou e aoao ai i ala e faaaoga ai la tatou faitalia. O le sailia o tali i a tatou fesili ma le mauaina o fofo i o tatou faafitauli faatasi ai ma Lana fesoasoani, o le mea lena o le a fesoasoani e faapea ona tatou avea ai e pei o Ia. O le manatuaina o lenei mea, e mafai ona tatou ole atu ia te Ia e faasino mai ia i tatou le ala e mafai ona tatou atili mausali ai faalelagona nai lo na’o le ole atu ia te Ia e faamanuia i tatou,
A o faaaoga pea lava pea o tatou faitalia i lenei faiga i soo se taimi e tofotofoina ai lo tatou manuia faalelagona, e faifailemu lava ona tatou faasolo ina manuia ma atili talitonu ia i tatou lava. E ui e le faapea e tatau lava ona tatou iloa felelei i le taimi nei, ae e mafai ona tatou mautinoa o loo faatasi o Ia ma i tatou i le ala ma olioli i le mea moni e faapea, o loo fesoasoani o Ia ina ia tatou faasolo manuia teisi atu, O aso taitasi lava e i ai se isi avanoa e ausia ai sini fou—e saunia ai tatou mo le aso o le a mafai ai ona tatou felelei na’o i tatou lava.