Ae Ua Ou Fiaai!

Isadora Marques Garcia

São Paulo, Pasila.

I se tasi o aso timuga lava i la’u misiona i Kolomupia, sa totoe le ma itula e tasi ma la’u soa ao le’i oo i le taimi e tatau ona ma i ai i le fale. Sa ma fiaaai ma lelavava mai le savavali i le aso atoa. Ma te le’i maua ma se tagata e aoao.

Sa leai foi se ma tupe ia i ma’ua, ma ma te le’i o foi e fai le faatauga mo ni meaai. Sa ma iloa a ma oo atu i le fale o le a leai se mea e ai. Sa ou taumafai e uuna’i ese nei mafaufauga le lelei ae taulai i le galuega.

“Vaai i le mea ua ou mauaina!” Sa faafuasei ona valaau mai ai la’u soa.

Sa ia mauaina se tupe i luga o le palapala. Mai le vaaiga i ona foliga, sa mafai ona ou iloaina sa mafaufau o ia i le mea sa ou mafaufau i ai. E mafai ona ta faataua ai se mea e ai!

Ae ina ua mavae sina taimi, sa faapea mai la’u soa, “Leai, e le o se ta tupe lea!”

“Ae ua ou fiaai!” Sa ou mafaufau ai.

“O ai lava le tagata e anaina, o le a ta le mauaina o ia i lenei taimi o le po,” sa ou fai atu ai ia te ia.

Sa ia fautua mai ma te tatalo. Sa ou iloa o le mea sa’o lena, ae o se vaega o a’u sa mafaufau o se mea faavalevalea. Sa ma galulue malosi i le aso atoa. Sa ma fia aai. Atonu o le mauaina o le tupe sa o se faamanuiaga mo le ma auaunaga.

Ona ou manatuaina lea o lo’u tina. A o ou latiiti, sa ia aoaoina i matou ma o’u uso ia faamaoni i taimi uma. O ia o se faataitaiga ia i matou ma sa tatalo ina ia matou maua le lototoa e faamaoni ai. Sa ou iloaina ana i ai o ia iina, o le a faanoanoa o ia pe afai ou te le faia le faaiuga sa’o.

O lea na ma tatalo ai. Sa ma ole atu i le Tama Faalelagi e fesoasoani ia ma maua le tagata e anaina. O ni nai minute mulimuli ane, sa sau ai se alii talavou, sa sueina se mea. Sa maligi ona loimata ma foliga le fiafia. Sa ma o atu i ai ma la’u soa ma iloa ai, sa ia i ma’ua le mea sa ia sueina.

Sa ma toe faafoia i ai lana tupe, ma sa faafia ona ia faafetai mai ia i ma’ua. Sa fai mai o ia, sa ia manaomia e totogi ai mo le kolisi. A aunoa ma le tupe, o le a leai sona avanoa i le lesitalaga. Sa tumu o’u mata i loimata, ma sa ou salamo i o’u manaoga sa i ai muamua e faaaoga le tupe. Sa ma aumaia ona faamatalaga e faafesootai ai, ma sa mafai ona ma aoaoina o ia ma isi tagata e toalima. I lena po, sa ou faafetai atu i la’u soa mo lana faataitaiga lelei.

Ou te iloa e faamanuia i tatou e le Atua pe a tatou faamaoni. Sa leai se ma meaai i lena po, ae ou te le manatua le alu e moe ma le fiaai. O le mauaina o le tupe sa o se faamanuiaga moni lava.