O Se Taiala a se Sii Meamamafa i le Tu Malosi
E alala le tusitala i Kalefonia, ISA.
O se mau se tasi e mafai ona faia se eseesega tele lava.—e oo lava i tauvaga siisii meamamafa.
A o avea a’u ma se tagata vasega amata i le aoga maualuga, sa fai mai le faiaoga siisii meamamafa ou te auai i le siisii meamamafa
“Mmm … leai faafetai,” sa ou fai atu ai. “E le o sa’u mea lena.”
Ae sa fai mai pea lava. Mo le tele o vaiaso.
Mulimuli ane, sa ou faataitaia loa. Sa sa’o lava o ia: sa matuai ou fiafia lava i le siisii meamamafa. Sa mautinoa lava le ese lava i le taimi muamua; sa le’i faia muamua e lo’u tino se mea faapea. Ae sa faasolo ina ou fiafia i le lagona o le faamalositino. Sa ou fiafia foi i tagata o la’u au ma tauvaga. Ma sa amata ona lelei lava la’u taumafai!
O le taimi nei ua avea le siisii meamamafa o se vaega tele o lo’u olaga. Ou te koleni i aso uma mo le pe a ma le lua po o le tolu itula, i le faiga o sii ma le pa e faalava i le papatua, sii ma malolo, ma siimalele. (Ma afai e te le iloa po o a na mea, aua le popole—sa faapena foi a’u!)
E pei o le tele o mea, o le siisii meamamafa e alu ai le taimi ma le onosai, ma o nisi taimi o se mea faigata lena mea. O le mea e laki ai, e i ai lava iina lo’u aiga e faamalosiau mai ia te a’u, e tusa lava foi pe ou te faitio i o’u tiga (lea e masani ona ou oo i ai). E i ai lava i taimi uma ia pepa aisa ma tala faalototele a lo’u tama e sauni mai mo a’u pe a ou taunuu i le fale mai koleniga. E ositaulaga e le aunoa lo’u tina ina ia ou alu i tauvaga.
O ni nai tausaga ua mavae, sa ou alu ai i se tasi o na tauvaga i Philadelphia, Pennsylvania, ISA. Sa ou fiafia e tauva faasaga i tagata siisii meamamafa mai le atunuu atoa, ae sa fai si o’u popole ona o le mamao ese mai lo’u aiga. Ina ia faafaigofie ai, sa folafola mai lo’u tina e tesi mai ia te a’u ni mau ma ni savali magafagafa i aso uma lava.
O le po a o lumanai le tauvaga, sa faia ai se pati a nisi o tamaiti. Sa ou manatu e manaia le alu i ai, o lea sa ma o loa i ai ma la’u paga ma te potu faatasi e siaki. Peitai, sa vave ona ou iloa i le taimi lava lea, sa le o la’u ituaiga pati lea. Sa i ai le tupulaga na inupia, ulaula, fai upu leaga, ma sisiva mataga. Sa ou iloaina sa le tatau ona ou i ai iina, ae sa ou popole po o le a se manatu o la’u paga ma te potu faatasi. Po o le a foi se manatu o isi tamaiti tauva.
Peitai sa oso mai se mea i lo’u mafaufau:
“Tutu i nofoaga paia.”
Sa maua mai i le mau e sili ona ou fiafia i ai, ma o se tasi o mau sa auina mai e lo’u tina i lena taeao: Mataupu Faavae ma Feagaiga 87:8: “O le mea lea, ia outou tutu ai i nofoaga paia, ma aua le masi’i ese, seia oo mai le aso o le Alii; aua faauta, e vave lava ona oo mai ua fetalai mai ai le Alii. Amene.”
Ou te le iloa pe aisea na auina mai ai e lo’u tina le mau lena i lea aso, ae o se tasi o mau ou te fiafia lava i ai i lo’u olaga atoa. Na ou taulotoina talu mai le valu o o’u tausaga, ma ua faafia ona faamanatu mai ai ia te a’u ia ou lototele, ia usiusitai ma tu atu mo le mea ou te talitonu i ai.
“Tutu i nofoaga paia.”
“O le a ou alu,” sa ou fai atu ai i la’u paga ma te potu faatasi. Sa ou faamatala atu i ai le mau sa auina mai e lo’u tina i le taeao lea. “E le o se nofoaga lenei e tatau ona ou tu ai.”
Sa fai mai foi la’u paga ma te potu faatasi, sa le fia i ai foi o ia iina. Sa le lagolelei foi o ia ae sa le’i manao e aluese nao ia ma vaai mai i ai tagata o se tagata vaivai. Sa ia faafetai mai ia te a’u mo le fai atu, ma sa ma o ese loa.
O le taeao na sosoo ai, sa ma iloaina ai, o le taimi lava sa ma o ese ai, sa faapea ona maua ai ia tamaiti sa i ai i le pati ma aveese ai mai le tauvaga mo le inupia ma le faaaoga o fualaau oona.
Ana le musuia a’u ia manatua le fuaiupu a lo’u tina, semanu e faaleaogaina foi a’u mai le tauvaga. Sa iu ina ou manumalo i le tulaga muamua, o lea ou te matuai faafetai ai lava ona na mafai ona ou tauva. (Ou te manatu, ou te faafetai i lo’u tina i aso taitasi uma lava mo le tesi mai ia te a’u.)
O le manumalo i se tauvaga siisii meamamafa o se faamanuiaga e fai lava si mautinoa ma vave mai le tausia o poloaiga. Ae e le o faapea mai le Mataupu Faavae ma Feagaiga 87:8. “Ia outou tutu ai i nofoaga paia ina ia mafai ona outou manumalo i tauvaga siisii meamamafa.” Ma e le o faapea mai le Ioane 14:15 “Afai e te manao i faamanuiaga vave, tausi mai a’u poloaiga.” E faamanuia i tatou e le Alii ona e alofa o Ia ia i tatou. Ma tatou te taumafai ia paia ma usiusitai ona tatou te talitonu ma alofa i le Alii.