Afai Tou te Alofa Mai ia te A’u
O le autu a le autalavou mo le tausaga 2019 o se valaau e faatino—o se valaaulia patino mai lo tatou Faaola. Ua i ai uma outou i totonu? Tou te alolofa ia te Ia? Pe o tou naunau e mulimuli i Ona tulagaaao?
Sa faia e lo tatou Faaola o Iesu Keriso se mea mo i tatou lea e le mafai ona tatou faia mo i tatou lava. Ae o le a la se mea ua Ia talosaga mai ai? Ua Ia talosaga mai ia tatou tausia Ana poloaiga ina ia mafai ona faamanuiaina i tatou ia maua pea Lona Agaga e faatasi ma i tatou (tagai Moronae 4:3).
O poloaiga o se meaalofa o le alofa. Sa na ona fetalai mai faapea o le Faaola, “Afai tou te alofa mai ia te au, ia outou tausi mai i a’u poloaiga” ae aisea? Ona e alofa o Ia ia te OE! E finagalo o Ia ia e fiafia. E finagalo ia tumu lou olaga i le olioli ma avanoa e le gata. E finagalo o ia ia e saogalemu ma puipuia mai mea leaga o le lalolagi. E finagalo o ia e liligi mai faamanuiaga e tele i ou luga “o le a leai se avanoa e lava e teu ai” (3 Nifae 24:10). E finagalo o ia ia e toe foi atu ma toe nonofo faatasi ma Ia ma ia avea ma se tasi e faaaogaina faamanuiaga folafolaina uma a le Tama Faalelagi.
Ia manatua pea le alofa tele o le Tama Faalelagi i Lana fanau. E atoatoa Lona alofa mo oe. E mafai ona e faaali atu lou alofa mo Ia e ala i le tausia o Ana poloaiga. O au amioga amiotonu o le a aumaia ai faamanuiaga e anoanoai mo oe ma i latou e siomia oe.
E pei ona saunoa lo tatou perofeta o Peresitene Russell M. Nelson: “Matou te manaomia oe ia faatasi ma i matou i le autau a le autalavou a le Alii. O le a le toe tutusa lava e aunoa ma oe!” Sa ia valaau oe e “tu matilatila [ma] ia ese mai le lalolagi” e ala i le ola i tulaga faatonuina o loo i le Mo le Malosi o le Autalavou ma e ala i le tausia o poloaiga—ina ia “foliga e pei, leo e pei, gaoioi e pei, ma laei e pei o se soo moni o Iesu Keriso” (“Faamoemoe o Isaraelu” [faigalotu a le autalavou i le lalolagi atoa, mo le 3 Iuni, 2018], 8, HopeOfIsrael.lds.org).
A o e taumafai e usitai i le Alii ma Ana perofeta, o le a faatumulia oe e le Agaga Paia i le alofa o le Atua ma molimau atu ia te oe e uiga i lou faasinomaga paia o se atalii po o se afafine o le Atua. E tuputupu a’e na faamanuiaga a o e taumafai e ola amiotonu. E talitonu le Alii ma le perofeta ia te oe. E alolofa i Laua ia te oe. Matou te tautino atu e oo mai le talitonuga maoae, faalototeleina o le tagata lava ia, ma le mafanafana pe a e usitai ma tausia poloaiga.