Tausi i Aʼu Poloaiga
Pe ua e mafaufau ea, “Pe mafai faapefea ona ou faaali atu i le Tama Faalelagi ou te manao moni ia te Ia e tali i a’u tatalo ma faamanuia a’u?” Sa tuuina mai e le Faaola o Iesu Keriso ia i tatou le ki ina ua Ia fetalai mai, “Afai tou te alolofa mai ia te a’u, ia outou tausi mai i a’u poloaiga” (Ioane 14:15).
I nisi faaupuga, e faaali atu lo tatou alolofa i le Tama Faalelagi e ala i le tausiga o Ana poloaiga.
O nisi taimi e le oo mai ai tali i le taimi ma le auala tatou te faamoemoe i ai, ma atonu e faaosoosoina i tatou e tuu pe taofi le toe usiusitai. Ae afai tatou te onosai ma faalogo, o le a tali mai le Alii i Lana lava taimi ma Lana lava ala. E tali mai e le aunoa o Ia i tatalo amiotonu. E faamanuia mai e le aunoa o Ia i le usiusitai (tagai Mosaea 2:21-24).
Ua aoao mai le lalolagi o le alofa e le i ai ni tiutetauave. Ae e moni foi lona faafeagai. O lo tatou alolofa i le Atua e faaalia lea i lo tatou pulunaunau ma le maelega i le tausiga o Ana poloaiga.
Na aoao mai le Faaola, “E tuu faasaoloto foi outou e le upu moni” (Ioane 8:32). Sa folafola mai foi e le perofeta o Alema, “e lei avea lava le amioleaga ma fiafia” (Alema 41:10). Ma e ala mai i le Perofeta o Iosefa Samita, na aoao mai ai le Alii, “E i ai se tulafono na folafola le maaveesea i le lagi i luma atu o le faavaega o le lalolagi lenei, ua faavae ai i luga faamanuiaga uma—ma a tatou maua se faamanuiaga mai le Atua, e maua i le usiusitai i lena tulafono ua faavae ai i luga” (Mataupu Faavae ma Feagaiga 130:20-21).
O le fiafia, faamanuiaga, ma le taitaiga e oo mai e ala i le usiusitai. E finagalo le Tama Faalelagi ia e fiafia ma saoloto ona e alofa o Ia ia te oe, o le pogai lena ua Ia tuuina mai ai poloaiga. Ina ia maua le filemu lea e le maua i lenei lalolagi, e ao ona tatou iloa o le gauai atu i le finagalo o le Tama e na o le pau lena o le auala i le fiafia.
E finagalo le Tama Faalelagi ia e maua le fiafia e faavavau. E finagalo ona perofeta ina ia e maua le fiafia e lemafuatiaina. Matou te mananao ia e maua le fiafia ua matou maua i le mulimuli i le Faaola. Savali i le ala ua Ia faaali mai, (tagai “Faaola e Ia Ou Alofa,” Viiga, nu. 150). Filifili e usiusitai. O lou usiusitai naunautai o le a taitai atu ai i le saolotoga ma le fiafia moni.