O Atatosi o le Faatuatua
Phan Phon
Phnom Penh, Kemupotia
Ua faamautinoa e Phan Phon ma lona faletua, la te aoao atu le talalelei i le fanau a le la fanau. Sa fesoasoani le talalelei a Iesu Keriso i le latou aiga e agai i luma i le mavae ai o le faalavelave o le aveesea o le latou fale i se afi.
Ina ua mu le fale o Phan, sa nao le fanau e toatolu a lana fanau sa mafai ona ia faasaoina. O isi mea uma sa mu uma i le eleele. Sa ita Phan i le tuaoi sa mafua ai le mu. Ina ua faasolo atu lona ita i lona aiga ma tuaoi, sa iloa e Phan e tatau ona ia faamagalo atu.
Leslie Nilsson, tagata pueata
O le taimi muamua lava na ou faalogoina ai le gapa, sa ou fesili atu i lo’u toalua, “O le a lena pao?”
Sa fai mai o ia, “Atonu o loo susunu se mea e le tuaoi,”
Ona ou faalogoina ai lea o se gapa lona lua. Sa fai mai se tasi o tuaoi ia te au, “O loo mu se fale i tua atu o lou fale!”
Sa matou o e aumai ni vai, ae sa le mafai ona matou tineia le afi. Sa sosolo mai le afi i lo’u fale. Sa ou tamoe i totonu o le fale e aumai le fanau e toatolu a la’u fanau. Sa oso mai i faamalama le asu, ae na leai se isi mea sa ou mafaufau i ai ae na’o le fanau a la’u fanau. O i latou na aupito sili ona taua ia te au. Sa ou tuua isi mea uma i totonu.
Sa matou sao i fafo ma na pau le mea sa mafai ona matou faia o le matamata atu i le mu o le fale. Sa le’i vave oo mai le au tineimu, ona sa laitiiti tele le auala i le matou fale. Sa tuai lo’u fale, ma sa vave ai ona mu. Sa matou tutu ma lo’u toalua ma le fanau a le ma fanau ma matamata atu i ai a’o mu.
Ina ua uma ona mu le fale, sa ou lagonaina le leai o se faamoemoe. Sa ou le iloa po o le a le mea a fai. Sa ou le iloa se mea e fai, e maua ai se nofoaga fou e nonofo ai. O le aso na sosoo ai ina ua uma le mu, sa matou tootutuli ai e tatalo ma ole atu i le Alii e faasino mai ia i matou le ala ma faamanuia i matou ia mafai ona matou maua se fale fou. Sa ou tagi a o ou tatalo i le Alii, ae sa ou faatuatua o le a Ia fesoasoani mai ia te a’u.
I le taimi muamua, sa ou ita i lo’u tuaoi o le na mafua ai le mu. Sa ou manao ia ona totogia, mo le mea na tupu. Sa feita foi lo’u aiga ma tuaoi sa aafia i le mu ma mamanao e auina atu se tusi i le malo ina ia tali ai i le tulafono le tagata sa nafa ma le mea na tupu. Sa latou fai mai ou te saini i le tusi, ae ou te le’i manao i ai.
Sa ou iloaoina, o lo’u tuaoi, sa mativa foi e pei o a’u. Na te le’i faamoemoeina e amataina le mu. Afai ou te faia ia ona totogia mai, o le a oo ina afaina o ia, ma o le a ou lagonaina pea le ita. Sa ou manatua le afioga a le Alii e tatau ona tatou alolofa i o tatou tuaoi. Sa ou lagonaina e tatau ona ou faamagalo atu.
Ina ua ou filifili e faamagalo atu, sa ou lagonaina le filemu.
Sa ou ta’u atu i tagata uma sa aafia i le mu, sa ou manao e faamagalo atu. Sei vagana ai se aiga e toatasi, sa filifili tagata uma e faia le mea lava lea e tasi. O le a latou le faia ia tali o ia mo le mea na tupu.
Sa fiafia lo’u tuaoi sa ou faamagaloina o ia. Ua sili atu foi le fiafia o lo’u aiga. A ou vaai i lenei mea, ou te lagona ai foi le fiafia.
Sa foai mai e tagata o le au paia ma tuaoi ia ni mea sa mafai ona latou maua e fesoasoani ai i lo’u aiga. Sa tele ni araisa sa ou maua ma sa faapea ona faasoa atu i isi. Sa latou fesili mai pe aisea ua ou tuuina atu ai ae o loo i ai i se tulaga faaletonu. Sa ou fai atu ia i latou, pe a ou auauna atu i isi, ua ou auauna atu i le Alii. Sa ou fia foai atu ia te Ia aua sa Ia faia le tele o vavega ia tutupu i lo’u olaga. Ua i ai so matou fale manaia, ua lelei atu nai lo o le fale lea na mu i lalo.
O le ita o Phan i le tuaoi o le sa mafua ai ona tupu le mu sa suia i le toafilemu ina ua ia manatuaina le afioga a le Alii. E faafetai lava Phan mo le taitaiga o loo ia maua mai tusitusiga paia.
A o mu i lalo lona fale, sa na’o le fanau lava a lana fanau sa mafai ona mafaufau i ai Phan. E alofa lava Phan i lona aiga. Fai mai o ia, “O i latou e aupito sili ona taua ia te au.”