Mai le Fefe i le Taumafa Fiafia

Matt Maxwell

Iuta, ISA

Sa ou toaga i le Ekalesia i lo’u olaga atoa. Sa ou auauna atu i se misiona talai, faaipoipo i le malumalu, ma fesoasoani e tausi ni afafine aulelei e toafa. Ae peitai, a o faasolo atu tausaga, sa ou matauina nisi o a’u uo ua lafoaia o latou tulaga o le avea ma ni tagata o le Ekalesia. Sa faaaoga e nisi o tagata o le aiga ia faasalalauga i agafesootai e fesiligia ai ma faitioina ai taitai o le Ekalesia. Ma sa amata ona i ai o’u lava masalosaloga e uiga i le Ekalesia mo le taimi muamua i lo’u olaga. O o’u masalosaloga sa afua ai ona ou fefe i le lumanai. Sa i ai taimi, na ou lagona ai le lofituina i le leai o se faamoemoe.

I le aluga o lenei taimi faigata, sa ou faamalosia ai a’u lava e auai i le konafesi a le siteki. A o saunoa lo’u peresitene o le siteki, sa ia faapea mai, “Afai tatou te fia saogalemu i taimi faigata o i lumanai, e tatau ona tatou see mai mai le faasamasamanoa o le faitauina i le faanatinati o le taumafa i le afioga a le Atua. E tatau ona tatou faamuamua i o tatou olaga le suesueina o tusitusiga paia e le aunoa ma ia taulai [i ai]. A tatou faia, ou te folafola atu o le a tatou le fefefe.”

O le upu “fefe” na tosina i ai lo’u [mafaufau]. Sa ou iloaoina, na ou faatagaina a’u suesuega i le talalelei e avea o se mea faasamasamanoa. O se taunuuga, sa uumau ai e le fefe lo’u olaga. Sa tonu ia te a’u e faataitai le fautuaga a le peresitene o le matou siteki.

Sa ou alu i le fale, ma faia se avanoa mo le suesueina o le talalelei. I le tulimanu o se potu, sa ou faatuina ai se kesi laitiiti ma se nofoa lagolelei. Sa ou tuua ni nai ata o le Faaola i luga o le puipui. Sa ou aoina mai a’u tusitusiga paia, ni penitala ma se tamaiapi. Sa amataina au suesuega i se tatalo.

Ina ua mavae se vaiaso pe lua, ua ou atinaeina se faiga masani i aso taitasi. Ou te faalogologo muamua i se lauga o le konafesi aoao ona suesue lea i se autu faapitoa o le talalelei. Ona ou faitauina lea o ni nai mataupu o le Tusi a Mamona ma faauma a’u suesuega i se tatalo faamaoni i lo’u Tama Faalelagi.

E ui lava i mea faalavefau eseese, sa seasea ona ou misia se aso o le suesueina o le talalelei mo le ono masina. Na ou mauaina se malamalamaaga sili atu e uiga i le tele o autu o le talalelei ma faamalosia ai le ma mafutaga ma lo’u Tama Faalelagi e ala i tatalo faisoo ma faamaoni.

Sa toe avea la’u molimau ma se mea e mafai ona ou faalagolago i ai. Sa mouese atu o’u masalosaloga ona o molimau fou na ou mauaina e uiga i le talalelei toefuataiina. Sa iu ina ou tau le popole aua sa tele atu lo’u faatuatuaina o le Atua. Sa ou lagona le aluese atu ma a’u o le fefe ma le leai o se faamoemoe. Sa faapea foi ona o le fiafia i gaoioiga faamaumau taimi ma matauina ai ua tele ina ou agalelei ma agamalu i isi.

A o ou faalogo ma usitai i le fautuaga a lo’u peresitene o le siteki, sa mafai e le Atua ona suia a’u. Sa faamaloloina a’u ma toefuatai mai e le Matai lava Ia a o ou suesue fiafia i Lana afioga.