Ka ʻOku ou Fiekaia!

Isadora Marques Garcia

São Paulo, Brazil

ʻI ha ʻaho ʻuha ʻe taha ʻi heʻeku ngāue fakafaifekau ʻi Kolomupiá, naʻe toe ha houa ʻe taha peá ma foki mo hoku hoá ki ʻapí. Naʻá ma fiekaia mo ongosia mei he lue lalo “he” ʻahó kakató. Naʻe ʻikai ke ma maʻu ha taha ke akoʻi.

Naʻe ʻikai foki haʻama paʻanga, pea naʻe teʻeki ke fai ʻema fakatau meʻakaí. Naʻá ma ʻilo te ma foki ki ʻapi pea ʻikai ha meʻa ke kai. Naʻá ku feinga ke tekeʻi e ngaahi fakakaukau ko ʻení pea tokanga taha ki he ngāué.

“Sio mai ki he meʻa kuó u maʻú!” Ko e lea fakafokifā ia ʻeku hoá.

Naʻá ne maʻu ha paʻanga ne tō ʻi he kelekelé. Naʻá ku lava ʻo tala mei he fōtunga ʻo hono fofongá, naʻá ne fakakaukau ki he meʻa ne u fakakaukau ki aí. Te ma lava ʻo fakatau mai ha meʻa ke ma kai!

Ka naʻe hili ha momeniti, ne pehē mai ʻe hoku hoá, “ʻIkai, ʻoku ʻikai ko haʻata paʻanga ia!”

“Ka ʻoku ou fiekaia!” Ko ʻeku fakakaukaú ia.

Naʻá ku talaange kiate ia, “He ʻikai ke ta maʻu e tokotaha ʻoku ʻaʻaná ʻi he taimi ko ʻení.”

Naʻá ne fokotuʻu mai ke ma lotu. Naʻá ku ʻilo naʻe tonu ia, ka naʻe ʻi ai ha konga ʻiate ia ne pehē naʻe ngalivale ia. Naʻá ma ngāue mālohi he ʻahó kakato. Naʻá ma fiekaia. Mahalo ko ʻema maʻu e paʻangá ko ha tāpuaki ia ki heʻema ngāué.

Pea ne u manatuʻi leva ʻeku fineʻeikí. ʻI heʻeku kei siʻí, naʻá ne akoʻi au mo hoku ngaahi tokouá ke mau faitotonu maʻu pē. Naʻá ne hoko ko ha sīpinga kiate kimautolu peá ne lotua te mau maʻu e loto-toʻa ke faitotonú. Naʻá ku ʻiloʻi kapau naʻá ne ʻi ai, te ne lotomamahi kapau naʻe ʻikai ke u fai e fili ʻoku totonú.

Ko ia, naʻá ma lotu. Naʻá ma kole ki he Tamai Hēvaní ke tokoni mai ke ma ʻilo e tokotaha ʻoku ʻaʻaná. ʻI ha ngaahi lau miniti mei ai, naʻe lue mai ha kiʻi talavou ʻo fekumi ki ha meʻa. Naʻá ne loʻimataʻia mo fofonga mamahi. Naʻá ku lue atu mo hoku hoá ki ai pea ʻilo ai naʻá ma maʻu e meʻa naʻá ne kumí.

Naʻá ma fakafoki ange ʻene paʻangá pea naʻá ne toutou fakamālō mai. Naʻá ne pehē naʻá ne fie maʻu ia ke totongi ʻaki ʻene akó. Kapau naʻe ʻikai ia, ʻe mole hono faingamālie ke lesisitá. Naʻá ku loʻimataʻia, peá u fakatomala mei heʻeku ngaahi holi kimuʻa ke fakaʻaongaʻi e paʻangá. Naʻá ma maʻu ʻene fakamatala fetuʻutakí, pea naʻá ma lava ʻo akoʻi ia mo ha toko nima kehe. Naʻá ku fakamālō he pō ko iá ki hoku hoá ʻi heʻene tā sīpinga leleí.

ʻOku ou ʻiloʻi ʻoku tāpuakiʻi kitautolu ʻe he ʻOtuá ʻi heʻetau faitotonú. Naʻe ʻikai ke ma maʻu ha meʻa ke kai he pō ko iá, ka ʻoku ʻikai ke u manatuʻi haʻaku mohe fiekaia. Ko hono fakakātoá, naʻe hoko hono maʻu e paʻangá ko ha tāpuaki.