Ko e Paʻanga Faifekau Lole-Poloká
Naʻe hoko e tokotaha naʻá ne fai e talanoá ko ha faifekau ʻi Filipaini pea ʻokú ne nofo he taimí ni ʻi Veisinia, USA.
“Pea pehē ʻe Sīsū kiate ia, Fafanga ʻeku fanga sipí” (Sione 21:17).
Naʻe lue foki ʻa Sēleti ki ʻapi mei he lotú ʻi he vela ʻa e laʻaá mo Mami mo Teti. Naʻá ne fakakaukau ki heʻene lēsoni Palaimelí. Koeʻuhí naʻe ʻikai ke fuʻu lelei ʻene fanongó, naʻe pau ke tokanga ʻa Sēleti ki he ngaahi fakatātā naʻe fakaʻaliʻali ange ʻe heʻene faiakó mo e ngaahi lea naʻá ne hiki he palakipoé.
Naʻa nau ako he ʻaho ko iá naʻe kole ʻe Sīsū ki he kau ākongá ke nau hoko ko e kau faifekau. Naʻe fifili ʻa Sēleti ki he meʻa te ne lava ʻo fai ke vahevahe ai e ongoongoleleí ʻo hangē ko ia naʻe kole ʻe Sīsuú. Naʻá ne ʻilo naʻe teʻeki ai ke ne lava ʻo ngāue fakafaifekau. Naʻá ne maʻu leva ha foʻi fakakaukau lelei. Mahalo te ne lava ʻo fakahaofi ha paʻanga ki ai!
ʻI heʻene aʻu ki ʻapí, naʻe lele fakalaka atu ʻa Sēleti ʻia ʻAmipā, ko ʻene kiʻi kosi pusiakí, pea hū ki fale. Naʻá ne maʻu ha fuʻu hina pelesitiki lahi peá ne hifi fakalelei ha foʻi ava ʻi ʻolunga. Naʻá ne tohi e “Paʻanga Faifekau” ʻi he tafaʻakí. Naʻá ne ʻalu leva ki hono lokí pea toʻo mai ʻene sēnití mei he lalo mohengá. Naʻá ne faʻo tahataha e fanga kiʻi koiní ki loto. Ka naʻe ʻikai ke mei puli e takele ʻo e hiná ʻi heʻene koiní. ʻE founga fēfē haʻane maʻu ha paʻanga lahi ange?
Naʻe fakakaukau fuoloa ʻa Sēleti. Naʻá ne sio ki tuʻa ki he ulo ʻa e laʻaá. Naʻe vela ʻaupito ʻa Filipaini. Naʻe kai lole niu fakapoloka ʻa Sēleti mo hono ngaahi kaungāmeʻá ʻi he hoʻatā kotoa pē he tuku ʻa e akó. Naʻá ne fakakaukau, “Ko e meʻá ia!” Mahalo te ne lava ʻo ngaahi ha lole poloka pea fakatau atu ia ki he kakai kehe ʻoku nau fie fakamokomokó.
Naʻe lele ʻa Sēleti ke kumi ʻa Mami. “Te ke lava ʻo akoʻi mai e founga ke ngaohi e lole poloká?” Ko e fakaʻilonga atu ia ʻa Sēletí. Naʻa nau fakaʻaongaʻi e talanoa fakaʻilonga nimá, ko ha lea ʻokú ke talanoa ʻaki ho ongo nimá. Naʻe malimali ʻa Mami mo kamo ange.
ʻI he ʻaho hono hokó, naʻe lue ʻa Sēleti mo Mami ki he māketi lahí pea fakatau kotoa mai e koloa naʻe fie maʻú. ʻI heʻena aʻu ki ʻapí, naʻe toʻo hake ʻe Sēleti ha fuʻu poulu lahi pea huʻi e huhuʻa niú, huʻakaú, vanila, mo e niu naʻe vau. Naʻe fakaʻaongaʻi ʻe Mami mo Sēleti ha fōneli ke lingi ʻaki e meʻa naʻe huʻí ki ha fanga kiʻi milemila. Naʻá na faʻo kotoa e milemilá ki he ʻaisí. “Fakaʻofoʻofa ʻaupito!” Ne fakaʻilonga ange ʻa Mami.
Naʻe fuoloa hono fakapoloka e lole poloká. Ka ʻi he ʻaho hono hokó ʻi he tuku ʻa e akó, naʻe maau ia! Naʻe kaka ʻa Sēleti ʻi ha sea pea toʻo hifo e kula hinehiná mei he funga ʻaisí. Naʻá ne faʻo ha ʻū pepa holoholo ʻo faliki ʻaki e kulá pea fakaʻotu hifo leva ai e lole poloká. Naʻe ʻikai ke ne faʻa tatali ke fakatau atu ia.
Naʻe lele ʻa Sēleti ki tuʻa ki he hala efuá. Naʻe vaʻinga hono ngaahi kaungāmeʻá mo e ngaahi lofa ne nau faʻu mo tolo honau silipá ki ha ngeʻesi kapa ke tō ki lalo.
Naʻá ne fokotuʻu he veʻehalá ha tēpile pea mo ha fakaʻilonga lahi naʻe pehē, “Lole Poloka, peso ʻe 5.” Naʻe lele atu hono kaungāmeʻa ko Sonelí mo tuhu ki he kulá. Naʻá ne ʻoange kia Sēleti ha koini peso ʻe nima, pea ʻoange ʻe Sēleti haʻane lole poloka. Naʻá na tā nima.
ʻIkai fuoloa mei ai kuo omi foki mo ha ngaahi kaungāmeʻa toko lahi ange ʻo Sēleti ke fakatau lole poloka. ʻI ha ngaahi houa siʻi mei ai, he taimi naʻe ui ai ʻe Mami ʻa Sēleti ki he maʻumeʻatokoni efiafí, ko e lole poloka siʻisiʻi pē naʻe toé.
Naʻe toʻo hake ʻe Sēleti ʻa e kula ne mei ʻosí mo e koiní. Naʻá ne faʻo ha koini ʻi hono kató ki heʻene vahehongofulú. Naʻá ne faʻo leva e toenga ʻo e koiní ʻi hono kato ʻe tahá. Naʻe ʻikai ke ne faʻa tatali ke sio ki he fonu ʻene tānakiʻanga paʻanga faifekaú.
Naʻá ne faʻo ʻene koini paʻanga faifekaú ki he foʻi hina ʻi ʻapí. Naʻe kei toe lahi ʻaupito! Ka naʻe ongoʻi loto māfana ʻa Sēleti ʻi heʻene fakakaukau ki haʻane ngāue fakafaifekau ʻi ha ʻahó. Naʻá ne fakakaukau ai te ne fakatau atu e lole poloká he ʻaho kotoa pē kae ʻoua kuo fonu ʻene hiná. Naʻe ongoʻi lelei moʻoni ke maʻu ha paʻanga kae lava ke ne hoko ko ha faifekau ʻo hangē ko ia naʻe kole ange ʻe Sīsū ke ne faí.