Kakai Lalahi Kei Talavoú
Ako ke Fohi e Kili ʻo ha Monumanu
ʻI he taimi pē ʻoku ou fakakaukau ai ki he moʻui fakafalala pē kiate kitá, ʻoku haʻu ki heʻeku fakakaukaú ha kupuʻi lea mei heʻeku palesiteni fakamisioná: “Fohi pē kili hoʻo monumanu.” ʻIo, ko ha lea ngalikehe ia, ka ʻoku lahi ha moʻoni ʻi he fakakaukau ko iá ʻoku ʻi ai ha ngaahi meʻa faingataʻa ʻi heʻetau moʻuí he ʻikai ke tau lava ʻo kole ki he niʻihi kehé ke nau ikunaʻi maʻatautolu.
Ko ia, te tau “fohi fēfē ʻetau monumanú” ʻo fakafekauʻaki mo e moʻui fakafalala fakaeloto pē kiate kitá? ʻOku tau ikunaʻi fēfē ʻa e ngaahi loto mamahí mo ako ke fehangahangai mo e kotoa ʻetau ngaahi ongo fakaelotó?
Fakamālō pē, ʻoku ʻikai ke tau tuenoa—ʻoku hulu ʻa e ngaahi maʻuʻanga tokoní. Te tau lava ʻo ʻilo ha niʻihi siʻi ʻo e ngaahi meʻá ni ʻi he “Founga ʻe 14 ke Fakalakalaka ai Ho Tuʻunga Moʻui Lelei Fakaelotó.” Ko e mahuʻinga tahá, te tau lava ʻo fakafaingofuaʻi e moʻuí ʻi heʻetau tauhi e ngaahi fekaú (vakai, peesi 44).
Ko e ako ko ia ke fakafeangai ki he meʻa kotoa pē ʻoku tau fepaki mo ia ʻi he moʻuí ko ha founga ia ʻoku tau foua. ʻOku ʻikai ʻuhinga e moʻui fakafalala fakaeloto pē kiate kitá te tau ongoʻi maʻu pē fakatatau ki he meʻa ʻoku tau loto ki aí. ʻOku ʻuhinga ia, te tau malava ke mapuleʻi e ngaahi ongo fakaelotó ʻi ha ngaahi founga lelei mo ʻaonga, ʻo fakafou ʻi he ʻaloʻofa ʻa Sīsū Kalaisí. ʻOku ʻomi ʻe Palesiteni M. Lāsolo Pālati ha faleʻi ʻaonga ki hono aʻusia e potupotutatau ko ʻení (vakai, peesi 48).
ʻI heʻetau faifeinga ke moʻui fakafalala fakaeloto pē kiate kitá, mahalo te tau ongoʻi hangē ha kiʻi foʻi manupuna ngāvaivaí (vakai, peesi 46), ka ʻi heʻetau ngāue pea kau fakataha mo e Tamai Hēvaní, te tau lava ʻo maʻu ha loto-falala ʻe ʻi ai ha ʻaho te tau “puna hake ʻaki ʻa e kapakau ʻo hangē ko e fanga ʻīkalé” ( ʻĪsaia 40:31), ʻa ia ko ha founga ia ʻe taha ke pehē te tau maʻu ʻa e mālohi ke fohi pē kili ʻetau monumanú.
Talamonū atu,
Heather J. Johnson