Naʻe Moʻui ʻEmau Mīsini Fakamāfaná ʻi he Tuí

Loisi Manusiu

Texas, USA

ʻI he taimi naʻá ku nofo ai mo hoku husepāniti ko Maʻaké mo ʻema fānau iiki ʻe toko nimá ʻi he tafaʻaki fakahahake ʻo e ʻIunaiteti Siteití, naʻa mau nofo ʻi ha fale ne ʻi ai ha mīsini fakamāfana ne ʻutu lolo. Ko e vakaiʻi e loló, te mau fakahū ha meʻafua ki he tangikeé. Pea kapau naʻe siʻisiʻi e loló, te mau tā ki he kautaha lolo fakamāfaná ke nau haʻu ʻo fakafonu e tangikeé.

Lolotonga ha momoko toho ʻi Sānuali, naʻa mau feʻamokaki fakapaʻanga. Naʻá ku ngāue fakataimi he efiafí ʻi ha falekai ke fakalahi ʻemau paʻanga hū maí, ka naʻa mau kei feʻamokaki pē. Ne faifai pea aʻu ki heʻemau fili ke totongi e vahehongofulú pe ko hono totongi ke fakamāfanaʻi homau falé. Naʻa mau fua e loló pea naʻe ʻinisi ia ʻe ua (5 cm). ʻE lele pē ia ʻi ha ʻaho pē ʻe ua. Ka naʻa mau fili ke tui ki he ʻEikí pea totongi ʻemau vahehongofulú.

ʻI he ʻaho hono hokó, naʻe toe fua ʻe Maʻake e loló. Naʻe kei ʻinisi ʻe ua pē. Naʻe toe fua ia ʻe Maʻake he ʻaho hono hokó, pea naʻe kei ʻinisi ʻe ua pē. Naʻe ongo mai e māfaná, ka naʻe ʻikai holo e loló ia. ʻI he ʻaho ʻe ua hono hokó, naʻe kei tuʻumaʻu pē ʻa e loló ʻi he ʻinisi ʻe uá. ʻOku ou manatuʻi ʻeku tangi ʻi he fiefia he pō naʻá ku fanongo ai ʻoku moʻui mai e mīsini fakamāfaná. Naʻe ʻikai moʻui ʻemau mīsini fakamāfaná ʻi he loló; naʻe moʻui ia ʻi he tuí.

Naʻá ku ongoʻi hangē ko e uitou naʻá ne fafangaʻi e palōfita ko ʻIlaisiaá peá ne toki ʻilo “naʻe ʻikai fakaʻaʻau ke ʻosi ʻa e mahoaʻa ʻi he puhá, pea naʻe ʻikai foki ke maha ʻa e lolo ʻi he ipú” (1 Ngaahi Tuʻi 17:16). ʻI he faifai pea hokosia e ʻaho vahé, naʻe toe fua ʻe Maʻake e loló. Ko e taimi ko ʻení naʻe ʻinisi ia ʻe taha (2.5 cm). Kuo holo hifo he taimí ni e loló, ka naʻa mau maʻu ha paʻanga ke fakafonu e tangikeé.

Naʻe ʻahiʻahiʻi ʻe homau fāmilí e talaʻofa ʻa e ʻEiki ʻi he Malakai 3:10: “Pea mou ʻahiʻahiʻi ai au, ʻoku pehē ʻe [he ʻEiki], ʻo e ngaahi kau taú, pe te u fakaava ʻa e ngaahi matapā ʻo e langí pe ʻikai, peá u lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai.”

Ki ha taha pē ʻoku veiveiua ʻi he ngaahi tāpuaki ʻo e totongi vahehongofulú, ʻoku ou poupouʻi kinautolu ke nau tali e fakaafe ʻa e ʻEikí ke “ʻahiʻahiʻi ai aú.” ʻOku fakaava e ngaahi matapā ʻo e langí ʻe he vahehongofulú, pea ʻoku tāpuekina kitautolu ʻi he ngaahi founga lahi ʻo fakafou ʻi he talangofua mo e faivelenga ki he ngaahi fono mo e ngaahi fekau ʻa e ʻEikí.

He ʻikai teitei ngalo ʻi homau fāmilí ʻa e taimi naʻe moʻui ai ʻemau mīsini fakamāfaná ʻi he tuí kae ʻikai ko e loló.