Ko e Koloa Lelei Taha ke Vahevahé
Naʻe pehē ʻe he faiako ʻa Tiekó, “Ko e ʻaho matuʻaki makehe ʻapongipongi.” “ʻE fai ʻetau Fakaʻaliʻali mo Fakamatala!”
Naʻe malimali ʻa Tieko. Naʻá ne saiʻia ʻi he Fakaʻaliʻali mo Fakamatalá! Naʻe ʻikai ke ne faʻa tatali ke fakaʻaliʻali ki hono kaungāmeʻá ha meʻa makehe.
ʻI he tuku ʻa e akó, naʻe talaange ʻe Tieko kia Mama ʻa e ongoongo fakafiefiá.
Naʻá ne fehuʻi ange, “Ko e hā ʻoku totonu ke u ʻalu mo iá?”
Naʻe pehē ange ʻe Mama, “Ko ha meʻa ʻoku makehe kiate koe.”
“Te u lava ʻo ʻalu mo Lopo!”
Naʻe pehē ange ʻe Mama, “ʻOku ʻikai ke u tui te tau lava ʻo ʻave ha kulī ki he akó.” “Ka ʻoku ʻi ai ha ngaahi koloa makehe te ke lava ʻo vahevahe.”
Ne ʻikai fuoloa kuo kamata e kumi koloa ʻa Tiekó! Naʻá ne maʻu ha kiʻi ngeli ne fakafonu vavae. Te u ʻave nai ia? Ka naʻe hoko atu pē kumi ʻa Tiekó.
Naʻá ne kumi ʻi he lalo sea ʻi peitó. Naʻá ne kumi ʻi he funga tukuʻanga tohí. He ʻikai tuku kae ʻoua kuó ne maʻu ha meʻa ʻoku tonu.
Naʻá ne kumi leva hono veʻe mohengá. Naʻá ne maʻu e meʻa lelei tahá!
Naʻe lele ʻa Tieko ke fakaʻaliʻali kia Mama. Naʻá ne puke maʻu ʻene kiʻi koloá.
Naʻá ne pehē ange, “Mama!” “Sio! Kuó u maʻu e meʻa lelei tahá.”
Naʻá ne pukepuke hake ha kiʻi laʻi tā ke sio ki ai ʻa Mama. Ko ha laʻi tā ia ʻo Sīsū ʻi heʻene kei tamasiʻí. Naʻe ongoʻi fiefia ʻa Tieko ʻi heʻene sio ki he laʻi taá. Naʻá ne fie maʻu hono kaungāmeʻa ʻi he akó ke nau ongoʻi fiefia foki.
Naʻe pehē ange ʻe Mama “Ko ha meʻa mekehe ia ki he Fakaʻaliʻali mo Fakamatalá.” “Ko e hā te ke fakamatala ki ho kalasí fekauʻaki mo Sīsuú?”
Naʻá ne pehē, “ʻE lava ke fiefia ʻa e tokotaha kotoa pē.” “Koeʻuhí ʻoku ʻofa ʻa Sīsū ki he tokotaha kotoa pē!”