Ko e Lea Fakaʻosí
Ko e Sākalamēnití mo e Hoko ʻo Anga Faka-Kalaisi Angé
Fai ʻe ʻEletā D. Todd Christofferson
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei ha lea ʻi he konifelenisi lahi ʻo ʻOkatopa 2017.
ʻOku fakaʻofoʻofa ke fakalaulaulotoa e fakataipe ʻo e sākalamēniti ʻOhomohe Fakaʻosi ʻa e ʻEikí. ʻOku fakafofongaʻi ʻe he maá mo e vaí ʻa e sino mo e taʻataʻa ʻo Ia, ko e Mā ʻo e Moʻuí mo e Vai Moʻuí, (vakai, Sione 4:10), ʻo ne fakamanatu mahino mai kiate kitautolu ʻa e totongi naʻá Ne fai ke huhuʻi kitautolú. ʻI he pakipaki ko ia ʻo e maá, ʻoku tau manatu ai ki he sino kuo maumauʻi ʻo e Fakamoʻuí. ʻI heʻetau inu ʻa e vaí, ʻoku tau fakakaukau ai ki he taʻataʻa naʻá Ne lilingi ʻi Ketisemani pea mo e kolosí pea mo hono mālohi fakatapuí (vakai, Mōsese 6:60).
Ka ko e fakataipe ʻo e maʻu Hono sinó mo e inu Hono taʻataʻá ʻoku ʻi ai hano ʻuhinga ʻe taha, pea ko hono fakatōkakano ia ʻo e ngaahi lelei mo e ʻulungaanga ʻo Kalaisí. … ʻI heʻetau maʻu ko ia ʻa e mā mo e vai ʻo e sākalamēnití he uiké takitaha, ʻe lelei kapau te tau fakakaukauʻi ʻa e totonu ke tau fakakau kānokato mo kakato Hono ʻulungāngá pea mo e sīpinga ʻo ʻEne moʻui taʻe-ha-angahalá ki heʻetau moʻuí mo hotau lotó. Naʻe ʻikai mei lava ʻe Sīsū ʻo fai e fakalelei ki he angahala ʻa e kakai kehé, tukukehe kapau he ʻikai Haʻane angahala. Koeʻuhí ko e ʻikai ha ʻeke ʻa e fakamaau totonú kiate Iá, naʻá ne lava ai ʻo foaki Ia ko hotau fetongi ke feau e fakamaau totonú pea fakahoko ʻa e ʻaloʻofá. …
ʻOku ʻuhinga ʻa e maʻu ʻo e sino ʻo e Fakamoʻuí mo inu Hono taʻataʻá, ke tekeʻi ki tuʻa mei heʻetau moʻuí ha meʻa pē ʻoku ʻikai fenāpasi mo ha ʻulungaanga faka-Kalaisi pea ke tau fakafōtunga atu Hono ʻulungāngá. Ko e ʻuhinga māʻolunga ange ʻeni ʻo e fakatomalá, ʻo ʻikai ke tafoki pē mei he angahala ʻo e kuohilí kae pehē foki ki ha ʻliliu ʻa e lotó mo e fakakaukaú ki he ʻOtuá” pea laka atu ki muʻa (vakai, Bible Dictionary, “Repentance”). ʻE fakahaaʻi mai ʻe he ʻOtuá hotau ngaahi vaivaí mo ʻetau ngaahi taʻemalavá, ka te Ne toe tokoniʻi foki kitautolu ke liliu hotau ngaahi vaivaí ko e mālohinga (vakai, ʻEta 12:27). Kapau te tau fehuʻi fakamātoato, “Ko e hā ʻoku ou kei hala aí?“ (Mātiu 19:20) He ʻikai te Ne tuku ke tau fakamahamahalo, ka te Ne tali ʻi he ʻofa ke tau fiefia. Pea te Ne foaki mai ha ʻamanaki lelei.