Fiu Tānaki e Kau Fiefanongó
Iamila Kaminosi
Buenos Aires, Argentina
Tā fakatātaaʻi ʻe Robert Crawford
Naʻe ngali kehe ki he kau faifekau kei talavou ne tukituki ʻi he ngaahi hala ʻi Puenosi ʻAealesi, ʻĀsenitina, ʻi he 1995, ʻa e talaʻofa naʻa nau maʻu mei ha mēmipa ʻo e Kau Palesitenisī Fakaʻēliá: “Kapau te mou ngāue mālohi mo talangofua kakato, ʻe fiu tānaki e kau fiefanongo ke papitaisó.” Naʻa mau ʻilo ʻi ha taimi nounou mei ai kau ki he talaʻofa ko iá.
Naʻe ʻauhani ʻe heʻeku tangataʻeikí ha taha ʻo e ʻulu ʻakau ʻi he veʻe saitiuoka he toumuʻa homau ʻapí. Lolotonga ʻene ʻauhani ʻi he funga ʻakaú, naʻá ne fakatokangaʻi ha ongo talavou ʻokú na lue fakahangatonu mai ʻi he halá. ʻI heʻena fakalaka hake he lalo ʻakaú, naʻá ne ui faka-Pilitania hifo kiate kinaua.
Naʻe ʻikai fuʻu poto lelei ʻeku tangataʻeikí he lea faka-Pilitaniá ka naʻá ne ʻilo ha ngaahi lea siʻi, pea naʻá ne fie ʻilo. Ko hai e ongo talavoú ni, pea ko e hā ʻena meʻa ʻoku fai ʻi homau feituʻú?
Naʻe tuʻu e ongo faifekaú, ʻo fifili pe naʻe haʻu e leʻó mei fē. Naʻe hifo leva ʻeku tangataʻeikí mei he fuʻu ʻakaú ke talanoa mo kinaua. ʻI heʻene mālieʻia ʻi heʻena pōpoakí mo e ʻulungāngá, naʻá ne fakaafeʻi kinaua ki hono ʻapí.
Naʻe loto-hohaʻa ʻeku tangataʻeikí ʻi heʻene aʻusia fakalotu kimuʻá, ka naʻe ongo ki hono lotó e pōpoaki ʻo e ongoongolelei kuo fakafoki maí. Naʻá ne foua ha ngaahi taimi faingataʻa, pea naʻá ne ʻiloʻi naʻe fie maʻu ke ne liliu. Naʻá ne fakafanongo lelei ʻi hono akoʻi ia ʻe he ongo faifekaú, mo ʻeku fineʻeikí, kui fefiné pea mo au.
Naʻá ku taʻu 11 pē, ka naʻe ueʻi foki au ʻe he ngaahi moʻoni naʻá na akoʻí—pehē ki heʻeku fineʻeikí mo ʻeku kui fefiné. Ko hono olá, naʻe papitaiso kotoa kimautolu ʻi ha ngaahi māhina siʻi mei ai, ʻi Sepitema 1995.
Naʻe ʻikai fuoloa mei ai kuo tanumaki e ngaahi tenga ʻo e tuí ne fakatō ʻe he ongo faifekaú ki homau lotó, ʻe he fakafeohi mei he ngaahi kaungāmeʻa ʻi he lotú, akonaki lahi ange ʻo e ongoongoleleí, mo e ngaahi aʻusia lelei pea mo e kau taki mālohi ʻo e Siasí. Koeʻuhí ko e talitali loto māfana naʻa mau maʻú, naʻe tō e ngaahi tenga ʻo ʻemau tuí “ki he kelekele lelei, ʻo tupu hake, pea tupu ai ʻa e fua ʻe teau” (Luke 8:8).
ʻOku kau ʻi he ngaahi fua ʻo ʻemau tuí ʻoku mau fiefia ai he ʻaho ní—meimei taʻu ʻe 25 mei ai—ha tukupā taʻetoeueʻia ki he ongoongolelei ʻo Sīsū Kalaisi kuo fakafoki maí, ngaahi tāpuaki ʻo e temipalé, mo ha moʻui kakato mo fiefia fakataha mo ha toʻu tangata foʻou ʻo e kau mēmipa ʻo e fāmilí kuo faaitaha ʻo taʻengata.
Te mau houngaʻia maʻu pē ʻi ha ongo faifekau faivelenga naʻá na ʻahiʻahiʻi ha talaʻofa ne ueʻi fakalaumālie.