Mei he Manavasiʻí ki he Keinangá
Meti Mekisuele
Utah, USA
Tā fakatātā ʻa Greg Newbold
Kuó u mālohi maʻu pē ʻi he Siasí he kotoa ʻo ʻeku moʻuí. Naʻá ku ngāue fakafaifekau taimi kakato, mali ʻi he temipalé, mo tokoni ke ohi hake ha ngaahi ʻofefine fakaʻofoʻofa ʻe toko fā. Ka ʻi he fakalau atu e ngaahi taʻú, naʻá ku fakatokangaʻi kuo mavahe ha niʻihi hoku ngaahi kaungāmeʻá mei he Siasí. Naʻe fakaʻaongaʻi ʻe ha niʻihi ʻo e kau mēmipa ʻo e fāmilí ʻa e mītia fakasōsialé ke fakafehuʻi mo fakaangaʻi e kau taki ʻo e Siasí. Pea ʻi he fuofua taimi heʻeku moʻuí, naʻe kamata ke u veiveiua fekauʻaki mo e Siasí. Naʻe fakatupu ʻe heʻeku loto-veiveiuá ke u manavasiʻi ki he kahaʻú. Ne u ongoʻi kuo siva e ʻamanakí ʻi he ngaahi taimi ʻe niʻihi.
Lolotonga e taimi faingataʻa ko ʻení, naʻá ku ʻalu fakamālohi pē ki he konifelenisi fakasiteikí. ʻI he taimi naʻe lea ai ʻeku palesiteni fakasiteikí, naʻá ne pehē, “Kapau ʻe fie maʻu ke tau ikunaʻi e ngaahi taimi faingataʻa ka hoko maí, ʻoku fie maʻu ke tau ʻunu mei he keinanga angamahení ki he keinanga fakamātoato ʻi he folofola ʻa e ʻOtuá. ʻOku fie maʻu ke tau fakamuʻomuʻa e ako folofola maʻu peé mo tokangá ʻi heʻetau moʻuí. Kapau te tau fai ia, ʻoku ou palōmesi he ʻikai ke tau manavasiʻi.”
Naʻe maʻu ʻeku tokangá ʻi he foʻi lea ko e “manavasiʻí.” Naʻá ku fakatokangaʻi ne u fakaʻatā ʻeku ako e ongoongoleleí ke hoko ko ha meʻa angamaheni pē. Ko hono olá, naʻe nofoʻia ʻe he manavasiʻí ʻeku moʻuí. Naʻá ku fakakaukau ke u ʻahiʻahiʻi e faleʻi ʻa ʻeku palesiteni fakasiteikí.
Naʻá ku ʻalu ki ʻapi pea fakaʻataʻatā ha feituʻu ki he ako ʻo e ongoongoleleí. Naʻá ku fokotuʻu ha kiʻi tesi mo ha sea molū ʻi he tuliki ʻo ha loki. Naʻá ku fokotuʻu ha ngaahi tā ʻo e Fakamoʻuí ʻi he holisí. Naʻá ku tānaki mai ʻeku ngaahi folofolá, ngaahi peni vahevahe, mo ha kiʻi pepa tohi. Naʻá ku kamata ʻaki ʻeku akó ha lotu.
Hili ha uike ʻe taha pe ua, ne u fakatupulaki ha ngāue fakaʻaho. Te u ʻuluaki fanongo ki ha lea ʻi he konifelenisi lahí pea ako leva ha tefito pau ʻo e ongoongoleleí. Te u lau leva ha ngaahi vahe siʻi ʻo e Tohi ʻa Molomoná pea fakaʻosi ʻaki ʻeku akó ha lotu ʻi he loto moʻoni ki heʻeku Tamai Hēvaní.
Neongo e ngaahi takihala kehekehe, ka naʻe tātāitaha ke ʻi ai ha ʻaho te u taʻeako ai e ongoongoleleí ʻi ha māhina ʻe ono. Naʻá ku maʻu ha mahino lahi ange ki he ngaahi tefito lahi ʻo e ongoongoleleí mo fakamālohia hoku vā fetuʻutaki mo ʻeku Tamai Hēvaní ʻo fakafou ʻi he lotu fakamātoato maʻu peé.
Naʻe toe kamata ke hoko ʻeku fakamoʻoní ko ha meʻa te u lava ʻo fakafalala ki ai. Naʻe mole atu ʻeku loto-veiveiuá koeʻuhí ko e ngaahi fakamoʻoni foʻou ne u maʻu ki he ongoongolelei kuo fakafoki maí. Naʻá ku fakatokangaʻi ne siʻi ange ʻeku loto-hohaʻa koeʻuhí naʻá ku falala lahi ange ki he ʻOtuá. Naʻá ku ongoʻi e mole atu ʻa e manavasiʻí mo e siva e ʻamanakí. Naʻe mole foki mo ʻeku tokanga ki he ngaahi ʻekitivitī fakamole taimí peá u fakatokangaʻi naʻá ku angaʻofa mo angalelei ange ki he niʻihi kehé.
ʻI heʻeku talangofua ki he faleʻi ʻa ʻeku palesiteni fakasiteikí, naʻe lava e ʻOtuá ʻo liliu au. Naʻe fakamoʻui pea toe fakafoki mai au ʻe he ʻEikí Tonu pē ʻi heʻeku keinanga ʻi Heʻene folofolá.