Tōkiō, Siapani

ʻI he Faʻitoka Iānaka ʻi Tōkiō, Siapaní, ʻoku ʻaʻahi ha fāmili Siasi, ko e fāmili Saitoó, ki he maka fakamanatu honau fāmilí. Ko ha feituʻu ia ʻo e manatu kiate kinautolu, ʻoku toe toputapu angé koeʻuhí ko ʻenau ʻilo ko ia ʻi he ongoongoleleí ʻe lava ke taʻengata e ngaahi fāmilí.

ʻOku matuʻaki mahuʻinga ʻaupito e fakaʻapaʻapa ki he fāmilí mo e ngaahi kuí ʻi he anga fakafonua Siapaní, pea ʻoku fiefia e Kāingalotu Siapaní he ʻoku tāpuekina honau puleʻangá he taimí ni ʻaki ha temipale ʻe tolu: Tōkiō (ko e ʻuluaki ia ʻi ʻĒsiá, naʻe fakatapui ʻi he 1980 pea ʻoku lolotonga fakaleleiʻi), Fukuoka (naʻe fakatapui ʻi he 2000), mo Sapolo (naʻe fakatapui ʻi he 2016). ʻOku ʻi ai foki ha ngaahi senitā hisitōlia fakafāmili ʻa e Siasí ʻe 64.

Naʻe fuofua tūʻuta e kau faifekaú ʻi Siapani ʻi he 1901, ʻo tataki ʻe ʻEletā Hiipa J. Kalānite (1856–1945), ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá he taimi ko iá pea hoko kimui ange ko e Palesiteni hono fitu ʻo e Siasí. ʻI he ʻahó ni ʻoku ʻi ai ha kāingalotu ʻe meimei toko 130,000 ʻi Siapani ʻi ha ngaahi haʻofanga lotu ʻe 261.

Ko e fuofua liliu ʻo e Tohi ʻa Molomoná ki he lea faka-Siapaní, naʻe taʻu ʻe nima pea toki kakato ʻi he 1909. Naʻe pulusi ʻi he 1957 ha liliu ne fakaleleiʻi.
Naʻe fakatapui e fuofua ʻapisiasi ʻi ʻĒsiá, ʻi Siapani ʻi he 1964.
Ko e Kau Taki Māʻolunga hako Siapaní ʻoku kau ai ʻa ʻEtinī Y. Komatisū (1923–2011), ne fāʻeleʻi ʻi Hauaiʻi; Sam K. Shimabukuro (1925-2015), fāʻeleʻi ʻi Hauaiʻi; Iosihiko Kikusi, tuʻunga mālōlō fakalāngilangi; Koichi Aoyagi, tuʻunga mālōlō fakalangilangi; Takashi Wada; mo Kasuhiko Iamasita.