Sotavi ni Rarawa

iVakatakilakila

icons

Eliu se emuri, era na sotava na gone na rarawa, se e voleka ki vale se yawa sara. Ia “ni yavavala tu mada na vuravura wavokiti keda, e rawa ni da ciqoma na veivakalougatataki ni vakacegu e loma.”¹ Oqo eso na ka ko rawa ni cakava mo vukea kina na gone me vakila na vakacegu koya.

Tudei

Ni yaco e dua na ka rarawa, era dau vakila na gone ni vaka e vakatatiki nodra vuravura. Mo ivakaraitaki ni yalodei vei ira. Vosa malua ka yalodei baleta na ka e yaco. Maroroya na ivakarau ena kena levu ko rawata. Cakava na ka kece ko rawata me vakayacori tiko ga na lotu ni matavuvale, vuli ivolanikalou, masu, kei na ka matau ki na matavuvale. Kei na gauna, o ira na gone e rawa ni ra vulica ni yavalati mada ga nodra vuravura, na kosipeli e kauta mai na raimatata ka toso ga na bula.

Vakarokoroko

Vakaraitaka na vakarokoroko ki na ka era vakila na gone. Rogoci ira na gone ka ciqoma na ka era vakila. Vakaraitaka vei ira ni o sa taura vakabibi tiko nodra kauwai. Solia vei ira na galala ke ra gadeva ia laiva mera kila ni ko tu voleka ena gauna era via veitalanoa kina. Sauma vakadodonu na taro eso ni ra yaco mai ena sala ni yabaki-veidonui. Laivi ira na luvemu mera kila ni ra rawa tu ga ni vosa vei iko baleta nodra rere kei na kauwai.

Veidusimaki

E rawa ni ra taroga na luvemu, “Na cava e vakatara kina na Kalou me yaco na veika ca?” Vakamacalataka ni veigauna vinaka kei na veigauna ca era tiki ni bula ka tiki ni ituvatuva tawamudu ni Kalou. E vakatara O Koya me cakava na tamata yadua na nona dui digidigi, ia eso na gauna na tamata e caka digidigi cala ka vuna na rarawa. Eso tale na gauna, na rarawa e sega ni nona cala e dua ia e tiki ga ni veikabula. Ke cava ga, na Tamada Vakalomalagi edau tiko ga baleti keda. Ena Nona veivuke, e rawa ni da vuli ka tubu, mai na veika mosimosi mada ga eda sotava. E rawa ni da gole Vua me kune vakacegu.

Vakaukauwataki

Vakaraitaka vei ira na gone ni tu vei ira na kaukauwa me ra caka veisau ena nomu solia vei ira e dua na sala mera veivuke kina. Me ivakaraitaki, e rawa ni ra veivuke mera soqona na soli baleti ira na vakaleqai e gauna ni leqa, sikova e dua ka tauvimate se itokani mavoa e valenibula, vakamarautaka e dua ka sotava nona mate e dua na matavuvale, se masulaki ira ka ra ogaoga tiko. E sega ni rawa ni da walia na ka kece, ia e tu vei keda na rawaka meda cakava e levu na ka vinaka, ka “da cakacaka ki na vakacegu ena gauna kece eda vukea na laveti ni nona rarawa e dua tale.”²

Vakacegu

Vakananumi ira na luvemu ni lomani ira na Kalou ka ko lomani ira. Kakua ni soli iyalayala lasu ni na sega na ka ca ena yaco vei ira, ia vakadeitaki ira ni ra taqomaki tiko oqo ka ko na cakava na ka kece ko rawata mera taqomaki. Vakadeitaki ira ni Tamada Vakalomalagi ena vukei ira mera lako sivia na ka dredre cava ga e takosovi ira mai.

Ni ko kunea ni ko sa vakayalolailaitaki mai na leqa, nanuma ni emuri, na vinaka ena qaqa ki na ca. “Eda sa tavusoya tiko na ivalu kei na ivalavala ca, ia e sega ni dodonu meda taqaya,” a vakatavulica o Peresitedi Thomas S. Monson (1927–2018). “Oqo e dua na ivalu eda rawa ka na qaqa kina. Sa solia mai vei keda na Tamada mai Lomalagi na iyaragi me da rawata kina. E tu ena iuli O Koya. E Sega na ka meda rere kina.”³