Taro kei na Kena iSau

“Ena veivuke vakacava na noqu veivakalougatataki vakapeteriaki meu vakatulewa?”

“Na veivakalougatataki vakapeteriaki sa dua na ivakatakila vei koya e soli vua, ni sa vaka e dua na laini vulavula e lomadonu ni gaunisala, me veitaqomaki, veivakauqeti, ka vakayaloqaqataka na itaviqaravi kei na ivalavala dodonu. Na veivakalougatataki vakaoqori e lewena na iwase eso mai na nomu ivola ni veika tawamudu e tu mo rawata. …

“… Sai koya e dua na Liaona ni rarama me dusimaki iko vakadodonu sara ki na nomu itikotiko mai lomalagi.”

Peresitedi Thomas S. Monson (1927–2018), “Your Patriarchal Blessing: A Liahona of Light,” Ensign, Nov. 1986, 65, 67.

Na Noda Dui Liaona

Na veivakalougatataki vakapeteriaki sa dua na sala e na vukei keda kina na Tamada Vakalomalagi meda kila o cei oi keda mai na bula mai liu, bula oqo, kei na kena e tawamudu. Ni da sa kila na tolu na dina cecere oqo me baleti keda sara ga, sa na vukei keda meda kila kina na ituvatuva ni Kalou me baleti keda. Eda sa kila tu o cei oi keda, na vuna eda tiko kina eke, kei na vanua eda na lako kina. Me vaka ni Liaona a cakacaka ga ena vakabauta kei na gugumatua nei Nifai kei na nona matavuvale ena nodratou muria tiko na veidusimaki ni Liaona (raica na 1 Nifai 16:28), sa rawa talega vei keda meda yalodina ka gugumatua meda muria na ivakasala mai na noda dui Liaona, ni na dusimaki keda ki na keda icavacava vakalou.

Elder Utai, yabaki 20, Argentina Salta Mission

E Dua na Rai Tawamudu

Ena gauna au dau sega kina ni rawa meu vakatulewa, au dau gole ga ki na noqu veivakalougatataki vakapeteriaki ka tugana na kena ivakatakila vakalou. Sa qai dau rawarawa kina meu vakatulewa. Sa vukei au kina meu gugumatua ena bula oqo ka tamusuka na veivakalougatataki yalataki, ia au vakananumi talega kina meu vakarautaki au meu curuma kilikili ena dua na siga na matanitu ni Turaga. Sa dau vukei au meu tubu ena vakabauta, nuitaka na lewa ni Turaga, ka bula voli ena dua na rai tawamudu.

Abegail F., yabaki 18, Cagayan Valley, Philippines

iVakasala Vakalomalagi

Na noqu veivakalougatataki vakapeteriaki sa vakasalataki au mai kina na Tamada Vakalomalagi. Kevaka au muria na ivakasala o ya, au kila niu na ciqoma na ivakatakila ena vakatulewa meu cakava. A sauma eso na noqu vakatataro ni se bera mada ga niu taroga.

Cami H., yabaki 16, Utah, Amerika

Vakarorogo ki na Yalotabu

Ke o vakasaqara tiko mo vakacegui ka dusimaki se isau ni taro buta katakata, sa rawa mo masulaka ena yalodina ka wilika na nomu veivakalougatataki vakapeteriaki ena vu-ni-yalomu taucoko, ka vakarorogo vua na Yalo. Sa veivuke talega na vakasaqaqara ena ivolanikalou. Au vakabauta ke o cakava oqo ena vakabauta vakaidina, ena sauma mai na Turaga, ena Nona gauna ga, ena sala vinaka duadua.

Kezia B., yabaki 15, Hawaii, Amerika

Kalougata Yalataki

Na veivakalougatataki vakapeteriaki sa tukuna vei keda na ka e gadreva na Kalou me vakalougatataki keda kina. Sa dau vakaroti keda ka vakamacalataka na sala meda vakataki Koya cake kina. Ni da sa kila na veika sa vakarautaka tu na Kalou me noda kei na sala meda rawata kina, eda na digitaka ka cakacakataka meda ciqoma.

Hunter H., yabaki 18, Utah, Amerika

Na vei isau ni taro e nakiti me veivuke ka vagolea na noda rai, e sega ni kakaburaki vakaivola ni ivunau ni Lotu.

Na Cava Nomu Nanuma?

“Na cava beka o na kaya ni ra sega ni vakabauta na nomu itokani ni a yaco dina na iMatai ni Raivotu?”

Vakauta nomu isaunitaro ka, kevaka e gadrevi, e dua na itaba totoka ni bera na 15 ni Noveba, 2019, ena liahona.lds.org (kiliki ena “Submit an Article” or Feeback). Se imelitaka nomu isau ni taro kei na itaba ki na [e-mail]. Me tiko kina na yacamu taucoko kei na nomu tabanalevu kei na iteki (se tabana kei na tikina).

Ena rawa ni moici na nomuni itukutuku me baleta na kena balavu se kena matata.

• Me vaka e dua na goneyalewa, e sa dodonu li meu vakanamata ki na vuli kei na cakacaka se sagai meu sa dua na marama vakawati ka tina?