Nomu Kune Vakacegu kei Ira na Tamata ena Gauna Veivakaleqai

Mai vei Alex Hugie kei Aspen Stander

Mekasini ni Lotu

Oqo e walu na sala mo vukei iko kei ira eso mera vakila na vakacegu ni dau dredre na bula.

iVakatakilakila

hands letting birds go

iVakaraitaki e muri kei na Droini mai na Getty Images

Eso na gauna sa dau veisau na bula mai cake ki ra mai loma ki tuba. O na rairai lomaleqataka na kauwai ni vuvale, na tauvimate, leqa mai koronivuli, se na veimataqali veivakaleqai sa tu e vuravura nikua. Eda na kunea vakacava na vakacegu kivei keda yadua ena vuravura leqaleqa oqo? E rairai nomu sega ni kune vakacegu e lako mai na veika o sega ni lewa rawa se mai na veika o rawa ni vakauqeta ka veisautaka, oqo eso na vakasama me na vukei iko mo kunea na vakacegu ni lomamu mai vei Jisu Karisito.

4 Na Sala Eso Mo Kune Vakacegu Kina

Vakanamata ki na ka tawamudu

E ka dredre toka meda yalo vakacegu ni da raica toka ga na leqaleqa ni gauna lekaleka. Ia kevaka mo vakanamata ki na iyaloyalo levu, na ituvatuva ni marau ni Kalou, sa rawa mo kune vakacegu ena nomu kila ni veika o rarawa kina nikua ena sega ni tawamudu. Me vakataka, ni na vukei keda na valetabu meda vakanamata ki na ka tawamudu. A kaya o Peresitedi Gordon B. Hinckley (1910–2008) ni na yaco e valetabu “mo kila e dua na vakacegu o sega ni kunea rawa ena dua tale na vanua.”¹
Laiva na veika o sega ni lewa rawa

Ni dua na ka o sega ni lewa rawa e kauta laivi na nomu vakacegu, ena veitemaki mo yalo nuinuica se cudru. Ia ena sega ni veivuke mo vakasamataka tiko na ka o sega ni veisautaka rawa. Ia, mo toro voleka vua na iVakabula mo kunea na vakacegu ni lomamu ena gauna mada ga ni cavilaki iko na bula oqo. Sa yalataka o Koya me tala mai na Dauveivakacegui, na Yalo Tabu (raica na Joni 14:26–27).
Vosoti ira na tamata

Sa dau ka dredre duadua meda kauta laivi o ya na yaloca ni lomamu ni dua e caka cala vei iko. Ia a vakavulica o Elder Dieter F. Uchtdorf ena Kuoramu ni iApositolo Le Tinikarua: “Eda na ciqoma na reki ni veivosoti ki na noda bula ni sa lomada meda solia wale yani na reki o ya vei ira na tamata. … Sa yaco kina, na Yalo ni Turaga me vakatawana na yaloda ena reki vata kei na vakacegu vakalou ki na yalo (raica na Mosaia 4:2–3).”² Na gole vua na iVakabula ena vukei iko mo sereki mai na lomaocaoca ka vakasinaiti ena vakacegu.
Veivutuni ka vakararavi vei Karisito

Se cava ga e lako vinaka tiko ena nomu bula, ia ni ko cola voli tiko na oga ni ivalavala ca ena butakoca na vakacegu ni yalomu. Eso na gauna eda na gadrevi noda bisopi me vukei keda meda veivutuni vakaidina. Ia sa gadrevi ena veigauna meda veivutuni tikoga ena Veisorovaki i Jisu Karisito, ka meda savasava mai na ka kecega sa dau tarova noda yaco meda vakataki Koya.

4 Na Sala Meda Vukea Eso Mera Kune Vakacegu

Wasea na kosipeli i Jisu Karisito.

Me vaka ga ni da rawa ni kune vakacegu ena noda vakanamata vua na iVakabula, sa rawa meda dusimaki ira eso ki Vua ni sa “vu ni sautu” (Mosaia 15:18). Me vakataka, mo wasea e dua na ivolanikalou se vosa mai na koniferedi raraba a vukea mo vulica vakalevu na veika baleti Jisu Karisito.
Mo dua na dautataro

Vukei ira na nomu itokani se tacimu mera walia na veivakacacani. Me vakataki ira na Anitai-Nifai-Liai ena ivola i Alama, sa rawa meda buluta na noda iyaragi ni valu—na iyaragi me vakataka na kakase, sosomitaka na ca, se kocokoco—ka veisautaka ki na iyaya ni vakacegu: vosa yalololoma, talairawarawa ki na ivakaro ni Kalou, ka vosoti ira na tamata (raica na Alama 24:19).
Mo tamata dauvakarorogo.

Eso na gauna o ira na tamata era sasaga bula tiko sa gadrevi mera talaucaka na nodra nanuma kei na lomadra ka kakua ni maroroya tu e lomadra. E sega ni gadrevi meda walia na nodra leqa, ia sa rawa meda rogoca na nodra kauwai ka veitokoni, ka vakaraitaka na loloma Vakarisito ka yalololoma.
Veiqaravi vei ira ena nomu tabanalevu kei na itikotiko raraba

Sa rawa mo volodia ena vale ni vakaloloma, mo gonevuli qasenivuli, se kau iloloma mai ki na matavuvale vou ena nomu itikotiko raraba. Vukei ira na tamata mera kune vakacegu ena veika lalai. Me tiko e dua na vanua tudei ni kana kei na moce, e dua na dauveituberi nuitaki, se dua na veivakadeitaki lailai ni dua e kauwai tiko ena rawa me yaga sara vakalevu.

A cavuta o Jisu na vosa oqo ni vakacegu kivei ira kece era sasagataka tiko mera kunea na vakacegu: “Au sa laiva vei kemudou na vakacegu, au sa solia vei kemudou na noqu vakacegu, au sa sega ni solia vei kemudou me vaka sa solia ko vuravura. Me kakua ni rarawa na yalomudou se rere.” (Joni 14:27). Kevaka meda na kauti keda kei ira na tamata vakavoleka vei Jisu Karisito, sa rawa meda kunea na vakacegu ena gauna mada ga ni dredre na bula.