iTabagone Qase Cake
Caka Vakatulewa: Digidigi vs. iVakatakila
Na dauvolaivola e tiko mai Utah, Amerika.
Ni yaco ki na vakatulewa lelevu, e vakacava na levu ni noda gadreva na vakararavi vua na Kalou me tukuna vei keda na cava meda cakava?
Droini mai vei David Green
Ena veisiga ko ikeda eda na sotava yadua e levu na vakatulewa. Eso e ka wale tu ga, na vaka, “Na cava meu daramaka?” “Na cava beka meu kania ena vakasigalevu?” “E sa gauna beka meu volia kina e dua na motoka vou, se e rawa niu taura tiko vakalailai na ka makawa?” Ia sa dau vakawasoma ni da sotava e dua na vakatulewa levu—“Meu lesu tale li ki vuli?” “Meu taura beka na cakacaka oqo?” “Meu toki beka ki na dua na siti vou?” “Meu volia beka e dua na vale?” “Me keirau veigadivi beka kei na tamata oqo?” “Me keirau veiwatini beka kei na tamata oqo?” ka vuqa tale.
Ni da na matai ena vakatulewa lelevu, e rawa ni da—e veidodonui—meda taura e dua na gauna balavu cake me caka vakatulewa. Eda muria na ivakasala ka a soli vei Oliver Cowdery ena Vunau kei na Veiyalayalati 9:8—9, ka kaya kina na Turaga:
“Ia, raica, au sa kaya vei iko, sa dodonu mo vakasamataka vakavinaka ena nomu vakasama; oti e dodonu mo qai taroga vei au kevaka e sa dodonu, ia kevaka e sa dodonu, au na vakauqeta na yalomu ka na katakata mai na lomamu; o koya ko na qai vakila sara ni sa dodonu.
“Ia kevaka e sega tiko ni dodonu, ko na sega ni vakila e dua na ka; ia ko na guilecava ga na nomu gagadre.”
E dina ni oqo e ivakasala vinaka dina, ia ni yaco mai na vakatulewa lelevu, eso na gauna eda rui vakararavi vakasivia sara ki na tikina e tukuna kina vei keda na Kalou na ka e dodonu ka sega ni vakarauta ki na tikina ka tukuna kina O Koya vei keda meda vakasamataka vakavinaka ena noda vakasama. Eda laki lobo tu ena waraka tiko na Kalou me vakadeitaka na noda vakatulewa ka vakatara na veimadigi vakaitamera me lako siviti keda. E rawa sara beka ga ni da kidava na itavi ni digidigi, ia eda rerevaka na caka digidigi ka na kauti keda tani mai na sala ka tu ena noda “ituvatuva” vakasamataki rawa ka tini ni da nanuma cala ni ka kece e sega ni katakata mai lomamu se domo mai lomalagi e baleta ni cala noda vakatulewa. E levu vei keda, na lomaleqa tawatukuni oqo vei rau na digidigi kei na ivakatakila yadua e veimuataki ki na dua na taro laulau: Na cava na itavi ni Kalou me vukei keda meda caka vakatulewa?
Na iTavi ni Kalou ena Noda Caka-Vakatulewa
E rairai ni taro oqo ena sereki vinaka duadua mai na italanoa ni taci Jereti. E tiko e dua na ivakarau veimaleleti ni tubu ena italanoa oqo ka vakatavulici keda baleta na sala ka namaka vei keda na Kalou ena caka vakatulewa. Ni oti na vakasesei ni vosa mai na Valececere e Pepeli, a kerei tacina ko Jereti me taroga na Turaga se mera sa biuta na vanua, ia ke vaka koya, e vei mera lako kina (raica na Ica 1:36–43). E a laki taroga ko taci Jereti, ka tuberi ira na Turaga ki matasawa. Ni ra lako tu, sa vosa tiko vei ira na Turaga ena dua na o ka dusimaka na ikalawa yadudua ni nodra ilakolako. Era qai tini sara ki matasawa, ka ra tiko mai kina me va na yabaki.
Ni mai cava na va na yabaki, a tukuna na Kalou vei taci Jereti me tara eso na waqasogo ka vakavakarau me kosova na wasalevu. Ni sa kila na taci Jereti ni na sega na cagi e waqa, e muria na ivakarau kilai vata ga ni lako vua na Kalou me taroga na ka me cakava. E namaki, ni sauma na Turaga ni solia vua na ivakasala matailalai me cakava na qara eso ena deladra kei na botodra na waqa. Raica na ivakarau ni ivakatakila e yaco mai: E solia na Kalou vei ira e dua na ituvatuva, era taroga vakayacori vakacava na ituvatuva, ka sauma na Kalou ena isaunitaro matailalai ka deivaki.
Ia ni sa vakaqarataki ira oti na waqa, a liaca ko taci Jereti ni na sega na cina vei ira ena waqa. E vakadua tale me taroga na Kalou na cava me cakava. E a sega ni sauma, ia, a taroga na Kalou, “A cava ko vinakata me’u kitaka me ra rarama kina na nomudou waqa?” (Ica 2:23). E sega mada ni soli ivakasala matailalai O Koya me vaka e liu, oqo e waraki taci Jereti na Turaga me lewa na cava e via cakava.
Na mataqali isaunitaro vakaoqo mai vua na Turaga e rairai dredre duadua me tauri ni tovolei tiko me caka e dua na vakatulewa. Eda vakatavulici meda masu ka waraka na kena isau, qai ka matau ni da lomaleqataka ni da sega ni rogoca na kena isau. Sa dau vakawasoma ni da nanuma ni kena sega na isau matata e sa vakaraitaka ni “guilecava ga” ka vakaraitaka ni cala noda digidigi. Eso tale na gauna eda nanuma de ibalebale ni da sega ni yalododonu rauta me rogoca na isau se eda sega ni kerea tiko “ena yalo dina” (raica na Moronai 10:4). Ia e dua tale na ikatolu ni digidigi ka dau vagauna ni da sega ni nanuma—ka rairai, me vaka na taci Jereti, e waraki keda tiko na Kalou meda cakava vakataki keda noda vakatulewa.
Cakava e dua na Vakatulewa
Au qai sotava ga e dua na ituvaki ka bolea na sala ni noqu nanuma baleta na digidigi kei na ivakatakila yadudua. Ni sa voleka tiko ni cava ni koronivuli ni tauriivola, au ciqoma e vica na isolisoli ni cakacaka duidui ena siti e duidui kau sega ni rawa ni vakatulewataka evei meu taura. Me vaka na taci Jereti, au a sa sotava e vuqa na gauna kau a masu me baleta e dua na vakatulewa levu ka a sauma mai na Kalou ena isau ka bau deivaki. Niu vakararavi tiko ki na veika sotavi e liu koya, au tekivu masu ka kerea na Kalou me vukei au meu vakatulewataka na cakacaka meu taura. Au sa cakava tale tiko ga na noqu tikina ena vulici baleti ira na madigi ni cakacaka yadudua ka taro ivakasala vei ira e levu na tamata. Ia e dina ga niu masu tiko vakalevu se lolo, e vagagalu tu ga na lomalagi, kau sega ni ciqoma e dua na isau.
Ni vakarau na gauna yalataki meu cakava kina na vakatulewa sa roro mai, kau sa tekivu taqaya. E dina ga ni oqo na mataqali vakatulewa ka dodonu me kauwaitaka na Turaga, qai cava ga e sega ni sauma mai kina? E rairai e sega ni kauwaitaka na cakacaka au digitaka, ia e dodonu me kauwai baleta ni siti cava au toki kina baleta ni sega ni vakatitiqa ni na vakayaco ka ki noqu bula, E dau kauwai na Turaga ki noqu bula ena gauna eliu, ia ka na sega vakacava ni kauwai talega ena ka oqo O Koya?
Ia e vakacava ga na kaukauwa ni noqu saga, e sega na isau e lako mai. Au tekivu leqataka keu sa rui ciri vakayawa mai vua na Kalou meu sega ni rawa kina ni rogoca Nona isaunitaro. Au leqataka talega keu sa sa sega ni rawa ni rogoca baleta ni noqu vakasama e loma e sega ni vinakata me rogoca na isaunitaro. Kena itinitini, e vo e dua na siga mai na gauna yalataki, au kila ni dodonu meu cakava na digidigi. Ena bogi oya au masu walega, kau kerea ke rawa ni tukuna vei au o Koya ke cala noqu isaunitaro. Ni sa sega ni dua na isau, au sa toso ga ka taura na cakacaka.
E vica na yabaki ki muri, au se vakataroga tiko ga na noqu digidigi, kau kerea kina e dua na veivakalougatataki vakabete meu ciqoma na veivakadeitaki. Ena veivakalougatataki a tukuni vei au niu a sega ni ciqoma e dua na isau ni noqu masu baleta ni Turaga e marautaka e dua ga na vakatulewa au cakava. Na veivakalougatataki oqo e vakadeitaka na ivakasala ka solia e liu vei au na noqu peresitedi ni kaulotu, ka a tukuna vei au ni vakawasoma ni sega sara ni bibi na vakatulewa eda cakava. Na Kalou e vinakata meda vulica meda tucake vakacava vakaikeda e yavada ruarua ka vakatulewataka eda na bulataka vakacava na noda bula. E a vakananumi au talega na noqu peresitedi ni kaulotu ni Kalou, ni sa Tamada Vakalomalagi, ena sega ni totogitaki keda ka kauta tani na madigi yalataki kevaka eda tovolea yalodina me da vakasaqara na ka meda kitaka.
Na taci Jereti e rairai rawa ni vakatututaka e dua beka ga na iwali ni cinavi ni waqasogo, ka na donu ga vua na Turaga. Na vuli ni ka sotavi oya e sega walega ni vakaukauwataki ni vakabauta nei taci Jereti ia me vulica talega me cakava e dua na vakatulewa.
Vakayacori ni Digidigi
Mai na dua na rai tawamudu, na vakayacori ni digidigi e dua na tiki bibi ni tubu yadudua. Ke sega oqo, eda na sega ni rawa ni cakava na vakatulewa ka na vukei keda meda yacova na noda iyacoyaco kece. Na tubu, me vaka na ka kece ena kosipeli e lako mai “ena vosa ena vosa, na vunau ena vunau” (2 Nifai 28:30). E vinakata na Kalou meda tamata vakarau, ka sega ni tamata paralase, ka namaka o Koya meda vakayagataka na noda digidigi meda bulataka na noda bula ena kena vinaka duadua eda rawata.
Ni da sa vulica rawa ga meda kunea na veiraurau ena digidigi kei na ivakatakila, eda sa rawa ni sotava na tubu vakayalo dina. Oqo na ka a yaco vua na taci Jereti. Ni sa vakasamataka oti, a cakacaka me vakawaicalataka e 16 na vatu mai na vatudei e dua ka kerea na Kalou me tarai ira ka cakava mera serau mai (raica na Ica 3:1–5). Gauna oqo, ni sauma mai na Kalou, sa veisau na ka kecega. E a sega ga ni a rogoca na domo ni Kalou ena dua na o, ko taci Jereti a raica sara ga na Turaga, ka sega walega ni rairai vakatamata ia a vakaraitaka talega vua na taci Jereti na raivotu kurabuitaki eso ni vuravura kei na veika kece ka na yaco mai (raica na Ica 3:6–26). E rawa ni sega ni vakarau vakayalo ko taci Jereti me ciqoma na raivotu oya kevaka e se sega taumada ni sotava na tubu yadudua ka lako mai na cakava nona vakatulewa vakataki koya.
Ni da sa caka vakatulewa eso, e dodonu sara meda muria na ivakasala i Alama meda “vakarorogotaka vua na Turaga na ka kecega [eda] kitaka” (Alama 37:37). Ni sa gadreva na Turaga meda cakava e dua na vakatulewa bibi, ena vakatara o Koya meda kila ka na vukea meda kua ni lako sese. Ia e dodonu meda tu vakarau talega meda tu cake ka toso ki liu ena vakabauta, ke yaco se sega na isau. Ke sa yaco tiko ga ni da muria tiko na ivunau ka tiko dei ki na kosipeli i Jisu Karisito, eda na rawa ni vakila na nuidei ena noda vakatulewa dodonu kei na vakacegu ni na marautaka na Turaga na noda igu eso.