Na Veisureti vei Ricardo

Martin Apolo Cordova

Paraná, Brazil

Droini mai vei Katy Dockrill

Niu dau rogoca baleta e dua na itaviqaravi ena Lotu, au dau sureta e 10 na tamata ka ra sega ni lewe ni Lotu me tiko. Au sa cakava oqo ena vuqa na yabaki. Au dau cakava na veisureti ka biuta ena waqaniivola vulavula ka masulaka na Yalotabu me dusimaki au. Kau qai veisoliyaka na veisureti. E dau vakavudua sara me 10 e tiko, ia ke dua walega e tiko, au vakila niu sa gumatua.

Ena vica na yabaki sa oti, au a vakarautaka e tini na veisureti ki na dua na soqoniirara baleti ira na veiwatini. Au veisoliyaka e ciwa vei ira na cakacaka ka vo tu e dua. Au sega ni kila meu solia vei cei. Ena vica na miniti ka tarava, ko Ricardo, e dua na dauveivoli, a lako sivita noqu desi. Au vakila niu uqeti meu sureti koya, e dina ga ni sa vakasuka e dua na veisureti mai vei dua na cakacaka vata me tiko ena dua na soqo ena nona lotu. Au sega ni nanuma ni na malele kina o Ricardo.

Ia ni lakosivia tale na noqu desi me lako ki tuba, au vakila tale na veivakauqeti. Ia, e curu totolo ki tuba kau sega kina ni kunea na gauna meu vosa vua. Au masu me lesu tale mai o Ricardo kevaka au a dodonu meu solia vua na veisureti.

Ni oti na noqu masu, a lesu tale mai ko Ricardo me tarogi au e dua na taro. Ni oti, au a kaya, “Ricardo, na noqu lotu e vakayacora tiko e dua na itaviqaravi baleti ira na vakawati. Keimami na veiwasei ena veika sotavi baleta ena rawa vakacava me bula marau e veisiga. Ni oti, ena caka na danisi. Kevaka au sureti iko, ko na rawa ni lako mai?”

“Sa donu!” E kaya ko Ricardo, ia na nona isaunitaro e sega ni vukici au.

“Ke lailai au sa bau cakava noqu itavi,” au vakasamataka.

Keirau yaco totolo kei na watiqu ki na itaviqaravi me kidavaki ira na yaco mai. Vakasauri, au raici Ricardo kei watina, o Regina. Au vakaveikilaitaki rau kei na watiqu kei ira na tani ka ra tiko. Na balavu taucoko ni yakavi, ko Ricardo kei Regina e vaka ni rau marautaka tiko. Au a kurabui ni rau kaya ni rau na lako mai ki lotu ena Sigatabu me vuli vakalevu cake.

Ko Ricardo, ko Regina, kei na rua na luvedrau e ratou vuli vakalevu cake. E qai yaco, ni ratou curu ki na Lotu. Emuri, eratou vauci ena valetabu. Ena dua na gauna a tukuna vei au o Ricardo ko koya kei na watina erau a veivosakitaka tiko na sere, ia ka qai muataki Ricardo na Turaga ki na noqu valenivolavola.

Au sa kerea oti na Kalou me vosoti au niu nanuma ni na sega ni ciqoma o Ricardo na veisureti. Au sa vulica ni ka bibi me sureta na tamata kecega. Ko na sega ni kila ko cei ena ciqoma.