Noda iTikotiko, Noda Matavuvale
Na Luvei Keirau Tagane e Luvena na Tamada Vakalomalagi
E vakaitikotiko na dauvolaivola mai Arizona, Amerika.
Na vosa ka sega ni noqu e curu ki na noqu vakasama: “Ko nanuma li ni ko lomani koya cake vakalevu mai vei au?”
iTaba kei dauvolaivola kei luvena tagane
Na luvei keirau tagane kamica, o Hayden, e lako mai ki vuravura ka karakarawa tu, sega ni cegu, ka domo bula tiko. Sega na tagi. Sega na yavala.
Ni ra kusa yavoki tiko na vuniwai kei na nasi ena rumu ni valenibula, au kila ni dua na ka e cala rerevaki. Ko na watiqu kei tamaqu erau solia totolo vei Hayden e dua na veivakalougatataki ni matabete, ka kusataki yani ko Hayden ki na veiqaravi bibi. E totolo sara ni kunei ni tiko vua e dua na tuvakaca vakavudua ni uto. Ena loma ni vica na siga e lako curuma kina o koya e vica na veisele ni uto.
Mai na kaukauwa mana ni veivakalougatataki ni matabete, na lolo, kei na masu, a vakacala o Hayden na nanuma ka bula mai. E vuabale na neirau marau ni keirau kauta mai na neirau gonetagane ki vale ka tekivu na neitou bula vou vata.
E kauta mai o Hayden na marau tawakilai rawa ki na neirau bula. Keirau karona ka marautaki koya. Ia ni toso tiko na gauna, au tekivu leqataka ni sega ni toso tiko me vaka e namaki. E dina ni ra veivakadeitaki na kenadau ni na qai tobotobo ga mai o koya, na lomaleqa laulau e tiko ga niu ogavaka meu vukea noqu gonetagane.
Keirau vuli kei na watiqu me kila na veika kece keirau rawata baleta na mate nei Hayden. Keirau kitaka na ka kece era tukuna na vuniwai me keirau cakava. Ia na toso ki liu e sega ni lako mai.
Sa tuburi au na wawale kei na rarawa. Au kerekere vua na Tamaqu mai Lomalagi me vukei au meu kunea e dua ka rawa ni vukei Hayden, ia e sega ni yaco mai na veivuke. Na ituvaki kei Hayden e sa toro sobu ga. Sa tekivu me yaco vua na kida. Keirau sa rere. Keirau nanuma ni keirau sa na vakayali koya.
Dua na bogi, au a yadra sivia ena vaqara iwalinileqa. Au vola vei Hayden e dua na ivola. Au tukuna vua na levu ni noqu lomani koya kei na kaukauwa ni noqu saga me rawarawa na nona bula. Au yalataka niu na taura na vo ni noqu bula meu tovolea meu kunea na veivuke e gadreva.
Na tuburi rarawa kei na veilecayaki e luvuci au vakalekaleka. Au tekiduru ka tarogi Tamaqu Vakalomalagi, “Baleta?” Au nanuma ni a talai Hayden mai vei au o Koya baleta ni kila o Koya niu na sega ni druka ni tovolea me vukea noqu gonetagane. Ia ka cava ga kau sega ni kunea kina e dua na iwali? Na cava e vuniwai vou yadudua kei na veiqaravi vou yadudua e mua ki na dua tale na sala sogoti. E sega li ni lomani Hayden ko Tamada Vakalomalagi?
Au na sega ni guilecava rawa na tiki ni gauna oya. E dua na luvuci ni vakila na loloma e ovici au vakasauri. Na vosa ka sega ni noqu e curu ki na noqu vakasama: “Jerlyn, ko nanuma li ni ko lomani koya cake vakalevu mai vei au?”
Au vesuki. E tu vakadua na gauna. E drodro na wai ni mataqu—sega ni tuburirarawa vaka eliu, ia mai na inuinui, kila sara, kei na loloma.
Ena gauna e dua oya, sa veisau na ka kecega. Sa malumu na lomaqu. Sa veisau na noqu taro. Au sa kila sara oqo ni Tamaqu mai Lomalagi e lomani Hayden ena loloma uasivi. E a talai mai ke o Hayden ena dua na yago ka sotava na nona gagadre kei na nona madigi me tubu ka vuli. E tiko na nona icaba duadua ni rawaka kei na dredre, me vakai keda yadua. Sa yaco meu kila ni ko ira na gone ka tu na nodra malumalumu era ka talei ka gone lomani nei Tamada Vakalomalagi ka tu na nodra ilesilesi uasivi ena vuravura oqo.
Ko na watiqu kei au keirau dau ciqoma wasoma na isaunitaro kei na veivakalougatataki, ia era yaco mai ena gauna ni Turaga, sega ni neirau. Keirau sa muataki kina vei ivola dodonu, na veiqaravi, koronivuli, kei na qasenivuli me vukei Hayden me gumatua ena nona bula vakayago. Keirau guta me vakasaqara na sala ka biuta tu na Tamada mai Lomalagi me baleti Hayden ka sega ni o koya keirau vinakata me lakova. Keirau sa cakava tiko na veika kece keirau rawata me vukei Hayden me rawata na nona iyacoyaco vakalou ka bulataka na bula ka nakita vua na Tamana Vakalomalagi. Na neirau kila sara na ituvatuva nei Tamada Vakalomalagi e sa matata sara vakalevu cake oqo ni keirau sa kila sara ni ko Hayden a Nona ni bera ni neirau ko Hayden.