Niu Raica Ni Lagasere ko Ta

Maria Oka

California, Amerika

Droini mai vei Allen Garns

Au a tiko ena noqu kaulotu e Honolulu, Hawaii, Amerika me rauta ga e va veimama na vula ni a yacovi au e dua na ninini levu ka emuri e qai kunei vakavuniwai ni manumanusoni. Na veivula ka muria e kauta mai na siko ki valenibula, e tawa wili na vakadidike, ka dua na wainimate vou ka tu na kena revurevu vakatuburarawa.

Ni yaco ekea, au a se vakanamata sara tu ga ena cakacaka vakaulotu ka se sega niu vakila na vakanananu ki vale, ia mai na gauna ni noqu ninini, sa mosi tu ga na yaloqu. Au nanumi rau noqu itubutubu kau galili e dina ga niu wavokiti mai vei ira na tamata daumaka, veikauwaitaki. Au sega ni via lako ki vale, ia au via vakila na vakacegu.

Ena nona veivakadonui na peresitedi ni kaulotu, au a vosa vei rau na noqu itubutubu ena talevoni baleta na mequ wainimate. Na tamata, ka se qai rawata ga na nona tadra ni bulataucoko me lewena na Tabernacle Choir e Temple Square, e vakadeitaki au ni na lagata na yalona taucoko vei au ena koniferedi raraba, ka na tekivu ena siga ka tarava.

Ena mataka ka tarava, au masu vagumatua baleta na vakacegu kau gadreva vakabibi. Au sa dau ciqo isau ni taro vakabibitaki ena koniferedi raraba e liu, kau vakanuinui niu na rawa ni ciqo veituberi tale. Ni qai dola ga na koniferedi, e lagata na matasere na “Sa Voleka na Kalou” (Sere ni Lotu, naba 49). Ena imatai ni miniti, au a raici tamaqu ena mata ni TV. E a toro voleka na itaba ki matana ena vica na gauna.

E a vakawai na mataqu niu vakila ni ologi au e dua na vakacegu vakaitamera. Au a kila ni lomani au na Kalou. E kila vakavinaka O Koya na ka au gadreva ena siga oya—e dua na veivakadeitaki rawarawa ni voleka O Koya ka kila tiko baleti au. Au vakila na loloma ni Kalou, ka semati yani, na loloma ni noqu vuvale, noqu itokani, kei na noqu peresitedi ni kaulotu. Me isosomi ni vakila ni vakaicolacola, au raica oqo e dua na madigi meu tubu voleka kina vua na Turaga.

E sega ni yali na veibolei ni noqu bula. Au sa na biuta koso na noqu kaulotu e dina, ia au kila ni tiko ekea na Kalou ka lomani au Ko Koya. Na veivakadeitaki oya e sa muri au kosova e levu na mosiniyalo ka sa solia vei au na inuinui ena noqu gauna butobuto duadua. Eso era na rawa ni vakatoka me ka yaco vakavudua, ia au kila ni noqu raici noqu ta ni lagata na loloma ni Kalou e sa dua na cakamana lailai ena gauna ni noqu gagadre.