Na Digidigi: Me Dua na Daudroini Cecere se Dua na Tina Cecere?

Mai vei Jenedy Paige

Era tukuna vei au na tamata kecega ni sega ni rawa ni da cecere ena ka ruarua. Esa vaka dina li?

Au nanuma niu a sega soti ni lomavinaka niu vulica mai koronivuli na nodra bula na daudroini cecere. E kena irairai ni o ira era vakairogorogo ka vakasakiti era yaco me daudroini cecere ena nodra vakawalena nodra matavuvale ka vakasabusabutaka na nodra yalomatua. O ira na daudroini cecere era a droini ena mataka ni Siganisucu ni ra dolava na luvedra nodra iloloma. E dua a vakamau vakaono. E dua tale e cebeta na daligana ka vakauta vei ira nona daulomani. Ka dua tale e vakamatea sara e dua! Sa tekivu meu vakataroga kevaka e rawa niu dua na daudroini cecere ka dua na yalewa vakawati ka tina cecere (me yaco kece oqori kau yalomatua tiko!).

Era vakavulica na noqu parofesa ni kevaka keimami vinakata me keimami cecere, me keimami na solibula kina. Me keimami na cakacaka vakaukauwa cake sara mai vei ira na tamata kecega. Me keimami na vakaliuca na cakacakaniliga ena neimami bula. E dau taroga wasoma noqu vakasama, “Kevaka e dua na daudroini e muria na ivunau, vakaliuca na ka e dodonu me liu, ka tiko vua na Yalo ni Turaga me liutaka nona cakacaka, e sega beka ni na cecere talega ka rawa ni cecere cake sara?” A tu ga vei au na taro oqo ena gauna taucoko ni noqu vuli.

Ena gauna keirau qai tauri ivola kina kei na watiqu, sa oti e dua na yabaki na neirau sa vakawati tiko. A lako mai o Elder Russell M. Nelson (ena gauna oya, se lewena tiko kina na Kuoramu ni iApositolo Le Tinikarua), me mai vosa ena neimami taurivola. A muria e dua na ivakasigalevu, ka 16 ga na gonevuli era sureti me ra tiko kina. E matalia toka, ni keirau a digitaki ruarua kei watiqu me keirau tiko kina. Ni sa dolavi na veivosaki me ia na taro ka saumi. Au laveliga, raica na matai Elder Nelson, ka vakaraitaka noqu kauwai me baleta na daudroini ka tina ena gauna vata ga. Au sa cakacaka vakaukauwa meu tara cake noqu taledi mai koronivuli, kau vinakata meu tomana tiko na cakacaka vakaukauwa meu vinaka cake, ia au kila talega ni dodonu me liu na itavi vakatina. E tiko beka e dua na sala me rawa ruarua kina? E waqa na matai Elder Nelson ena nona sauma, “Io sara ga!” A vakayaloqaqataki au meu vakavinakataka cake noqu taledi ka masu vei Tamada Vakalomalagi meu vukei meu kila na ivakarau meu rawata ruarua kina, ka ni o Koya, ena vakavuna meu rawata na veika au nanuma tu ni sega ni rawa. Au tugana ki yaloqu na ivakasala oya.

Dei ena Nona iNaki

Sa va na luvei keirau kei watiqu ena gauna oqo. Keirau sa vulica na danisi kei na ciqociqo ni bula vakaitubutubu. Ena ivakatekivu, au dau tekivu ena levu na siga ena 4 ena mataka me rawa eso na droini ni ra se bera ni yadra na gone. Au tovolea meu droini ena ono na siga, kevaka sara mada ga e dau rawa ga e 30 na miniti ena so na siga. Au dau tekivuna na gauna yadua ni droini ena masu, niu kila ni sega soti ni levu na ka au na rawata ke sega na veivuke ni Turaga. Au sega walega ni masuta meu rawata noqu cakacakaniliga ia meu kila talega na cava na ka bibi duadua ena siga oya ka vakadeitaka meu vakaliuca na Nona inaki. E sega ni totolo na toso, ia e dei.

Me toso sara ki na 12 na yabaki mai na siga ni noqu taurivola. Au a sotava tiko e dua na gauna veivakayalolailaitaki. Vaka ni sa rui sinai na bula. Sa rui veibolei vakalevu cake na itavi vakatina mai na kena au a namaka. Au dabe tagitagi toka ena noqu vatavata ni droini, kau vakataroga se au na yaco dina meu daudroini cecere au a tadra tu. Au a vakauqeti meu dreta mai noqu ivolaniveisiga mai na vata, kau cega ki na veika au vola ena 30 ni Epereli, 2006, na siga ni oti noqu taurivola. Au sa guilecava vakadua na gauna vakasakiti oya vata kei Peresitedi Nelson! E vaka ni sa voleka ni vakayalia vakadua na covulaca ni bula na ka oya mai na noqu vakanananu. E tu qo e mataqu na nona vosa na parofita ni gauna oqo, “Io sara ga!” Sa vuki na wainimata me vakavinavinaka niu raica lesu na veika kece au sa rawata me tekivu mai na gauna oya, kau sa vakanamata talega ki liu ena vakanuinui.

Cakava na ka E Sega ni Rawa ni Caka

Ena vica na vula e muri, a qiriti au mai e dua na dautuvaka ni mekesini ena Ensign ka kerea ke rawa ni ratou vakayagataka e dua noqu droini ena loma ni waqa ni mekesini ni koniferedi raraba ni Noveba 2018. Au a vakadrukai sara ga! Niu tubu cake tiko, na imatai ni ka au dau cakava niu taura na mekesini ni Lotu sai koya meu vakacega ena sara droini. Oqo sa na tu kina e dua na noqu! Ia, ni tukuni vei au ni ratou vinakata me veisataki noqu droini kei na vosa nei Peresitedi Nelson, au raica na liga ni Kalou ni vakauqeti au tiko ki liu.

Se balavu sara na vanua meu lakova ena noqu ilakolako vakadaudroini, ia au vakavinavinakataka nona vakanuinui o Peresitedi Nelson vua na Turaga vakakina vei keda. Au vakavinavinakataka nona yalo ni vakanuinui kei na yalodei. Au kila ni da vakabauta na Turaga eda na rawa ni cakava na veika cecere, na veika sara mada ga eda a nanuma ni na sega ni rawa. “Ni na sega ni dredre vua na Kalou e dua na ka” (Luke 1:37).