Vakabauta na Veisereki ni iVakabula

Mai vei Peresitedi Henry B. Eyring

Karua ni Daunivakasala ena Mataveiliutaki Taumada

Mai na dua na vosa vakalotu, “Na Kaukauwa ni Veisereki,” a cauraki e Brigham Young University ena ika 15 ni Janueri, 2008.

Na Veisorovaki kei na Tucaketale ni iVakabula e solia Vua na kaukauwa me vakaukauwataki keda mai na noda dredre ka sereki keda mai vei ira.

image of the Savior with arms outstretched

Ki vei keda era sa yali eda dau lomana, na sala ki liu e rawa ni mosi ka galili—e vakalevu cake vei ira ka sega vei ira na kila kei na ivakadinadina ni Veisorovaki kei na Tucaketale ni iVakabula ko Jisu Karisito. Ko na nanumi rau na Nona tisaipeli vakatitiqa ena gaunisala ki Emeo. Na iVakabula tucaketale e toro voleka ka tarogi rau na cava erau rarawa kina. Ko Luke e solia vei keda na isaunitaro:

“A rau sa kaya vua, Na ka sa baleti Jisu na kai Nasareci, a parofita sa levu ena cakacaka kei na vosa ena mata ni Kalou kei na matadra kecega na tamata:

“A sa soli koya ko ira na bete levu kei ira na neimami turaga me lewai me mate, a ra sa vakota kina kauveilatai.

“Ia keimami a nuitaka ni sai koya ga oqo ena vakabulai ira na Isireli” (Luke 24:19–21).

Eda dre vakacegu mai na kila kei na ivakadinadina ni sa iKoya ka a vakabulai Isireli. Ka sa iKoya ka “[gutuva] na ivau ni mate” (Mosaia 15:23). Ka sa iKoya ka sa yaco “me kedra isevu era sa moce tu” (1 Korinica 15:20). Ka sa iKoya e cakava me rawa na veiyalayalati ni valetabu ka vauci keda tawamudu vei ira ka “ka dau lomani tu, ka yali ga vakalailai!”¹

Ena gauna ni Siganimate oqo, au via wasea na tiki ni dua na itukutuku ni lotu kau a solia ena vica na yabaki sa oti me baleta na kaukauwa ni veisereki ni iVakabula. E vakaukauwataki au niu a vakarautaka kei na noqu solia. Au masulaka ni na vakaukauwataki iko ni ko wilika.

Na bula e cava koso vei ira na so ka na yaco ga vei keda kece. Eda na tovolei yadua ni da sotava nona mate e dua eda lomana.

E dua na siga sa oti au a sota kei dua na tamata au se raica ga ena mate nei watina. E a sota tawanamaki ena dua na ituvaki ni veimaliwai ni gade talei. E a matadredredre ni torovi au mai. Niu nanuma tiko na mate nei watina, au bulia vakamaqosa na veikidavaki matau: “Ko sa vakacava tiko?”

E seyavu na matadredredre, e tonawanawa na matana, ka tukuna malua, ena igu levu, “Au sa vinaka tiko. Ia e sa rui dredre.”

E sa rui dredre, me vaka e sa vulica e levu vei kemuni ka da na kila kece ena dua na gauna. Na tiki dredre duadua ni tovolei oya me da kila na cava meda cakava ki na rarawa, na galili, kei na yaluma eda vakila ka vaka ni dua na tikida e sa yali. Na lolosi e rawa ni kabi dei me vaka na mosi tamudumudu. Ia vei ira eso, ena rawa ni tu na yalo ni cudru se lewacala.

Na iVakabula e Kila na Noda Rarawa

Na Veisorovaki kei na Tucaketale ni iVakabula e solia Vua na kaukauwa me vakaukauwataki keda mai na noda dredre ka sereki keda mai vei ira. Mai na ka e sotava, e yaco kina me kila O Koya na noda rarawa kecega. A rawa Vua me kila mai na veivakayarayarataki ni Yalotabu, ia a digitaka me kila ga mai na veika a sotava sara ga vakai Koya. Sai koya oqo na itukutuku:

Ia raica, ena sucu mai vei Meri, e Jerusalemi, na nodra vanua na noda qase, ni sa goneyalewa savasava ko koya, sa ka talei ka digitaki, ko koya ena vakarurugi ka kunekune ena kaukauwa ni Yalo Tabu, ka na vakasucuma mai e dua na gonetagane, io, ko koya na Luve ni Kalou.

“Ena vosota na ka rarawa, na veivakararawataki kei na veivakatovolei kecega; a sa yaco na veika oqo me vakayacori kina na vosa sa tukuni, ni na colata ko Koya na nodra rarawa kei na nodra ivalavala ca na nona tamata.

“Ia ena mate ko koya, me tasereka kina na ivau ni mate sa vauci ira tu na nona tamata; ia sa ciqoma ko koya na nodra malumalumu, me vakasinaiti na lomana ena loloma cecere, me vaka na veika vakayago, me rawa kina ni vakila me vaka na veika vakayago na sala me vukei ira kina na nona tamata me vaka na nodra veimalumalumu.” (Alama 7:10–12)

O ira na tamata vinaka wavokiti iko era na tovolea mera kila na nomu rarawa ni sa takali e dua ko dau lomana. E rawa ni ra vakila talega na rarawa. Na iVakabula e sega walega ni kila ka vakila na rarawa ia e vakila talega nomu rarawa yadua ko vakila vakataki iko ga. Ka sa kilai iko vakaoti Ko Koya. E kila na Lomamu.

Sureta na Yalo Tabu

Na iVakabula e rawa ni kila na cava mai vei ira na levu na ka ko rawa ni kitaka ka na vinaka duadua vei iko ni ko sureta na Yalo Tabu me vakacegui ka vakalougatataki iko. E kila O Koya e vei ka vinaka duadua mo tekivu kina. E so na gauna oya mo na masu. Eso na gauna mo na laki vakaceguya e dua tani tale. Au kila e dua na yada ka tauvimate veivakaleqai ka vakayarayarataki me laki sikova e dua tale na yada. Au a sega ni tiko e kea, ia au kila deivaki ni Turaga e vakayarayarataka e dua na tisaipeli yalodina me dolele yani vua e dua tale ka oqo e rawa kina ni vukei rau ruarua.

E vuqa tu na sala ka rawa ni vukei ira kina na rarawa na iVakabula, ka donu vei ira yadua. Ia ko rawa ni vakadeitaka ni rawata O Koya ka na cakava ena sala ka vinaka duadua vei ira sa rarawa kei ira era wavokiti ira. E dua na ka dei ni sereki ira na tamata na Kalou mai na nodra rarawa oya ni ra na vakila na yalomalua vakagone e Matana. E dua na ivakaraitaki ni kaukauwa ni yalomalua lomadina e lako mai na bula i Jope (raica na Jope 1:20–22). E dua tale na ka dei, ka tu talega vei Jope, sai koya na vakabauta dei ni nona Tucaketale na iVakabula (raica na Jope 19:26).

Eda na tucaketale taucoko, wili kina ko ira na nomu daulomani ka ra mate. Na sotatale kei ira ena sega ni ka vakayalo ia ena yaco ena yago ka na sega sara ni mate se qase mai se yaco me malumalumu.

Ni rairai na iVakabula vei ira na Nona iApositolo ni oti na Tucaketale, a sega ga ni vakadeitaki ira O Koya ena nodra rarawa ia ko ikeda kece ka na rawa ni rarawa. E vakadeitaki ira kei keda vakaoqo:

“Dou vakacegu ga.

“Raica na ligaqu kei na yavaqu, sai au dina ga: tarai au, ka raica; ni sa sega ni vakalewena se vakasuina na yalo, me vaka dou sa raica vei au” (Luke 24:36, 39).

Na Turaga e rawa ni vakayarayarataki keda meda dolele yani ki na kaukauwa ni veisereki mai na noda rarawa ena sala donumaki keda duadua. E rawa ni da digia me qaravi ira na tani ena vuku ni Turaga. E rawa ni da vakadinadinataka na iVakabula, na Nona kosipeli, na vakasukai mai ni Nona Lotu, kei na Nona Tucaketale. E rawa ni da muria Nona ivunau.

Na veidigidigi kece oqori e sureta na Yalo Tabu. Sa ikoya na Yalo Tabu ka na vakacegui keda ena sala ka rauta na noda gagadre. Ia mai na veivauqeti ni Yalotabu, e rawa ni tiko kina vei keda na ivakadinadina ni Tucaketale ka matata na rai ki na sota tale lagilagi e muri. Au vakila na vakacegu oya niu raica sobu na vatuniibulubulu kei dua kau kila—e dua kau kila ni na rawa ena dua na siga emuri meu mokota e ligaqu. Niu kila oya, au a sega walega ni sereki mai na rarawa ia au vakasinaiti talega ena marau ni nanamaki.

Ke a tubu me tamata bula na tamata lailai oya, kea goneyalewa ka na gadreva na veisereki mai na dua tale na ituvatuva ni veivakatovolei. Ena vakatovolei ko goneyalewa me dei ena lomadina vua na Kalou mai na bolebole vakayago ka vakayalo ka lako mai vei keda kece. E dina ga ni yago e ibulibuli uasivi, na kena maroroi me yavala tiko e bolebole ka tovolei keda kece. Na tamata kece ena valuta curuma na tauvimate kei na kakana ni yabaki ni bula.

“Mo Yalo Malumalumu”

Na kaukauwa ni veisereki mai na noda dredre e sa tu. E cakacaka ena sala vata ga kei na sereki mai na dredre ka lako mai ena sotavi ni mate ni dua ka da lomana. Me vaka ga ni sereki oya e sega so ni dau vu ni nona vakabulai e dua ka lomani, na sereki mai na so tale na dredre e sega beka ni kena kau tani. Na Turaga ena sega beka ni soli vakacegu me yacova ni da sa vakatubura na vakabauta me caka digidigi ka na kauta mai na kaukauwa ni Veisorovaki me cakacaka ena noda bula. E sega ni lavaka oya O Koya baleta ni sega ni kauwai ia mai na loloma e vukuda.

E dua na veituberi me ciqomi kina na kaukauwa ni veisereki ni Turaga mai na veisaqasaqa ni bula a soli vei Thomas B. Marsh, ka a Peresitedi ni Kuoramu ni iApositolo Le Tinikarua. E yaco vua na vakatovolei dredre, ka kila na Turaga ni na sotava tale e levu cake. Oqo na ivakasala vei koya kau taura me noqu kau dulaka vei iko: “Mo yalomalumalumu; ena tuberi iko e ligamu na Turaga na nomu Kalou, ka sauma vei iko na nomu masu.” (Vunau kei na Veiyalayalati 112:10).

Na Turaga e vinakata tu ga me muataki keda ki na sereki mai na noda yaco me yalododonu. Oya e gadreva na veivutuni. Ka oya e taura na yalomalumalumu. Ia na sala ki na sereki e gadreva tu ga na yalomalumalumu ena ituvatuva ni Turaga me rawa kina ni tubera na ligada ki na vanua e vinakata O Koya me sivita noda leqa ka yaco ki na vakasavasavataki.

Na dredre a rawa ni vakavuna na yaloca se yalolailai. Na yalomalumalumu ka gadreva ko iko kei au me tuberi kedaru kina ena liga ni Turaga e yaco mai ena vakabauta. E yaco mai na vakabauta ni Kalou e bula dina tiko, ni Lomani keda O Koya, ka ni ka e vinakata O Koya—ke dredre dina beka—ena ka vinaka duadua vei keda.

Na iVakabula a vakaraitaka vei keda na yalomalumalumu oya. Ko ni sa wilika ni a masu vakacava O Koya ena Were mai Kecisemani ni a bitaki tiko O Koya ena dredre ena vukuda ka sivia na noda rawata me da kila se vosota, se vei au meu vakamacalataka. Ni nanuma Nona masu: “Tamaqu, kevaka ko ni sa vinakata, ni kauta tani vei au na bilo oqo: ia me kakua ni yaco na noqu lewa, me yaco ga na nomuni lewa.” (Luke 22:42).

E kila ka vakabauta Na Tamana Vakalomalagi, na Eloimi cecere. Sa kila ni ko Tamana e kaukauwa-taucoko ka lomavinaka tawavakaiyalayala. Na Gone ni Toko e kerea ena vosa malua—me vaka e dua na gone lailai—ki na kaukauwa ni veisereki me vukei Koya.

Yalo Qaqa ka Vakacegu

Ko Tamana a sega ni sereka na Luvena ni kauta tani na dredre. Me baleti keda e sega kina ni cakava oya, ia a vakatara O Koya na iVakabula me vakacavara na ilesilesi ka a lako mai me cakava. Ia eda rawa ni yalo qaqa ka vakacegu mai noda kila na veivuke ka vakarautaka na Tamada:

“A sa rairai mai vei koya e dua na agilosi mai lomalagi, a sa mai vakaukauwataki koya.

“Ia ni sa yaluma sara, sa masu vagumatua cake kina: ia na nona buno sa vaka na titiri ni dra sa lutu ki na qele.

Ia ni sa tucake tale mai na masu, ka yaco vei ira na nona tisaipeli, sa kunei ira ni ra sa moce ni sa rarawa na lomadra,

“Ka sa kaya vei ira, Dou sa moce ena vuku ni cava? tu cake ka masu, de rawai kemudou na vere” (Luke 22:43–46).

A masulaka na iVakabula na veisereki. Na ka a soli Vua e sega ni dua na dro tani mai na dredre ia na vakacegu e rauta me lako sivita ena lagilagi.

Na Nona ivakaro vei ira na Nona tisaipeli, ka ra sa vakatovolei tiko mada ga, e idusidusi vei keda. E rawa ni da vakadeitaka meda muria. E rawa ni da vakadeitaka me da tu cake ka masu ena vakabauta levu kei na yalomalumalumu. Ka rawa ni da muria na ivakaro ka kuri ena ivola ni Marika: “Tu cake, meda lako” (Marika 14:42).

Mai na ka oqo, e sa tu kina vei iko na ivakasala mo rawata kina na vakatovolei vakayago ka vakayalo ni bula. Ko na gadreva na veivuke ni Kalou ni sa oti na nomu cakava na ka kece ko rawata vakai iko. Oqo mo tucake ka lako, ia mo taura na Nona veivuke ena kena totolo ko rawata, ka sega ni waraka na leqa me qai kere sereki.

Au soli ivakadinadina tabu ni bula tiko na Kalou na Tamada ka lomani keda. Au kila o ya. Na nona ituvatuva ni marau e maucokona, ka sa ikoya e dua na ituvatuva ni marau. Sa vakaturi cake tale ko Jisu, ka na vakakina koi keda. E a rarawa Ko Koya me rawa ni vukei keda ena noda dredre kece sara. E sauma O Koya na isau ni noda ivalavala ca kece kei na nodra na luvena kece na Tamada Vakalomalagi ka me rawa ni da sereki mai na mate kei na ivalavala ca.

Au kila ni ena Lotu i Jisu Karisito, na Yalo Tabu e rawa ni lako mai me veivakacegui ka savai keda ni da sa muria na iVakavuvuli. Mo ni ciqoma mada na Nona vakacegu kei na veivuke ena gauna ni nomuni gagadre, ena gauna kece ni tovolei kei na dredre ni bula.