Caka Veiqaravi Rekitaki

Na veiqaravi ena loloma e kauta mai na reki vei rau ruarua e solia kei koya e ciqoma.

Ena so na gauna na noda vaqara marau ena bula oqo e rawa ni vaka na cici tiko ena misini ni vakaukauwa yago. Eda cici ka cici ka da vakila tiko ni da sega ni yaco ki na dua na vanua. Vei ira eso, na vakasama ni veiqaravi vei ira na tani e vaka walega ni soqona tiko e levu na ka me caka.

Ia na Tamada Vakalomalagi e vinakati keda meda sota marau ka sa tukuna vei keda “ia sa sucu na tamata me rawata na marau” (2 Nifai 2:25). Ia e a vakatavulica na iVakabula ni veiqaravi vei ira na tani e dua na tiki bibi ni noda kauta mai vakacava na reki ki na noda bula kei na nodra bula na tani.

Na Cava Na Reki?

Na reki e sa vakaibalebaletaki ni “dua na vakila ni lomavinaka levu kei na marau.”¹ O ira na parofita edaidai era sa solia na veivakamatatataki se lako mai vei na reki ka na kunei vakacava. “Na reki eda vakila e vakalailai sara mai na ituvaki ni noda bula ka sa yaco ena ka kece e tu ena vakanamata ni noda bula,” a kaya o Peresitedi Russell M. Nelson. “… Na reki e lako mai ka baleti [Jisu Karisito]. O Koya na ivurevure ni reki kecega.”²

Na Veiqaravi e Kauta Mai na Reki

Ni sa kania o Liai na vuanikau ni vunikau ni bula, e sa vakasinaita na yalona “ena marau sa levu sara” (1 Nifai 8:12). Na nona gagadre taumada me wasea na vuanikau oqo vei ira ka dau lomana.

Na noda yalorawarawa me veiqaravi vei ira na tani e rawa ni kauta mai na reki vakaoqo vei keda kei ira. E vakatavulica na iVakabula vei ira na Nona tisaipeli ni vuanikau ka da vuataka ni da sa sema ki Vua e vukea me yaco me sinai nomudou marau (raica na Joni 15:1–11). Ni da cakava Nona cakacaka ena veiqaravi ka vakasaqara me kauti ira mai na tani ki Vua e rawa ni ka sotavi marautaki (raica na Luke 15:7; Alama 29:9; Vunau kei na Veiyalayalati 18:16; 50:22). E rawa ni da sotava na marau oqo ena loma mada ga ni veisaqasaqa kei na rarawa (raica na 2 Korinica 7:4; Kolosa 1:11).

E vakaraitaka vei keda na iVakabula na ivakaraitaki uasivi duadua ni dua na ivurevure levu duadua ni marau dina ena bula vakayago e kune ena veiqaravi. Ni da veiqaravi vei ira na tacida kei na ganeda me vaka na iVakabula, kuri ena loloma uasivi kei na loloma e lomada, eda na vakila na reki ka uabaleta na marau rawarawa ga.

“Ni da karona na [veiqaravi] ena yalorawarawa, eda yaco … me vakataki ira na tamata i Saioni ka da vakila na reki e veilaveti kei ira era veivuke tiko ena salatu vakatisaipeli,” vakatavulica o Sister Jean B. Bingham, Peresitedi Raraba ni iSoqoqo ni Veivukei.³

E Rawa Vakacava Me Da Cakava Na Veiqaravi Me Marautaki Cake?

E vuqa tu na sala me kau mai kina na marau levu ki na noda veiqaravi. Oqo eso na kena vakasama:

Kila na nomu inaki ki na veiqaravi. E vuqa tu na ibalebale ni veiqaravi. Na kena itinitini, na noda igu e dodonu me veisotari kei na inaki ni Kalou “me ra tucake tale mai na mate na tamata kecega, ka rawata na bula tawamudu” (Mosese 1:39). Ni da ciqoma na veisureti nei Peresitedi Russell M. Nelson meda vukei ira na tani ena salatu ni veiyalayalati, eda na kune marau ni da vakaitavi ena cakacaka ni Kalou.⁴ (E levu cake ena inaki ni veiqaravi, raica na “iVakavuvuli ni Veiqaravi: Na iNaki Ka Na Veisautaka Na Noda Veiqaravi,” ena Janueri 2019 Liaona.)
Cakava na veiqaravi me baleti ira na tamata sega ni itavi. “Sa vakatavulici keda o Peresitedi Thomas S. Monson: “Na nomu cakava me vinaka e dua na leqa me kakua ni bibi cake mai na nomu lomana e dua na tamata.”⁵ Na veiqaravi e baleta ni da lomani ira na tamata, sega ni veika meda cakava. Ni da sa tubu me loloma me vaka na iVakabula, eda na dola tu vakalevu ki na marau ka lako mai ena qaravi ira tiko na tani.
Cakava Me Rawarawa Na Veiqaravi. A kaya kina o Peresitedi M. Russell Ballard, Peresitedi Vakatawa ni Kuoramu ni iApositolo Le Tinikarua: “Na veika lelevu era tekivu mai ena veika lalai ka rawarawa.… Na noda cakacaka ni veiqaravi ni caka vinaka lalai ka rawarawa ena dua na bula sa vakasinaiti tu ena lomana na Tamada Vakalomalagi, ena cakacaka ni Turaga o Jisu Karisito, kei na yalo ni vakacegu kei na marau ena veigauna eda dodoliga yani kina kivei ira tale eso.”⁶
Kauta tani na lomaocaoca mai na veiqaravi. E sega ni nomu itavi mo cakacakataka na nona vakabulai e dua tani tale. Oqori e tiko ga vua na tamata yadua kei na Turaga. Sa noda itavi meda lomani ira ka vukei ira mera vuki vei Jisu Karisito, o koya ka nodra iVakabula.

Kua ni Biuta Tani na Marau Ni Veiqaravi

So na gauna era dau tusuka na tamata mera kerea na veivuke gadrevi, sa rawa ni noda dulaka yani na veiqaravi e ka era gadreva sara tu ga. Ia meda surevaki keda yani vei ira na tamata e sega talega ni iwali. Kerea na veivakadonui ni bera na veiqaravi e vakasama vinaka.

E talanoataka o Elder Dieter F. Uchtdorf ena Kuoramu ni iApositolo Le Tinikarua baleta e dua na tina taudua ka tauvi chicken pox—ka qai tauvimate talega o iratou na luvena. Sa yaco na vale dau savasava tu ga me kabuwacara ka duka. Era veibini cake na iyaya ni kana kei na isulu duka.

Ena dua na gauna ni vakila o marama ni sa luvuci taucoko, oi rau na tacina ena iSoqosoqo ni Veivukei erau a tukituki mai e nona katuba. Era sega ni kaya, “Qai vakaraitaka vei keimami ke rawa ni keimami veivuke.” Ia ni rau sa raica na ituvaki, erau cariba yani ka cakacaka.

“Erau vakasavasavataka na kabuwacara, ka kauta mai na rarama kei na yalodei ena loma ni vale, ka qirita e dua na itokani me kauta mai na kakana gadrevi vakalevu. Ni qai mai oti na nodrau cakacaka ka vakamoce, erau biuta koto mai na tina gone ena yaloluluvu—luluvu ni vakavinavinaka kei na loloma.”⁷

Ko irau ruarua na solia kei na ciqoma erau vakila na marau.

Teivaka na Marau e Nomu Bula

Na kena levu ni marau, vakacegu, kei na yalodei eda rawa ni teivaka e noda bula, na kena levu ni noda rawa ni wasea vei ira na tani ni da veiqaravi tiko. Na marau e lako mai na Yalo Tabu (raica na Kalatia 5:22 kei na Vunau kei na Veiyalayalati 11:13). E rawa ni dua na ka eda masulaka (raica na Vunau kei na Veiyalayalati 136:29) ka sureta ki na noda bula. Oqo eso na vakasama meda teivaka kina na marau ena noda dui bula:

Wilika na nomu kalougata. Ni ko dikeva na nomu bula, vola ena nomu ivolagauna na veika sa vakalougatataki iko kina na Kalou.⁸ Raica na vinaka kece ka tu wavokiti iko.⁹ Yadrava na ka e rawa ni tarovi iko mai na nomu vakila na marau ka vola na sala eso ko rawa ni walia kina se mo kilai ira vakavinaka cake. Ena gauna ni Siganimate oqo, taura na gauna mo vakasaqara na sema e levu cake kei na iVakabula (raica na Vunau kei na Veiyalayalati 101:36).
Vakaitovotaka na vakasama titobu. E rawa ni kunei iko vakarawarawa cake na marau ena gauna vadirorogo ni vakanananu titobu.¹⁰ Vakarorogo voleka ki na ka e kauta mai vei iko na marau (raica na 1 Veigauna 16:15). Na gauna tani mai na vakauitukutuku e rawa ni gadrevi me vakaitovotovotaka na vakasama titobu.¹¹
Levea na vakatautauvatataki iko. E sa dau tukuni ni veivakatautauvatataki e daubutako ni marau. Ko Paula e a vakarota ni ko “ira sa vakarauti ira vakai ira, ka vakatautauvatataki ira vakai ira, era sa sega ni vuku” (2 Korinica 10:12).
Vakasaqara na ivakatakila yadua E a vakatavulica na iVakabula: “Ia kevaka ko na kerea ko na ciqoma na ivakatakila ena ivakatakila, na kila ka ena kila ka, me rawa ni dou kila na veika vuni ka veivakacegui—na kena ena kauta mai na reki, na kena ena kauta mai na bula tawamudu” (V&V 42:61).

Veisureti meda Cakacaka

Ko na rawa vakacava ni vakalevutaka na marau ko kunea ena nomu bula ena veiqaravi?