Tovolea Mada Eso na iVakarau Vou ni Siganimate
Ena Siganimate oqo, vakayagataka eso na gauna mo vakananuma kina na iloloma cecere duadua a bau soli mai.
iYaloyalo mai na Ni Sa Sucu Me Noda e Dua na Gone, mai vei Lynne Millman Weidinger
Sa dau vakasakiti cake tikoga na Siganisucu me dua na gauna ni vakacagicagi. Ia ke sega na veika a yaco taumada yani e liu eda marautaka kina na Siganimate, ena sega ni yaco na Siganisucu.
Ena dua na gauna a vakavulica o Peresitedi Gordon B. Hinckley (1910–2008), “Ena sega na Siganisucu ke a sega ni yaco na Siganimate. Na gonelailai o Jisu mai Peceliema ena dua walega na gone kevaka a sega na Karisito dauveivueti mai Kecisemani kei Kalivari, kei na qaqa ni Tucaketale.”1.
Oqo e vica na ivakarau vou o rawa ni cakava me ikuri ni nomu marau vakayabaki.
1. Laki Lagasere ni Siganimate
Mo biuta toka mada na marau vakanananu baleta na dia, ni lagalagasere ni Siganisucu sa baleti Jisu Karisito. Na Siganimate sa gauna vinaka ni sereivakatagi baleta na iVakabula, io, ena kena lagati e mata ni katuba vei ira na wekamu.
Ke sa lailai na vakasama, raica na “ulutaga” ni serenilotu ena “Siganimate” kei na “Veisorovaki” ena vuku ni sere. Ni dua na sere e marautaki kina o Jisu Karisito sa tautauvata kei na lagalagasere ni Siganimate.
2. Vosota e Dua
O sa dau vakavinavinakataka beka na isolisoli ni veivutuni? Na Siganimate e solia na madigi me vakasamataki vakabibi kina na noda solia na yalo vata o ya ni veivosoti vei ira na tamata.
E vakavulica o Jisu: “O koya, au sa kaya kina vei kemudou, ni sa dodonu mo dou veivosoti vakataki kemudou. …
“Ia koi au na Turaga au na vosoti ira ga kau sa lewa, ia koi kemudou sa kilikili mo dou vosota na tamata kecega” (Vunau kei na Veiyalayalati 64:9–10).
Tarogi iko mada: O cei beka o lomacataka tiko? Masuta na kaukauwa mo vosota na tamata o ya, ka laiva vua na iVakabula me kauta laivi na yalo rarawa oqori.
3. Cakava e Dua na Veivakamarautaki, Drama se So Tale na Soqo
Sa rawa mo vakarautaka e dua na ivakaraitaki ni Siganimate. E rawa talega me dua na wiliki ni ivolanikalou ena lotu vakamatavuvale se dua na soqo ni lagasere ni itikotiko raraba.
4. Sikova na Nodra iBulubulu na Daulomani
Ena vuku i Jisu Karisito, sa guce kina ko mate (raica na 1 Korinica 15:55). Na nomu gauna ena sikovi ni ibulubulu nei nomu daulomani me tugani kina na itukutuku cecere oqo.
Sa rawa mo wilika e cake eso na ivolanikalou talei e tukuna tiko na Tucaketale ni ko sikova na ibulubulu oqo. E vica (vei ira na vuqa) na ivolanikalou e rawa me laurai o ya na 1 Korinica 15:20–22; Alama 11:42–44; kei na Vunau kei na Veiyalayalati 88:14–16.
5. Mo Vinaka Cake Tale
iYaloyalo mai na Sa Sikovi Amerika o Jisu Karisito, mai vei John Scott
Na Siganimate e rokova na veika a yaco e Kecisemani, na ka a yaco e kauveilatai, na nona bula mai na mate na iVakabula ena ikatolu ni siga, ka qai veiqaravi me 40 na siga ni bera ni gole yani ki lomalagi.
Me kena ikuri, ni oti vakalailai nona lako cake ki lomalagi, a rairai o Jisu Karisito vei ira na Nifaiti ka qaravi ira (raica na 3 Nifai 11-28). Sa levu sara na ka me marautaki!
Vakacava mo tosoya na gauna ni nomu Siganimate? Me sa qai rekitaka vakabalavu e lomamu na cakamana ni Siganimate. Sasaga vagumatua mo bula Vakarisito vakalevu cake ena loma ni 40 na siga ni oti na Siganimate. Sa na veivakauqeti, ni ko raica na veisureti oqo nei Peresitedi Russell M. Nelson: “Vakatabuya e dua na nomu gauna ena veimacawa mo vulica na veika kece a kaya o Jisu ka cakava e volai tiko ena Veiyalayalati Makawa, ni sai Koya o Jiova ni Veiyalayalati Makawa. Vulica na Nona lawa sa volai tu ena Veiyalayalati Vou, ni sai koya na kena Karisito. Vulica na Nona vunau sa volai tiko ena iVola i Momani, ni sa sega tale na ivolanikalou sa vakatakilai vakamatata kina na Nona ilesilesi kei na Nona cakacaka vakalotu. Ka me vulici na Nona vosa sa volai tu ena Vunau kei na Veiyalayalati, ni sa tomana tiko me vakavulici ira na Nona tamata ena itabagauna oqo.”2
Na Nomuni iVakarau sa Wawa Tiko
E vakavulica o Elder Dieter F. Uchtdorf ena Kuoramu ni iApositolo Le Tinikarua, “Me da kila na siga bibi duadua ena itukutuku ni veigauna, sa dodonu me da lesu tale ki na yakavibogi oya voleka ni 2,000 na yabaki sa oti ena Were mai Kecisemani ena nona tekiduru o Jisu Karisito ena vakamamasu ka cabori Koya me isau ni noda ivalavala ca.”3
Na soqo bibi duadua ena itukutuku ni veigauna sa yaga sara meda tugana ena veiyabaki. Sa vukei keda kina na kena ivakarau, mai na kena sa tukuni oqo se dua tale na nomu o sa digitaka.
Na cava o na vakuria ena yabaki oqo?