O na kila beka vakacava na kedrau duidui na ivakatakila kei na nomu nanuma vakai iko?
iVakatakilakila
woman reading book
Cakacakaniliga mai vei Brian Kershisnik
Eda bula tiko oqo ena dua na vuravura sinai ena madigi. E noda na galala meda digia na noda dui tabana ni cakacaka, koronivuli, watida, e vei meda vakaitikotiko kina, kei na vuqa tale. E sa dua dina na veivakalougatataki ni noda itabatamata. Ia e yasa ka dua, e cakava me dredre cake ga na digidigi kece oqo baleta ni dredre me vakatulewa ni sa rui levu na salatu kei na madigi ka ra na mua ki na veika vinaka. Eda na digia vakacava na ka dodonu ni rui levu tu na madigi vinaka? Ni ko vakila na sese ka veilecayaki e loma ni cava ni vakatulewa oqo, mo kila ni Tamada Vakalomalagi e via tuberi iko. E rawa ni ko digia na salatu dodonu ka taura na vei isaunitaro ko qara tiko kevaka ko muria na Domona. Kidava e vosa vakacava vei iko o Koya, raviti Koya, muria na parofita, vosota mada, raibolebole vakalevu cake, ka vakabauta tiko, ia ena kena gauna ko na muataki ki na matanicagi dodonu.
—Vira Vashchenko, Kyiv, Ukraine
Ena noqu bula taucoko au sa raica e tuberi au vakacava na Turaga, kau kidava ni ka kece au rawata au vakavinavinaka kina Vua kei na Nona veituberi. Ena tikinigauna mada ga kau nanuma niu lako taudua voli, e muri, e cakava o Koya meu kila ka vakila ni a dau tiko ga kei au o Koya e kea. O ya na vuna au sa vakayaco lewa kina meu dau toso ga ki liu ena vakabauta, e dina mada ga niu vakila niu tu taudua. Vei au, na noqu salatu e sega soti ni dau matata ena so na gauna, kau sega ni dau raica na ka e waraki au e muri, ia au dau taura ga na ikalawa ni vakabauta, kau qai tekivu raica na rarama ka kidava na liga ni Kalou e noqu bula. Au kila ni sa lomani keda na Tamada Vakalomalagi kei na Luvena, o Jisu Karisito, ka Rau sa yalorawarawa me tuberi keda, ia e Rau namaki keda talega meda biuta vei Rau na noda vakabauta ka yavala ni da sa ciqoma na veivakayarayarataki ni Yalotabu.—
Indhira Mejia, Dominican Republic
Niu sa qase cake tiko, au sa gadreva meu vulica na vosa ni Yalotabu. E dau vosa vei au na Yalotabu mai na vakasama rawarawa. E sa taura eso na vakatovotovo me matau kina, ia ena gauna donu sa dau lako mai vei au na Yalotabu ena vanua vagagalu, me vaka na draiva ki cakacaka ena noqu motoka. Au kila ni sega ni noqu vakasama baleta na Yalotabu e vakawasoma ni dau lade mai niu sega mada ga ni vakasamataka tiko na ulutaga.
—Clarissa Mae Taylor, Utah, Amerika
Au nanuma ni dua na iwalewale kurabuitaki duadua meda rawata sa ikoya na rawaka meda kidava na vakasolokakana malumu ni Yalo Tabu. Na vuli ivolanikalou gumatuataki e sa biligi au ki liu meu rawata. Au dau vakabauta tu ga ni ko koya e vakasaqara vagumatua ena kunea; ka na ka vuni ni Kalou ena cereki e matana mai na kaukauwa ni Yalo Tabu (1 Nifai 10:19). Ena dua tale na ivosavosa, kevaka au via kidava na Yalotabu, au sega ni rawa ni laivi au meu muataki ki na vakasama tawayaga se na kauwai ni siga yadudua, ia meu dokoulu ga yani ki na cakacaka ka guilecavi au. E kea au sa qai rawata vinaka cake meu kidava na Yalotabu baleta niu sa tu vakarau kina. Ena sala vata ka sega ni soko rawarawa kina e loma ni cava e dua na waqa, eda sega ni rogoca rawa na Yalotabu kevaka eda sa kuitaki ena kauwai ni bula ka ra tu ena taudaku ni noda lewa.—
Emmanuel Borngreat Dogbey, Accra, Ghana
iVakatakilakila
couple
Ena neirau matavuvale lailai, keirau kidava na Yalotabu baleta na vakacegu keirau vakila, vakabibi ko watiqu kei au keirau duavata vakaveiwatini. Ni neirau vakasama ga vakai keirau, keirau sega ni vakila ni ka dina deivaki sara ga—e dau davo koto ga e ra na vakatitiqa se rere. Ia ni sa vakatakila, keirau dau vakila na vakacegu, kevaka mada ga keirau vaqara ibalebale ka sega taumada ni kena irairai ni vakaibalebale vakalevu. Ni keirau talemuria, ka vakacavara, keirau dau raica ni lutu ki vuna na veika ka yaco vinaka na ka kece. E kea keirau dau veiraici ga ka kaya, “Isa, oqo sa qai vakaibalebale!”
—Maryana Wright, Utah, Amerika
E dina ni da rawa ni ciqo ivakatakila yadudua ena sala duidui eso, e dua ga na ka e dina sega ni vakatitiqataki: e dau vosa vakawasoma vei keda na Kalou. Eda gadreva ga meda yalorawarawa meda soli igu me vakalevutaka na noda rawaka meda kidava ka rogoca kina na Domona. Me vaka e a vakasalataka o Peresitedi Russell M. Nelson: “Masulaka ena yaca i Jisu Karisito baleta nomu kauwai, nomu rere, nomu malumalumu—io, na gagano sara ga ni lomamu. Ka qai vakarorogo! Vola na veivakanananu e lako mai vei iko. Vola nomu vakila ka talemuria ena cakacaka ko vakayarayarataki mo cakava. Ni ko taleva tiko na ikalawa oqo ena siga ki na siga, vula ki na vula, yabaki ki na yabaki, ko na ‘tubu ki na ivakavuvuli ni vakatakila’” (“iVakatakila ki na Lotu, iVakatakila ki na Noda Bula,” Liaona, Me 2018, 95).