ʻI he Tatau ʻo e ʻOtuá

Ko e sinó. Ko ha meʻa fakaofo ia, ʻikai ko ia? Kuo tuʻo fiha nai haʻo fanongo ki ha pehē ʻe ha taha, “ʻEi, haʻu ʻo sio heni!”? Ko e hā pē meʻa ʻe hokó, ʻe ala fakaofo pe ʻe fakaoli pē, ka ʻoku tau feinga maʻu pē ke ʻilo pe ko e hā e meʻa ʻe lava ʻe hotau sinó ʻo faí.

Naʻe fakatupu kitautolu ʻi he ʻīmisi ʻo e ʻOtuá. ʻE founga fēfē haʻatau tauhi hotau sinó ʻi he hala ke hoko ʻo hangē ko ʻetau Ongomātuʻa Fakalangí? ʻE fēfē haʻatau fakaʻehiʻehi mei hono ngāue ʻaki hotau sinó ʻi ha ngaahi founga ʻoku ʻikai totonu ke tau fakahoko?

ʻOku kau e ngaahi fehuʻi ko iá ʻi he taha ʻo e ngaahi ʻuhinga ʻoku fakatefito ai e konga ki he toʻu tupú mo e kakai lalahi kei talavou ʻo e māhina ní, ʻi he akonaki fekauʻaki mo e sinó (vakai peesi 42 mo e 50). ʻI he māhiná ni, ʻoku mau fakahaaʻi e founga ʻoku fakaofo, maʻongoʻonga, pea fakalangi moʻoni ai ʻa e sinó. ʻOku ou ʻamanaki ʻe lava ke hoko e ngaahi pōpoaki ko ʻení ko ha maʻuʻanga tokoni ʻaonga maʻau mo ho fāmilí ʻi hoʻomou ako kau ki he toputapu ʻo e sinó.

ʻI he peesi 50, ʻoku fakalotolahiʻi ai ʻe Palesiteni Lāsolo M. Nalesoni kitautolu ke tau mapuleʻi e ngaahi holi ʻo hotau sinó, pea ke manatuʻi ʻoku ʻikai ko e taumuʻá pē ke maʻu e sinó pea ngata ai. ʻOkú ne akoʻi ʻoku ʻomi ʻe hotau laumālié ʻa e moʻui ki hotau sinó pea ko hotau ngaahi laumālié ʻoku nau fai e filí. ʻE lava ke ʻaonga e faleʻi fakaepalōfita ʻa Palesiteni Nalesoní ki he toʻu tupú mo e kakai lalahí fakatouʻosi.

ʻOku ou ʻamanaki ʻe tokoni atu e ngaahi lea ʻa Palesiteni Nalesoní mo e ngaahi pōpoaki kehe ʻi he makasini ko ʻení ke ke ongoʻi ʻa e tuí ʻi hono akoʻi mo fakamahinoʻi e meʻafoaki fakaofo ʻo hotau sino fakamatelié.

J. Ryan Jensen

Ngaahi Makasini ʻa e Siasí