Aʻu ki he Lotú
“Manatu maʻu ai pē kiate ia, mo tauhi ʻene ngaahi fekau” (Molonai 4:3).
“ʻOleva, ʻoku teʻeki ʻosi hoʻo kai pongipongí,” ko e Fineʻeikí ange ia. Ne tekeʻi atu ʻe he Fineʻeikí e fanga kiʻi peleti vesitapolo īkí ke ofi ange kia Suhiuka.
Ne sio hifo ʻa Suhiuka ki heʻene kai pongipongí. Naʻe tōmui ʻene teuteú! ʻOku angamaheni ʻaki hono tokoniʻi ia ʻe hono taʻoketé ke teuteu ki he lotú. Ka ne kei ʻi ha feituʻu ia ʻe taha, pea ne pau ke teuteu ʻa Suhiuka ʻiate ia pē he ʻahó ni.
Ne tali ange ʻe Suhiuka, “Sai ia Fineʻeiki.” Naʻá ne fakavave ke ʻosi ʻene kaí. Hili iá naʻá ne fāʻufua ki heʻene Fineʻeikí peá ne fakavavevave ki he matapaá.
Naʻe taʻofi ia ʻe he Fineʻeikí. “ʻOku ʻi hena hoʻo telefoní?”
Ne hiki hake ia ʻe Suhiuka. “ʻIo. Te u text ki heʻeku faiako Palaimelí kapau ʻe ʻi ai ha palopalema.”
“Kae hā ha falani māfana ke tui loto ʻi ho koté? ʻOku momoko.”
Ne fakaʻaliʻali ange ʻe Suhiuka hono falani māfaná ki heʻene Fineʻeikí.
Naʻá ne kamo ange leva. Ne fakavavevave atu ʻa Suhiuka ki he halá. Ne hanga ʻe he ngaahi ongo ʻo e koló ʻo ʻai ia ke ne malimali. Ne fakalata ʻaupito ke nofo ʻi ha taha ʻo e ngaahi kolo lalahi taha ʻi Kōlea Tongá.
Ka naʻe kei fakaʻamu pē ʻa Suhiuka ne ʻi ai hono taʻoketé. Naʻá na faʻa ʻalu fakataha maʻu pē ki he lotú.
Naʻá ne pehē loto pē, “ʻOku ou ʻiloʻi e halá.” Pea ne ʻikai fuoloa mei ai, kuó ne ʻi he tauʻanga pasi ʻuluakí.
Ka ko ia toko taha pē ne ʻi aí. Ko ha meʻa ngali kehe ia. Naʻá ne vakaiʻi hono uasí. Pau pē naʻá ne tōmui he pasí! ʻE toe tali leva ki he pasi hokó.
Hili ha ngaahi miniti siʻi, ne kamata ke fakatahataha mai ha kakai kehe. Ne faifai pea aʻu mai ha pasi lanu pulū maama. Ne kaka hake ʻa Suhiuka ʻi he sitepú, totongi e fakaʻulí, peá ne tangutu ki lalo.
Ta-tink!
Ne vakaiʻi ʻe Suhiuka ʻene telefoní ʻi he tatangi ʻa e text. Ko ʻene faiako Palaimelí ia.
“ʻOkú ke ʻi he pasí? Manatuʻi, kapau te ke hē, te mau ʻalu atu ʻo kumi koe!”
Naʻá ne malimali mo tali e text. “ʻIo. ʻOku ou heka ai he taimí ni.”
Ka ko e kiʻi heka pasi nounoú pē ia. Ko e pasi fika uá, ʻe heka ia ai ʻo laka hake he houa ʻe tahá.
Ne sio hifo ʻa Suhiuka ki he taimí peá ne fakafulofula. Ne ʻikai ke ne fie liʻaki lotu. Naʻá ne saiʻia ʻaupito ʻi he konga lotu he sākalamēniti kotoa pē ʻa ia ʻoku pehē ke “manatu maʻu ai pē kiate Ia.” Ne ʻuhinga ia ke manatu maʻu pē kia Sīsū. Pea ne fie fai ia ʻe Suhiuka.
ʻI hono fakaafeʻi ia mo hono taʻoketé ʻe hono mehikitangá mo e faʻētangatá ki he lotú he ngaahi māhina siʻi kuo hilí, naʻá ne feʻiloaki mo e ongo faifekaú. Ne akoʻi kinaua fakatouʻosi ʻe ʻEletā Kimi mo ʻEletā Muni fekauʻaki mo Sīsū. Ko e lahi ange e meʻa ne ako ʻe Suhiuka kau kia Sīsuú, ko e lahi ange ia ʻene manako ke fakakaukau kiate Iá.
Ta-tink!
Ne pehē mai e text, “Kuó ke ʻosi fetongi pasi?”
Naʻá ne tali atu, “Teʻeki ai.”
Ne ofi atu e pasí ki he hala ne fie maʻu ke hifo ai ʻa Suhiuka ʻo fetongi pasí. Naʻá ne fehuʻi ange ki he fakaʻulí pe kuo haʻu ʻene pasi fika uá.
Ne talaange ʻe he fakaʻulí, “Kuó ke tōmui koe ai. ʻOku tau mai e pasi hokó ʻi ha miniti ʻe 15.”
“ʻOi, ta ʻoku sai,” ko Suhiuka ange ia. “Mālō”
Hili haʻane fetongi pasi tuʻo ua, ne hū fakavavevave atu ʻa Suhiuka ki falelotu. Ne ʻosi tuku atu ʻe heʻene mehikitangá mo ʻene faʻētangatá hano nofoʻanga. Ne faifai pea aʻu mai!
Ne fakakaukau ʻa Suhiuka ki he meʻa kotoa naʻá ne fai ke aʻu ki he lotú. Naʻá ne fakakaukau ki he niʻihi ne nau tokoniʻi iá. Naʻá ne ongoʻi ʻoku fiefia e Tamai Hēvaní ʻi heʻene ʻi aí.
Ne fai ʻe Suhiuka ha kiʻi lotu fakalongolongo. “Fakamālō atu Tamai Hēvani ʻi he lava ke u haʻu ki he lotú he ʻaho ní.”