Peesi ʻe 150 ki he Tuʻapulelulú?
Tā fakatātaaʻi ʻe Anna Godeassi
Naʻá ku ʻi he tuʻunga fakamamahi taha ʻo ʻeku moʻuí. Kuo kole ʻe hoku uaifí ke ma vete hili haʻane liʻaki au koeʻuhi ko ha tangata ʻe taha. Naʻá ku taʻu 30 pea naʻá ku nofo mo ʻeku fineʻeikí. Ne ofi pē foki ke mole ʻeku ngāue maʻuʻanga moʻuí.
Ne ʻosi fakatokanga mai e ʻētita pule ʻo e nusipepa naʻá ku ngāue aí ʻo pehē, “Kapau te ke toe haʻu ʻokú ke huʻakavaʻia, ʻe tukuange ai pē koe he taimi pē ko iá.” Ne u fifili ʻi heʻeku foki ki ʻapí pe ʻe founga fēfē hano taʻofi ʻeku inu kava mālohí.
Hili pē iá, ne tuʻu mai ha ongo faifekau ʻo talanoa mai fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ku talaange ʻoku ʻikai ke u fie fanongo ki ai. Ka ʻi heʻeku hoko ko ha tokotaha faiongoongó, naʻá ku ongoʻi kuo pau ke u ʻoange kiate kinaua ʻeku kātí.
Hili ha ngaahi ʻaho siʻi mei ai, ne talamai ʻe heʻeku fineʻeikí ne ʻi ai ha ongo ʻAmelika ai ke ʻaʻahi mai kiate au.
Naʻá ne pehē mai, “ʻOkú na maʻu e taha ʻo hoʻo ʻū kātí.”
Ko e ongo faifekau tatau pē ia mei he ngaahi ʻaho siʻi kimuʻá. Ne mono mai kiate au ʻe ha taha ha tohitufa peá ne talanoa kau ki he Palōfita ko Siosefa Sāmitá. Pea mono mai ʻe hono hoá ha Tohi ʻa Molomona kiate au. Naʻá ne ʻeke mai pe te u lau ha ngaahi vahe ʻe niʻihi mei ai. ʻI heʻeku tali ke fai iá, naʻá ne toe sio fakamamaʻu mai mo fehuʻi pe teu lau ha peesi ʻe 150.
Ne u tali ange, “He ʻikai lava ia!”
Naʻá ne pehē mai, “Sai, te ma toe haʻu he Tuʻapulelulú.” Ko ha ngaahi ʻaho siʻi pē ia mei ai. Ne ʻikai ke u fakakaukau te u lava ʻo lau e ʻū peesi ko iá ʻi he taimi ko iá.
Hili e ngāue ʻi he ʻaho hono hokó, naʻá ku ongoʻi ha teke mālohi ke fekumi ki hoku ngaahi kaungāmeʻá ke mau ʻalu ʻo inu kava mālohi. Peá u manatuʻi e fakatokanga ʻa e ʻētita pulé mo e peesi ʻe 150 ne kole mai ke u laú. Naʻá ku ʻalu ki ʻapi pea kamata ke lau e Tohi ʻa Molomoná. Naʻá ku lau foki mo e tohitufa kau kia Siosefa Sāmitá.
Ne ueʻi ʻe he Laumālié hoku lotó ʻi heʻeku lau kau kia Siosefa Sāmitá. Naʻá ku ongoʻi foki e moʻoni ʻo e Tohi ʻa Molomoná ʻi heʻeku lau mo ako lahi ange fekauʻaki mo e Fakamoʻuí. Ne ʻohovale pē kuó u lau ha peesi ʻe 150. ʻI he ʻaho Tuʻapulelulú, ne toe foki mai e ongo faifekaú mo fehuʻi mai pe kuó u lau ia.
Ne u tali ange, “ʻIo! Kotoa e peesi ʻe 150!”
Naʻá ku fie maʻu ke toe ʻilo lahi ange! ʻI heʻena akoʻi au fekauʻaki mo e Lea ʻo e Potó, naʻá ku talaange kuó u mateuteu ke tuku ʻeku maʻu kava mālohí.
ʻI he Sāpate hono hokó, ko ʻeku fuofua ʻalu ia ki ha fakataha lotu ʻaukai mo e fakamoʻoni. Ne u vahevahe ʻeku fakamoʻoni ne toki maʻu kau kia Siosefa Sāmita mo e Tohi ʻa Molomoná. Hili ha ngaahi taimi nounou mei ai, ne papitaiso au pea hilifakinima au ko ha mēmipa ʻo e Siasí.
ʻI he taʻu ʻe 48 talu mei hoku papitaisó, kuó u feinga ke tauhi e ngaahi fekaú pea nofo ofi ki he Siasí. Naʻá ku toe mali peá u ngāue fakafaifekau mo hoku uaifí. Ne u tali ha ngaahi uiuiʻi ʻi he ngaahi taʻu kuo hilí. ʻOku ou lolotonga ngāue eni ʻi he temipalé. ʻOku ou fakamālō ki he ʻEikí ʻi he taimi kotoa pē ʻo ʻeku ʻi aí, ʻi hono fusi mai au mei he fakapoʻulí pea ʻomi au ki he māmá.