ʻUhinga ʻOku Ou Houngaʻia Ai ʻi Hoku Sino Hili ʻa e Feitamá

Fai ʻe Sandra Vanessa Vargas-Corvalan

He ʻikai toe tatau hoku sinó mo e tuʻunga kimuʻa pea toki fāʻeleʻi ʻeku pēpeé koeʻuhí ko e mafaofao hoku kilí mo e ngaahi piki mei he fāʻelé. Ka ʻoku ou houngaʻia ai.

ʻOku nofo ʻa e tokotaha naʻá ne faʻú ʻi ʻIutā, USA.

Kuo ʻi ai nai ha taimi kuó ke vakai ai kiate koe mo pehē: “Mani! Te u hā fakaʻofoʻofa ʻaupito kapau pē naʻe …”? Pe kuó ke fakafehoanaki nai koe ki he meimei taʻahine kotoa pē ʻi he mītia fakasōsialé? Kuó u fai ia. Ko e meʻa ia ne u fai ʻi he kotoa hoku ngaahi taʻu hongofulu tupú kimuʻa peá u toki mali ʻo feitamá. Naʻa mo e taimi ʻe talamai ai hoku husepānití ʻoku ou hā fakaʻofoʻofá, ʻoku ou pehē maʻu pē, “Kapau pē naʻe pehē ē mo ē … ,” te u hā mo ongoʻi lelei leva. Ka ʻi hono fakakātoá, ʻe ʻai nai kitautolu ʻe he ngaahi “kapau pē” ko iá ke tau ongoʻi lelei ange? ʻI hoku tūkungá, ne u ʻilo ko e fakaholó pē ʻa e kamataʻangá, hili ko iá te u maʻu mo ha meʻa kehe ke “fakaleleiʻi” ʻi hoku sinó ʻo hokohoko pehē atu ai pē.

ʻI heʻeku kei feitamá, ne u saiʻia he fōlahi mo fuopotopoto hoku foʻi keté! Ko e taimi ia ne u ʻiloʻi ai ʻoku ou fakaʻofoʻofa ʻi he founga pe ʻoʻoku—ʻoku tau pehē kotoa pē! Ne u fakatupu ha kiʻi laumālie ʻiate au, pea ʻoku ʻi ai ha meʻa ʻe toe lelei ange ai? Tuku ke u talaatu, ʻoku ʻi ai! ʻA ia ko hoʻo fuofua hoʻo pēpeé ʻi ho umá.

Naʻe toki fāʻeleʻi pē he taimi nounou mei heni ʻeku kiʻi pēpē fefine ko Sōfiá. Ne u palani maʻu pē mo fakaʻamu ke fakanatula pē ʻeku fāʻelé, taʻe ʻi ai ha faitoʻo ʻe fakaʻaongaʻi pea mo vave ʻeku fakaakeaké. Ka neongo ia, ne ʻi ai ha ngaahi faingataʻa lolotonga ʻeku langaá, pea naʻe iku ʻo fie maʻu ke tafa au ke toʻo ʻa e pēpeé. Ko hono moʻoní, ne u ilifia he tafá koeʻuhí ko au mo ʻeku kiʻi pēpē fefinē. Ne u ilifia foki ke ʻi ai ha piki ʻiate au.

Hili e tafá, ne fie maʻu ha taimi lōloa ke fakaakeake ai hoku sinó. Lolotonga e ngaahi uike mo e ngaahi māhina ko ʻení, ne ʻikai ke u fuʻu lava ʻo fai ha ngaahi ngāue fakatuʻasino, ka ko e meʻa pē ne u fie maʻú ke u fakamālohisino mo foki ʻo maʻu hoku sino kimuʻa peá u feitamá. Pea ʻi he ʻaho ʻe taha, ne mahino kiate au—ko hoku sinó ʻoku ʻikai kei tatau ia mo e tūkunga ne ʻi ai kimuʻa pea fāʻeleʻi ʻeku tama fefiné, pea pehē foki kiate au. Pea he ʻikai toe tatau hoku sinó pe ko au, mo e tuʻunga kimuʻa pea haʻu ʻa Sōfia ki heʻeku moʻuí. Pea ʻoku ou houngaʻia ai.

Kuó u saiʻia he mafaofao hoku kilí mo e piki ne tupu ʻi heʻeku feitamá, koeʻuhí ko e taimi kotoa pē ʻoku ou sio ai ki aí, ʻoku nau fakamanatu mai e hala fononga fakaofo kuó u fouá. Ko e fanga kiʻi fakaʻilonga iiki ko iá ko ha fakamanatu ia ʻo e tama fefine fakaʻofoʻofa kuo fakafalala mai ʻe he Tamai Hēvaní kiate aú. ʻOku fakafonu au ʻe he ngaahi fakaʻilonga ko ʻení ʻaki ha loto-houngaʻia, ʻo ʻikai koeʻuhí ko ʻeku tama fefiné pē, ka ki hoku sinó foki ʻa ia ʻokú ne lava ʻo fakahoko ha ngaahi meʻa fakaofo hangē ko hono fakatupu, fata, mo fāʻeleʻi ha pēpē moʻuí. ʻOku fakamanatu mai foki ʻe he piki ʻi hoku sinó e kei nofoʻia kitautolu ʻe he Fakamoʻuí, naʻa mo hotau ngaahi taimi faingataʻa tahá pe ʻi he ngaahi taimi ʻoku ʻikai iku ai e ngaahi meʻá ʻo hangē ko ʻetau palaní. ʻI he taimi ʻoku tau ilifia pe mamahi aí, ʻokú Ne ʻi ai, pea ʻokú Ne ʻafioʻi e meʻa ʻoku lelei taha kiate kitautolú.

Ki ha ngaahi faʻē tokolahi ʻi he māmani, fakakaukau ki ai: naʻá mou foua ha hala fononga mamahi kae liliu moʻui, ke ʻomi e fānau ʻa e Tamai Hēvaní ki he māmaní—ko hoʻo fānaú! He toki aʻusia fakaofo mo fakatōkilalo moʻoni ia ʻa ʻete kau ʻi ha ngāue maʻongoʻonga pehē ʻi he palani ʻo e fiefiá!

Kapau ʻoku faingataʻa kiate koe ke ke tali mo ʻofa ʻiate koe pē, te ke lava ʻo lotu ki ha tokoni. ʻOku finangalo e ʻEikí ke tau fiefia, pea ʻoku mahuʻinga ʻetau ʻofa ʻiate kitautolu peé ke tau maʻu ʻa e fiefia ko iá. ʻE tokoniʻi maʻu pē kitautolu ʻe he ʻOtuá ʻi he fanga kiʻi meʻa īkí, mo e ngaahi meʻa lalahí—ʻokú Ne ʻafioʻi e ngaahi meʻa ʻoku mahuʻinga kiate kitautolú. Kapau te ke lotu ke ʻiloʻi e founga ke ke ʻofa mo tali ai koé, te Ne fakahā atu e founga ke fakahoko ai iá.