Ko ha Fāmili ʻo Ha Kau Tau Kei Talavou
Fai ʻe Sisitā Michelle D. Craig
Tokoni ‘Uluaki ‘i he Kau Palesitenisī Lahi ʻo e Kau Finemuí
“ʻOku totonu ke mou ʻai kiate kimoutolu ʻa e huafa ʻo Kalaisí” (3 Nīfai 27:5).
Ne u ʻaʻahi ʻe taha ki ha fāmili ʻi Silei. Kuo pekia ʻenau tamaí ʻi ha fakatuʻutāmaki he māhina kimuʻa peá u ʻalu atú. Ko e taha ʻo e fānaú ko ha kiʻi tamasiʻi ko Penisimani. Naʻá ne taʻu 10.
Kimuʻa pea hoko e fakatuʻutāmaki ki he tangataʻeiki ʻa Penisimaní, naʻá ne fai ʻenau lēsoni efiafi fakafāmili ʻi ʻapí. Ne fekauʻaki ia mo e kau tau kei talavou mei he Tohi ʻa Molomoná (vakai, ʻAlamā 53:16–22; 56:42–57). Naʻá ne fakamatala ki heʻenau toʻá mo ʻenau falala ki he ʻOtuá.
ʻI he fanongo e fineʻeiki ʻa Penisimaní kau ki he fakatuʻutāmakí, naʻá ne fakakaukau ki he lēsoni ʻa Penisimaní. Naʻá ne talaange ki hono fāmilí, “ʻOku fie maʻu ke tau toʻa hangē ko e kau tau kei talavoú. ʻOku ʻi ai ha feinga tau ʻe taha kuo pau ke tau tauʻi.”
Ne faingataʻa eni ki he fāmili ʻo Penisimaní. Ne nau ongoʻi kuo mafuli ʻenau moʻuí. Ne pau ke nau hiki ki ha fale ʻe taha ʻo nofo mo ʻenau kui fefiné. Pea naʻe mātuʻaki ongo moʻoni e mole ʻenau tangataʻeikí. Ka ne nau ʻiloʻi te nau toe fakataha mo ia ha ʻaho. Naʻa nau fakakaukau leva ke nau hoko ko ha fāmili ʻo ha kau tau kei talavou. Ne talamai ʻe Penisimani kiate kimautolu, “ʻOku ou feinga ke u toʻa.”
Naʻá ku hū atu ki honau falé ʻi haʻaku fie fakafiemālieʻi kinautolu. Ka ko au naʻá ku mavahe ʻo ongoʻi kuo tāpuekina aú. ʻOku toʻa ʻa Penisimani mo hono fāmilí ʻi heʻenau fepaki mo e feinga tau ko ʻení. ʻOku ueʻi fakalaumālie au ʻe heʻenau tuí.
Te tau lava kotoa ʻo toʻa hangē ko Penisimaní. ʻOku ʻikai ʻuhinga e toʻá ke ʻikai ke tau teitei mamahi pe ilifia. ʻOku ʻuhinga ia ki hono maʻu ʻo e tui ʻe tokoniʻi kitautolu ʻe he Tamai Hēvaní ke tau foua e ngaahi taimi faingataʻá. ʻI he taimi ʻoku hoko mai ai e ngaahi meʻa faingataʻá, te tau lava ʻo fili ke falala kiate Ia. Te tau lava kotoa pē ʻo hoko ko ha kau tau kei talavou!