Na iVakavuvuli ni Veiqaravi

O Calata Tiko Beka na Tiki Bibi ni Veiqaravi Oqo?

Na veiqaravi sai koya mo “reki vata kei ira era reki” ena kena iwalewale vata ga o “tagi kina kei ira era tagi” (Roma 12:15).

iVakaraitaki nei Augusto Zambonato

Ni da vakasamataka na veiqaravi, e rawarawa me da vakasamataka na veivuke vei ira era vakaleqai tu. Eda tukuna na caka nodra iteitei o ira na yada, caka ivakayakavi vei ira na tauvimate, se soli ka vei ira era tosotoso dredre tiko. Eda nanuma na ivakasala nei Paula me da “tagi vata kei ira era sa tagi,” ia sa rauta tiko beka noda nanuma na imatai ni iwasewase ni tikina oya—me da “reki vata kei ira era sa reki”? (Roma 12:15). Na reki vata kei ira eda veiqaravi ena vukudra—se eda marautaka vata na nodra rawa ka se eda vukei ira me ra kune marau ena veigauna dredre—sa tiki bibi ni veiqaravi me vaka na iVakabula.

Oqo e tolu na vakasama e rawa ni veivuke (ka dua me levei) ni da tovolea me da vakanamata ki na vinaka e biuta ki na noda bula na Kalou.

1. Me Kila

E vukei keda o Bonnie H. Cordon, na Peresitedi Raraba ni Goneyalewa, me da kila ni da gadreva me da raica vei ira eda veiqaravi ena vukudra—sega walega na nodra icolacola kei na dredre ia na nodra kaukauwa, taledi, kei na qaqa talega. E kaya ni gadrevi me da “itokani vinaka ka dauveitokoni—e dua e kila vinaka na kedra ituvaki ka dau tokoni ira ena nodra vakanuinui kei na sasaga.”¹

Ena italanoa vakaibalebale ni sipi kei na me, e kaya na iVakabula o ira era na kunei ena Yasana imatau ka ra na taroga: “Na Turaga keimami a raici kemuni mada ninaica ni kemuni a viakana, ka vakani kemuni? se viagunu, ka vagunuvi kemuni?

“Se keimami a raici kemuni ni naica ni kemuni a vulagi, ka kauti kemuni ki vale?” (Maciu 25:37–38).

“Taciqu kei na ganequ, na vosa bibi sai koya na raici,” e kaya o Sister Cordon. “Ko ira na yalododonu era raici ira na gagadre tu baleta ni ra wanono tiko ka raica. E rawa talega meda mata veiwanonovi ki na veivuke ka veivakacegui, me veimarautaki ka tatadra.”²

2. Vakaraica na Veika me Marautaki

Marautaka na rawaka lelevu se lalai. E rawa ni bula mai na kenisa se ni ulabaleti na veisere, kunei e dua na cakacaka vou se kunei na ivava a yali, vula dua ni oti nona takali e dua na daulomani se oti e dua na macawa ena sega ni gunu suka.

Qiri mo veivakacaucautaki, solia e dua na kadi, se kauti koya ki vakasigalevu. Ena noda veiwaseitaka noda veivakalougatataki, bula ena vakavinavinaka, ka marautaka na nodra veivakalougatataki kei na rawaka ni tani, eda sa “marautaka na nodra reki ko ira na tani” (Alama 30:34).

Raica na Ligana na Turaga

Ena so na gauna na reki vata kei ira na tani e kena ibalebale me da vukei ira me ra raica na vuna me ia kina na reki—se cava ga na dredre se marau e curu mai ki na noda bula. Na dina rawarawa ni kilai keda tiko na Tamada Vakalomalagi ka sa tuvakarau me laveti keda e rawa ni dua na ivurevure uasivi ni marau.

E rawa ni o vukei ira na tani me ra raica na liga ni Turaga ena nodra bula ena nomu wasea na ivakarau o raica kina ena nomu. Vakamalumalumutaka na yalomu me rawa ni o wasea na sala a vukei iko kina na Tamada Vakalomalagi ena nomu gauna dredre. Na ivakadinadina oqo e rawa ni vukei ira tale eso me ra raica ka vakadinadinataka na Nona sa vukei ira (raica na Mosaia 24:14).

4. Kakua ni Yalana na Nomu Rawa ni Marau

E ka ni rarawa, ni so na gauna eda rawa ni yalana na noda rawa ni marau vata kei ira tale eso, vakauasivi ni da sega ni yalodei ena veika eda rawa ni solia se na noda ituvaki ni bula. Eda sega ni dau rekitaka na nona marau e dua tale, ka da dau mai tacori tu ena veivakatautauvatataki. Me vaka e vakavuvulitaka o Elder Quentin L. Cook ena Kuoramu ni iApositolo Le Tinikarua: “Na veidutaitaki ni veivakalougatataki ena vakasava tani na reki. Ena sega ni rawa ni da vakavinavinaka ka vuvu ena gauna vata ga.”³

“Me da ulabaleta vakacava na itovonibula ka voleka ni tu ena tamata kecega oqo?” e taroga o Elder Jeffrey R. Holland ena Kuoramu ni iApositolo Le Tinikarua. “… E rawa ni da wilika na noda veivakalougatataki e vuqa ka rawa ni da vakacaucautaka na nodra rawaka na tani. Uasivi duadua, e rawa ni da qaravi ira na tani, na ivakaukauwa uasivi duadua ni uto e bau kilai.”⁴ Me kua na veidutai, me da vakacaucautaki ira eda veiqaravi ena vukudra. Wasea ena yalogalala na veika o taleitaka me baleti ira se na nodra matavuvale.

Me vaka e vakananuma vei keda o Paula, eda sa tiki kece i Karisito, ia kevaka “sa dokai e dua na tikina, sa reki vata na tikina kecega” (1 Korinica 12:26). Ena veivuke nei Tamada Vakalomalagi, sa rawa ni da vakila na veika era sotava na tani, eda na marautaka na qaqa levu se lailai, vukei ira me ra vakadinadinataka na liga ni Turaga, ka ulabaleta na vuvu me rawa kina ni da reki vata ena veivakalougatataki, taledi, kei na nodra marau na tani.

iDusidusi

1. Bonnie H. Cordon, “Mo Yaco me Dua na iVakatawa ni Sipi,” Liahona, Nove. 2018, 75.

2. Bonnie H. Cordon, “Mo Yaco me Dua na iVakatawa,” 75.

3. Quentin L. Cook, “Rejoice!” Ensign, Nove. 1996, 30.

4. Jeffrey R. Holland, “E Dua Tale na Cidroi,” Liaona Me 2002, 64.

Nona iVakaraitaki na iVakabula

E dau rekitaka o Jisu Karisito na nodra marau na tani. A tiko ena vakamau mai Kena, a sega walega ni marautaka na soqo taleitaki oya ia a vukica na wai me waini (raica na Joni 2:1–11). E rawa talega ni da segata me da dau tiko ena veigauna taleitaki ena nodra bula o ira eda veiqaravi ena vukudra.

Eda raica talega ni dau rekitaka na iVakabula na nodra bula dodonu na tani. Ni sikovi ira na Nifai, a tukuna vei ira o Koya, “Ko ni sa kalougata ena vuku ni nomuni vakabauta. Ia raica oqo sa vuabale na noqu marau” (3 Nifa 17:20).

Veisureti meda Cakava

Vakasamataki ira o veiqaravi ena vukudra. Na taledi kei na kaukauwa cava e tu vei ira? Na madigi kei na rawa ka cava era sa rawata oti? Ena rawa vakacava mo reki vata kei ira, vakacaucautaki ira, se vakayaloqaqataki ira?

Wasea na Veika o sa Sotava Oti

Vakauta mai vei keitou na veika o sa sotava ena nomu veiqaravi vei ira tale eso se ena nomu qaravi. Gole ki na liahona.ChurchofJesusChrist.org ka kilikitaka na “Submit an Article or Feedback.”