iYaloyalo ni Vakabauta
Wilson Di Paula
San José, Uruguay
A paralase o Wilson ni oti e dua na vakacalaka ena motopai. Ni oti ga e dua na yabaki sa leqa o watina. Ni sa dawai voli ka rau tiko e rua na goneyalewa lalai, a sega ni kila o Wilson na ka me caka. E sega ni kila o koya kevaka e tiko e dua na inaki ni bula. A rawa ni yalo rarawa o Wilson. Ia a tekivu me vaqara na dina.
Cody Bell, dau ni veitaba
Ni oti noqu vakacalaka ena motopai kei na takali ni watiqu, au sa biu tu kei na rua na goneyalewa lalai meu qaravi rau. Au sega dina sara ga ni kila meu na susugi rau vakacava noqu goneyalewa ena idabedabe vaqiqi. A veisautaka sara ga vakadua noqu bula na vakacalaka oya.
E levu tu na noqu taro. Na cava dau yaco kina na ka ca? Au a toso tiko ena noqu tovolea meu cakava tiko na veika vinaka, ka qai kau tani mai vei au na watiqu kau biu toka ena dua na idabedabe vaqiqi, ka ra qai seleta na ului noqu goneyalewa na vuniwai me ra kauta tani e dua na tubu. Sa tekivu meu nanuma ni sa sega na inaki ni bula.
Au qai kila ni’u gadreva me’u kunea na dina. Au vakadikeva e vica na matavakabauta ka kunea na Lotu i Jisu Karisito ni Yalododonu Edaidai. Au vakila ni sai koya na ka dina.
Au vulica ni tiko tale e dua na bula ni oti oqo, ia ni da sa mate, e rawa ni da laki tiko tale kei ira eda dau lomana. Oqo e kauta mai vei au na reki ena vuku ni 10 na yabaki totoka keirau a tiko vata kina kei na watiqu.
E veisautaka sara ga na veiyasa ni noqu bula taucoko noqu kunea na kosipeli. Sa tekivu me yaco mai na vakacegu ni vakasama kei na vakacegu ni lomaqu. Sa curuma na noqu matavuvale na marau ni keitou lako i lotu e vei-Sigatabu. Keitou lesu mai vale ni keitou sa vaqaqacotaki. Keitou a papitaiso ka qai vauci vata ena valetabu mai Argentina me baleta na veigauna tawamudu.
Oqo au sa toso tiko ga ki liu ena Lotu. Au sa veiqaravi oti vakadaunivakasala ena matabisopi, kau tovolea tiko meu vuli mai na veika kece au sotava, mai na veivakatovolei kece ni bula. E solia vei au na igu. Niu a dabe tu ena idabedabe vaqiqi ena sivia ni 20 na yabaki, au sa vulica ni mamarau e lako mai loma. Ena vulica e dua e levu cake na ka e veisiga. Au vakavinavinakataka oqori.
Au sa qai kila oqo ni dua na inaki ni noda mai tu e vuravura. Eda mai tu oqo ena vuku ni Nona inaki tawamudu na Tamada Vakalomalagi. E tiko na noda iVakabula o koya a vakadruka na mate ka tucake tale mai. E vakaukauwataki na noqu kila na ka oqo. Oqo, au sa tovolea meu toso tikoga ki liu. E tiko e dua noqu inaki kau kila niu segata meu bulataka tikoga e dua na bula kilikili, e rawa ni tawamudu na noqu matavuvale.
E dina ni bolei tu nodrau bula o Wilson kei nona goneyalewa o Sofia, e kauta mai vei rau na vakacegu, mamarau, kei na kaukauwa na kosipeli. A tiko vata ga kei tamana o Sofia me tekivu mai na gauna a sele kina. A kunea o Wilson na reki ni veiqaravi voli ena Lotu.
Na draiva idabedabe vaqiqi wavoki e valenikuro ni vakasaqa tiko e dua vei ira na vuqa na taledi a tara cake o Wilson me tekivu mai na gauna a paralase kina ni oti na vakacalaka.
E kunea o Wilson na inuinui kei na kaukauwa mai vua na iVakabula ni vulica na ivolanikalou.
Era vakayakavi vata kei iratou na matavuvale na Di Paula na daukaulotu. Nona lomana o Wilson na kosipeli sa vu ni kaukauwa ki na nona matavuvale kei na Lotu.
Ni oti e dua na vakacalaka levu kei na mate nei watina, a vakataroga o Wilson na inaki ni bula. A kunea na inaki ena nona kunea na kosipeli i Jisu Karisito.
Erau kunea o Wilson kei Sofia na inuinui ena kosipeli. E sega ni tarovi Wilson ena nona veiqaravi vakaibalebale na nona dabe tu ena idabedabe vaqiqi ena sivia ni 20 na yabaki.
Na matadredredre nei Wilson sa ivakadinadina na levu ni sautu vakayalo ena nona bula. “Na mamarau e lako mai loma,” e kaya o Wilson. “Ena vulica e dua e levu cake na ka e veisiga.”
Ni ratou kana vata, e levu cake mai na kakana na ka eratou wasea vata kei rau na daukaulotu na matavuvale na Di Paula, eratou wasea talega na nodratou lomana ka vakavinavinakata na kosipeli.