Totoka Vakalou o Destiny
E vakaitikotiko mai Varanise o koya e vola.
Sa dau marau tu ga o noqu itokani ena veigauna kece. Na cava beka e rairai vakayavalati koya tiko?
Droini mai vei Reginald Swinney
Au kai Varanise, ia keirau sa mai dua na yabaki vakagonevuli veidolei ena tokalau kei Amerika kei taciqu. Ena gauna o ya, keirau a sotava sara e vuqa na tamata, ia e dua ga a vakauqeti au sara vakalevu o ya e dua na goneyalewa lailai na yacana o Destiny. Sa mai dua vei ira na noqu itokani voleka sara. Keirau dau cakava vata e vuqa na ka, e koronivuli vakakina ni oti na vuli vata kei taciqu. Sa dau marau tu ga o Destiny. Oqo na ka au dau taleitaka vakalevu vua.
E dua na siga au raica ni vaka me lomaleqa voli o koya kau se bera vakadua ni raica oqo vua. Au a tarogi koya se cava na leqa. A kaya mai ni sega ni via talanoataka. Au a raica sara e dua na pepa e ligana. Au a taura ka wilika.
E dua a vola eso na veika a vakacacani koya sara kina. Na ivola tawakilai oqo e kaya ni rairai ca o koya, ni sega ni dua e taleitaki koya, ni sega tu na inaki ni nona bula oqo, ka sa dodonu me sa laki vakamatei koya ga yani. Au sega vakadua ni vakabauta me dua e vakataki koya me boloraki mai vaka o ya. A tara sara vakabibi na yaloqu meu kila rawa na mosi sa curuma tu o koya.
Vakatekivu mai e kea, au sa saga vakaukauwa sara meu itokani i Destiny—sega walega ena noqu gauna vata kei koya, ia meu karoni koya sara, vakabibi meu yalodina kina. Au a vakamacalataka vua ni o koya e dua na luve ni Kalou, sa vakalougatataki ena ituvaki vakalou, sa kilikili me vakasakiti ka sa rawa vua me rawata na veika cecere cake.
Sa dau ka dredre mo tovolea mo lomani iko vakai iko ena gauna era vakacacani iko kina eso ka ra vakasewasewani iko. Ni keirau sa veitokani kei Destiny, au a vulica ni so na gauna e sala vinaka duadua mo vukei ira eso o ya mo lomani ira ga ka vukei ira mera kila o cei dina o ira.
Ni cava na yabaki o ya, ni sa dodonu meu sa lesu tale ki Varanise, a kaya vei au o Destiny e dua na ka au na dau vakamareqeta voli tu. “Emma,” a kaya o koya, “o iko a vakabulai au. Ni bera ni ko yaco mai, au sa vinakata meu vakamatei au. Ia o iko kei tacimu drau a vukei au sara vakalevu, ena nomudrau kauwai mai. Nikua au sa lomani au, kau lomani iko.”
Era vuqa tu na gonevuli e koronivuli era vosota tu na veivakasaurarataki, era vakacacani se guilecavi tu. Vakasaqara na sala mo laki vukei ira yani. Mo laki vosa vei ira, vakasamataki ira, ka yalololoma vei ira. Ena cakava vakaoqo na iVakabula, ka so na gauna ni ko vakayadra ga se matadredredre yani ena veisautaka na veika kece.