Rua na Draunipepa Sinai ena Vakavinavinaka

Elise Dahlen

Utah, Amerika

Ena nona bula taucoko a sotava tu o tamaqu na yalolailai ka vakila ni sega na kena yaga. A susugi koya cake o tamana e daugunu yaqona ni valagi ka dau tukuna vua ni tamata tawayaga sara. Au vakavinavinaka, ni a sega ni daugunu yaqona ni valagi o tamaqu, ia a sega ni tukuna vei au se ratou na taciqu ni dau qoroi keitou se vakacerecerei keitou ena neitou caka vinaka. Niu tubu cake tiko, au dau via vakalomavinakataki koya, ia au dau vakila niu sega ni rawata sara. Sa vakavuna oqo me dredre sara na neirau veimaliwai.

Dua na yabaki, au a laki vakamacalataka oqo vei noqu bisopi vuku. A vakasalataki au meu vola vei tamaqu na vu taucoko ni noqu vakavinavinaka vua. Oqo ena sega ni dua na ka lailai vei au. E titobu na mavoa ni yaloqu, kau sega ni vinakata na noqu ivola ni vakavinavinaka me ka ni yalo ca. Au sa qai masu. Ena veidusimaki ni Yalo, sa tekivu me taladrodro mai na vu ni noqu vakavinavinaka vei tamaqu. A taura na gauna, ia niu sa vakaotia, au sa vakasinaita e rua taucoko na draunipepa.

Au a kauta sara na noqu ivola, ka sega tu ni kila na cava ena cakava o tamaqu. Ia au sa kila niu na sega ni digitaka na ka ena cakava. Sa na gadrevi ga meu raica na yaloqu e loma ka nanuma na vuna au a vola kina na ivola.

Ena mataka e tarava, au a ciqoma e dua na qiri maivei tinaqu vakacabecabe. E a tagi mai. A kaya mai ni sa wilika o tamaqu na ivola ka sa vuki wilika tikoga. A kaya o tinaqu ni sega ni vosa rawa o tamaqu baleta ni sa bi sara na nona tagi.

“Vinaka vakalevu!” a kaya mai o tinaqu. “Sa gadreva oqo o tamamu.”

Ena yakavi o ya, a qiriti au mai o tamaqu me vakavinavinakataki au. A qiriti au mai ena veisiga yadua me vica na siga me vakaraitaka na kena bibi vua na ivola.

Au diva meu kaya ni a cakamana na vakabulai ni neirau veimaliwai, ia se levu toka na cakacaka me keirau cakava. Toso na gauna, sa tekivu me vakabulai na yaloqu, ka vakatorocaketaki na neirau veimaliwai. Sa yaco sara, meu sa vosoti koya rawa.

Ni oti e vica na yabaki, ni a valuti sara vakaca ena kenisa, a mai mate o tamaqu. Au vakadeitaka ni sa sotava tu oqo o koya na reki cecere ni sa vukei koya na iVakabula mai na veiyabaki ni veivakacacani.Au kila niu sa sotava na veivakabulai mai na kaukauwa ni Veisorovaki i Jisu Karisito.Sa kila vinaka tu na iVakabula na noda gagadre ka sa rawa me vukei keda meda ciluma tani na gaga ni mosi kei na yalo ca mai na yaloda. Au kila ni vakavinavinaka, veivosoti, kei na loloma era sa iwali kaukauwa sara.