Na cava na nanuma ni Lotu me baleta na veika e vakavolivoliti keda tu?

Na vosa bibi ni kena kilai vinaka na noda raica na veika sa vakavolivoliti keda tu o ya na vakatawana. E sega ni kena ibalebale o ya vei ira na tamata ni ra sa taukena na vuravura ka vakasabusabutaka vakaveitalia ia meda na lewa matau na sala eda vakayagataka kina na kena ivurevure (raica na Vunau kei na Veiyalayalati 104:13–15). E dina ga ni “sa veirauti na veika e tu ka na vo tale” (Vunau kei na Veiyalayalati 104:17), e vinakata na Kalou meda vakayagataka vakavuku na ivurevure e tu e vuravura (raica na Vunau kei na Veiyalayalati 59:20).

Sa bulia na vuravura na Kalou ka sa vakatoka na veika sa bulia o Koya me “sa ka vinaka sara” (raica Nai Vakatekivu 1:1, 31). A buli na vuravura oqo mera mai tiko kina na luve ni Kalou me tiki tiko ni Nona ituvatuva ni veivakabulai. Na vuravura oqo vakai koya ena vakasavasavataki ka vakatikori me lagilagi vakasilesitieli (raica na Vunau kei na Veiyalayalati 88:18–19).

A bulia na vuravura na Kalou me sega walega ni yaga ia me totoka talega. Na veika ni vuravura oqo “sa buli me vinaka ka yaga vei ira na tamata, ia me reki kina na mata ka marau kina na yalo,” vakakina me “vakabulabulataka na yalo” (Vunau kei na Veiyalayalati 59:18–19).

Sa dodonu sara meda rokova na Kalou ena noda vakavinavinakataka na veika sa bulia o Koya, ka meda vakavinavinakataka na veika oqo, ka sasagataka meda maroroya na kedra totoka. Sa dodonu meda maroroya na ivurevure sa tu, taqomaka na veika bula, ka me kakua na benu ca kei na vakasabusabu.