Ena Monalivaliva Ga: iSausauvou
Toso ki Liu ni oti Noqu Kila ni dau sara iYaloyalo vakasisila ko Noqu iTau
O noqu i tau sa qai mai vakadinadinataka na nona leqa ni dau sara iyaloyalo vakasisila. E rawa beka niu na vakamautaki koya?
O koya e vola e vakaitikotiko e French Polinisia.
Au a sotava na watiqu ni keirau a daunivakasala ruarua tiko ena tabana ni EFY. E a veilauti na nona i vakadinadina kaukauwa kei nai moimoi ni nona veivakavulici kei na veimaliwai kei ira na itabagone.
Ena i tekitekivu ni neirau veigadivi, keirau vakila ni Turaga e namaka me na basika e dua na ka mai na neirau veitokani. Ni toso tiko neirau veitokani, sa vaka, me duatani nai valavala ni nona vakaraitaka na nona dodomo vei au. Au tekivu me kilakasamitaka ni dau sara iyaloyalo vakasisila, ia ena gauna keirau dau veitalanoataka kina, e dau cakitaka.
Keirau sa tekivu me vaka davora eso na lawa bibi me keirau taqomaki keirau kina. Ena gauna sa vosaki au kina au a vakadonuya ka sa tekivu me vinaka mai na ka kece—me yacova ena dua na siga, sa baci tekivu me vakaraitaka na nona dodomo ena sala au sega ni logaloga vinaka kina.
E tiko ga kei au na noqu kilakasami ena nona dau sarava nai yaloyalo vakasisila, ka dua na siga au sa qai tukuna vua me baleta e dua noqu itokani kaulotu ka sotava tiko na leqa vata oqo ni bera nona laki kaulotu. Au a tovolea ena noqu i gu meu vakaraitaka noqu kila, loloma kei na sega ni lelewa, baleta ni goneyalewa vinaka. Au tarogi koya tale se dau vakatotoganitaki ena saravi ni iyaloyalo vakasisila, ka mani tukuna mai ni vakadina kina.
Mosi kei na Veivakabulai
Taumada, e a ka dredre vei au me keirau veisotari mata niu vosa vua. Sa mosi dina na yaloqu baleta niu vakila ni Turaga e a tukuna vei au ni tagane oqo ena rawa ni yaco me noqu i tokani tawamudu. Ia e dina niu a rarawa, au kila ni gadrevi vei au meu cakacaka yani kina noqu vosoti koya, kau vakila niu uqeti meu kakua ni muduka na neirau veitokani.
Au dau masu vakavuqa kau vulica na veivosa eso baleta na veivosoti kei na saravi ni iyaloyalo vakasisila. Au vakawilika e levu nai tukutuku kei nai vakadinadina mai vei ira na vakawati ka valeqai o kedrai sa ena poisoni oqo. Niu wiliwli tiko, au vakila na loloma ni iVakabula vei au kei noqu i tau, kau ciqoma talega e dua na veivakadeitaki ni tagane oqo sa na noqu i tokani tawamudu dina ga. Au vulica talega e dua na dina ni nona Veisorovaki nai Vakabula—ena nona rawa ni vakabula e dua na yalo e veivutuni dina (noqu i tau) kei na uto e mavoa (noqu).
E dua na ka bibi ena neirau ilakolako sai koya me keirau veivosaki kei na nona bisopi o noqu i tau. Na nona veidusimaki e vukea me kauti keirau vakavoleka ka vei vakabulabulataki. E kunei vua na vosota ni berabera tiko na toso nei watiqu, kei na nona itovo va Karisito, vakaraitaki loloma e uqeti ka vukei au meu cakacaka vata kei noqu i tau ena bolebole ka sotavi tiko.
Ena so na gauna, sa dau dredre vei noqu itau me raica noqu rarawa ena vuku ni nona digidigi ka sa voleka sara ni bese ni vakamautaki au! Ia ni oti e vica na vula ni neirau cakacaka vata me savasava, sa qai vakila mai ni sa vosoti dina mai vua na Turaga vaka kina mai vei au.
E muri, keirau qai vakamau, ka sa qaqaco vinaka tu edai na neirau veiwekani. Na veika keirau sotava oqo e vukei keirau me kakua ni maduataki na veitalanoataki ni bolebole eso keirau sotava. E dina ni sa galala mai na veivakatotogani ni iyaloyalo vakasisila, keirau yadrayadravaki ka veiqarauni vaka i keirau.
Nomu Veiwekani e Rawa ni Mana
Ke sa mai vagagai na nomu veiwekani ena revurevu ni iyaloyalo vakasisila, mo kila ni rawa na veivosovosoti. E se rawa me tomani tiko na veilomani vaka i kemudrau ka cakacaka vata me kunei nai wali ni leqa ka vaka malumalumutaki. Eda sega ni vakuwai mai na veivakabulai ena Veisorovaki ni noda iVakabula. E dodonu meda ciqoma ni da sa mavoa tu ka eda na qai vakabulai ga ena veivuke ni noda iVakabula.
Nai talanoa ni tamata yadudua e duidui vakakina na veiwekani kece era duidui. Vei ira eso, na muduki ni veiwekani ena gadrevi me vakayacori. Ia au nuitaka ni neirau italanoa ena veivuke vei ira era sotava tiko na leqa vata oqo. Baleta niu a ciqoma na veivakadeitaki mai vua na Yalo Tabu, vata kei na veivuke ni iVakabula kei na nona Veisorovaki, e a rawa kina meu vosoti noqu i tau ka tomani na neirau veiwekani. Au kila ni o ya na digidigi e dodonu vei au meu cakava.
Kevaka o sotava tiko na draki ni bula vata oqo, vakasamataka ena yalo ni masumasu na nomu ituvaki kei na veika e rawa ni kauta mai vei iko na nomu veisiga ni mataka. Ke o ciqoma mai vua na Yalo ni tomani ni nomudrau veiwekani e dodonu me caka ka o nuidei kina, mo kila ni nomudrau sasaga kei na vakararavi vua na Tamada Vakalomalagi, ena yaco kina nomudrau veiwekani me rawa ni mana.
Na watiqu e turaga vakasakiti, kau domoni koya vakalevu sara! Au vakavinavinakataka na Turaga ena nona vukei keirau ka vakabulabulataki keirau me rawa ni keirau vakamau. Na Turaga sa vukei keirau me keirau tubu vata vaka veiwatini ka tu vakarau me sotava na cava e sa vakarautaka tu me baleta neirau bula.