Muv I Go Fored Afta we Mi Lanem se Man we Bae Mi Maredem I Yusum Ponografi

Oli no talemaot nem

Man we bae mi maredem i talemaot se hem i bin gat wan problem wetem ponografi. ?Bae mi save maredem hem yet?

Hem we i raet i stap long Tahiti.

Mi bin mitim hasban blong mi taem we mitufala tugeta i kaonsela blong EFY. Mi bin sapraes long testemoni blong hem we i strong mo wei we hem i bin tijim mo joen tugeta wetem ol yut.

Taem mitufala i stat blong deit, mitufala i bin filim olsem se Lod i wantem wan samting aot long rilesensip blong mitufala. Taem rilesensip blong mitufala i stap kam strong, be, hem i stap wantem moa taem hem i wantem soem filing blong hem. Mi bin stat blong luksave se hem i bin gat hadtaem wetem ponografi, be taem mitufala i tokbaot, bae hem i giaman se hem i nogat problem wetem ponografi.

Mitufala i bin stat blong putum sam strong rul blong protektem mitufala. Taem hem i askem mi long mared, mi bin akseptem mo ol samting i bin go gud—kasem wan dei taem, wan moa taem, hem i stat blong askem moa blong soem long mi se hem i lavem mi long ol wei we i mekem mi no filim gud nating.

Mi stil gat filing se hem i yusum ponografi, mekem se wan dei mi bin talem long hem abaot wan kompanion blong mi long misin we i bin traehad wetem ponografi bifo misin blong hem. Mi bin mekem wanem mi save mekem blong soem se mi andastanem hem wetem lav, mo no jajem hem, from i tru we hem i wan gud woman. Afta mi askem hem sapos hem i bin gat adiksen wetem ponografi, mo hem i jes talem long mi long en se, yes.

I Soa mo I Kam Oraet

Long fastaem, i bin had long mi blong toktok mo lukluk hem stret long ae. Kolosap nomo mi no save akseptem ol filing ia, from mi bin filim se Lod i bin talem long mi se man ia i save kam kompanion blong yu we i no save finis. Be nomata se i soa tumas, mi bin save se mi nidim blong wok blong fogivim hem, mo mi bin filim se mi no mas givap long rilesensip blong mitufala ia.

Mi bin prea plante mo stadi plante toktok abaot fogivnes mo fasin blong yusum ponografi. Mi bin ridim plante stori mo testemoni blong olgeta we oli mared mo patna blong olgeta i bin traehad wetem posen ia. Taem mi bin stap rid, mi bin filim lav blong Sevya long mi mo long man we bae mi maredem, mo mi bin kasem wan nara konfemesen se man ia hem i tru kompanion blong mi ia nao we i no save finis. Mi bin lanem tu wan defren pat blong Atonmen blong Sevya—olsem wanem Hem i save mekem wan sol we i sakem sin i kam oraet (man we bae mi maredem) mo wan hat we i brok (blong mi).

Wan impoten samting long rod blong mitufala ia i bin hemia blong toktok long bisop blong man we bae mi maredem. Givhan blong hem i helpem mitufala blong kam oraet mo gro moa kolosap olsem wan kapol. Hem i bin gat fasin blong save wet longtaem taem hasban blong mi i slak smol, mo eksampol blong hem blong lav mo olsem hemia blong Kraes i givim mi insperesen mo helpem mi blong fogivim mo wok tru problem ia wetem man we bae mi maredem.

Blong smol taem, i bin had tumas long man we bae mi maredem blong luk mi safa from ol joes blong hem we i mekem se !hem i nomo wantem maredem mi! Be afta we mitufala i wok tugeta blong sam manis blong hem i kam klin, hem i bin filim se tugeta mi mo Lod i bin fogivim hem wetem tru hat.

Long en, mitufala i bin mared, mo rilesensip blong mitufala i kam moa strong bitim oltaem. Eksperiens ia i bin helpem mitufala blong no mas sem blong toktok wetem wanwan long mitufala abaot ol problem blong mitufala. Mo nomata se hem i nomo yusum ponografi, mitufala i gohed blong stap kolosap mo lukaot long wanwan long mitufala.

Rilesensip blong Yu I Save Wok

Sapos paoa blong ponografi i posenem rilesensip blong yu, save se yu save kasem fogivnes. I save hapen blong gohed blong lavlavem wanwan mo wok tugeta blong faenem ol ansa mo winim problem ia. Yumi evriwan i gat raet ia blong kam oraet tru long Atonmen blong Sevya. Yumi mas akseptem se yumi filim soa mo we tru long help blong Sevya, yumi save oraet evriwan.

Evri stori blong wanwan man i spesel, mo evri rilesensip i spesel. Blong sam man, blong endem rilesensip i save wan raet samting blong mekem. Be mi hop stori blong mitufala i save helpem ol nara man we i stap long sem situesen ia. From we mi kasem konfemesen ia tru long Tabu Spirit, mo wetem help blong Sevya mo Atonmen blong Hem, mi bin save fogivim man we bae mi maredem mo gohed long rilesensip blong mitufala. Mi save se mi bin jusum raet.

Sapos yu stap fesem sem samting, lukluk long situesen blong yu wetem prea mo wanem fiuja i gat i stap blong yu. Sapos yu kasem konfemesen long Spirit se gohed wetem rilesensip blong yu hem i raet samting blong mekem mo trastem filing ia, save se wetem traehad blong yutufala tugeta mo dipen long Papa long Heven, rilesensip blong yutufala i save wok.

!Hasban blong mi i wan gudfala man, mo mi lavem hem moa bitim oltaem! Mi no save stop blong talem tangkyu long Lod blong helpem mitufala i kam oraet mo mekem se mitufala i save mared. Lod i bin helpem mitufala blong gro tugeta olsem wan kapol we i rere blong fesem wanem we Hem i bin plan from blong laef blong mitufala tugeta.