Ol Fren We Oli Serem Laet Blong Olgeta wetem Mi
Woman we i raet i stap long Baja Kalifonia, Meksiko.
Mi stap filim fraet mo mi stap miwan. Afta mi muv i go long wan nara kantri mo go long jos blong fas taem afta wan long taem we mi no bin go long jos.
Mi stap wetem mama blong mi long wan smol taon long Meksiko we evriwan i save wanwan long olgeta. Mi bin save raet mo rong, be mi konfius mo miwan nomo i aktiv long ol yang woman long ful taon ia.
Mi wantem blong joenem olgeta, mekem se mi mekem wan samting we i oraet long taem ia: blong gat wan boefren. Hemia i wan long ol fas mistek we mi stat blong mekem. Mi stat blong folem ol fren blong mi mo stap biliv se mi bigwan inaf blong tingting blong miwan, we i minim blong mi nomo kam aktiv yang woman ia long jos mo laef long tudak.
Mi bin stap long tudak wan ful yia, mo evri dei we i pas, i stap kam moa tudak. Ol nogud desisen we mi stap mekem i lid i go long ol raorao wetem ol famli blong mi, afta mi luksave se mi nomo save gohed blong stap wetem olgeta. Be kasem taem we wan gudfala Lata-dei Sent fren blong mi i ded, i mekem mi luksave se wan samting i nogat. Wanem i nogud, mi bin blemem God mo gospel. Mi bin stop blong bilivim se ol blesing i kam taem yumi obei. Mi save se sapos mi no disaed blong stat laef folem gospel, bae mi gohed blong no luksave koneksen blong mi wetem Jos mo gohed blong laef folem fasin blong wol.
Mi stap sidaon long bed blong mi long wan rum we i tudak, mi stap krae mo sori long miwan taem mi luksave se mi fraet—mi fraet blong stap miwan mo nogat man blong toktok long hem, fraet blong no save fiksim evri rong samting we mi bin mekem, fraet se bae i nogat man bae i fogivim mi, speseli God.
Afta, mi bin muv i go long Minnesota, YSA wetem ol apu blong mi, we oli no memba blong Jos. Step papa blong mi i flae wetem mi, mo fas Sandei blong mi longwe, mitufala i go long Jos, be blong sakramen miting nomo. Long en blong miting mi disaed finis blong lego Jos, be mi sek nomo, taem mitufala i stap go insaed long trak, mitufala i luk bisop i stap ron i kam blong kasem mitufala. Hem i askem sam kwestin mo invaetem mitufala blong kambak nekis Sandei—mo mitufala i mekem.
Long nekis Sandei, taem sakramen i stap finis, bifo mi save stanap, ol yang woman blong wod oli kam raon long mi—ol yang woman we bae oli help blong jenisim laef blong mi.
Pikja i kam long Alberto Ruggieri
Wantaem nomo, mi go insaed long wan wol we i defren evriwan: wan wol wetem wan bisop mo wan Yang Woman presiden we i kea long mi, mo hemia we i moa gud, ol yang woman we oli traem blong laef folem gospel evri dei, we oli traehad blong laef long ol hae standet mo blong stanap from wanem i raet. Oli saen tumas mekem se oli save saenem rod blong mi.
Long taem ia nao mi luksave wanem mi nid blong mekem: “Nao long sem fasin, laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao bambae olgeta oli save leftemap nem blong Papa blong yufala, we i stap long heven.” (luk long Matiu 5:16). Mo i mekem mi stat blong go long jos mo Miutuol evri wik, stap ridim Buk blong Momon mo prea evri dei, dresap long wan gudfala wei, yusum ol gudfala lanwis, stap go long tempol, mo rere long miwan blong kasem petriakel blesing blong mi.
Mi jenis fulwan, be mi no bin luksave kasem Yang woman kamp, taem mi filim se Tabu Spirit mo faenem aot se mi gat wan testemoni—testemoni ia we bae i rimaenem mi se God i lavem mi, mo hem i gat wan plan blong mi, mo Hem i no wantem blong mi stap miwan. Wan testemoni we i saen strong mo i strong mekem i jenisim mi. Wan testemoni blong serem mo i no laetem rod blong mi nomo be ol narawan tu. Wan testemoni we i no fraet blong i saen long tudak.