Ol Voes blong Ol Lata-dei Sent

Oli Planem wan Sid long Hat blong Mi

Marta Algarve

Santa Catarina, Brazil

Pikja i kam long Rafael López

?Mi kam Wea? ?Mi stap mekem wanem long ples ia? ?Afta mi ded, bae mi go wea?

Taem mi gat 29 yia, ol kwestin ia oli stap kambak oltaem long mi. Papa mo mama blong mi oli bin ded finis. Mi bin filim nogud from fasbon pikinini boe blong mi we i bin ded. Mi gat tri pikinini blong lukaot mo wan laef we i fulap long ol jalenj.

Lod i bin stat blong ansarem ol kwestin blong mi taem Hem i lidim tu yang misinari i kam long hom blong mi. Taem mi welkamem olgeta i kam insaed, oli askem sapos i gat eni samting we mi filim se i nogat long laef blong mi. Mi talem long olgeta abaot papa mo mama blong mi mo pikinini boe blong mi. Mi se i no fea blong gat pikinini mo statem wan famli sapos evri samting bae i mas en wetem ded. Mi askem sapos mi lsave uk papa mo mama mo boe blong mi bakegen.

Oli se, “Marta, bae yu save gat famli blong yu blong oltaem.”

Glad i fulumap hat blong mi. Mi wantem blong save moa. Long nekis visit, tufala i tijim moa abaot gospel blong Jisas Kraes. Oli bin givim long mi wan Buk blong Momon mo oli jalenjem mi blong ridim mo askem God spos hem i ol toktok blong Hem. Mi akseptem jalenj blong olgeta. Taem mi bin prea, ansa blong God i kam olsem laet blong san. Mi save long hat blong mi se i tru.

Be afta taem we mi tekem niufala wok blong mi, mi bin lusum kontak wetem ol misinari. Long ol manis afta, mared laef blong mi i en mo mi traem blong statem wan niufala laef wetem ol pikinini blong mi.

Sloslo, mi mared bakegen. Wan dei hasban blong mi i talem se hem i nidim blong gat God long laef blong hem. Mitufala i disaed blong go long jos we hem i bin atendem wan taem. Taem mifala go insaed long rum blong stap wet ia, mi luk Buk blong Momon long wan tebol. !Hemia i semmak jos we mi bin save bifo! Mi bin lavem Spirit we mi bin filim longwe. Taem jos i finis, mi askem long hasban blong mi olsem wanem mi save kasem baptaes.

“Ol misinari oli mas tijim yu,” hem i talem.

“!Oli bin tijim mi faef yia i pas finis!” Mi ansa.

Ol pikinini blong mi mo mi i bin kasem ol lesen ia finis. Dei we mifala i bin kasem baptaes i wan hapi dei ia long ol laef blong mifala.

Sam yia i pas, mi filim se mi mas talemaot long ol sista ia we oli bin tijim mi fastaem abaot Jos. Long Facebook, mi bin faenem wan grup blong ol riten misinari blong Brasil Santa Misin. Insaed i gat wan sista ia we i bin tijim mi. Mi sendem wan fren rikwes mo talem long hem huia mi, olsem wanem mi bin kam wan memba blong Jos, mo famli blong mifala i bin sil long tempol, mo se boe blong mi stap long wan fultaem misin. Mi talem long hem se evri samting ia i posibol from se hem mo kompanion blong hem tufala i planem sid blong gospel we i bin kambak insaed long hat blong mi.