Ol Voes blong Ol Lata-dei Sent
Wan Bonas Blesing
Roberto Atúncar Nieto
Lima, Peru
Illustration by Ale + Ale, Morgan Gaynin
Waef blong mi, Carmen, mo mi i jes gat fas pikinini blong mitufala taem oli singaotem mi blong kam bisop long wod blong mifala. Long taem ia, mitufala i faenem i had long saed blong mane. I had long mi blong lukaotem famli blong mi mo long semmak taem lukaotem mo kea long ol memba long wod blong mifala.
Wan Sandei, mi luk save wan singgel mama wetem fo pikinini blong hem long sakramen miting. Hem i sidaon long las jea biaen long japel mo traem bes blong hem blong mekem ol pikinini blong hem i stap kwaet. Mi save se hem i stap traehad long saed blong mane tu, be hem i neva askem help. Sam wik i pas, mo evri Sandei hem i kam long jos wetem ol pikinini blong hem.
Wan dei, mi kasem salari blong mi. From mi kasem blesing blong kasem wan bonas, mi bin disaed blong yusum ekstra mane blong pem ol saplae we mi nidim blong mekem ol ripea long haos blong mi. Be taem mi stap go long maket, sista ia wetem ol pikinini blong hem i kam long maen blong mi. Mi filim se mi sud yusum ekstra mane ia blong pem kakae blong olgeta. Mi ringim Carmen mo talem long hem wanem mi filim mi nid blong mekem. Hem i agri.
Taem mi stap karem ol samting, ae blong mi i fas long sam kuki. Mi tingting se maet ol pikinini bae oli wantem sam swit. Mi fulumap tu basket kakae mo mekem rod blong mi i go long haos blong sista ia.
Mi noknok blong sam taem long wan olfala doa. Taem mi stap rere blong aot, doa i jes open. “Bisop,” sista ia i talem, “Mi sapraes blong luk yu long ples ia.” Kwik taem, ol pikinini blong hem oli ron kam aot biaen long hem
“Mi karem sam kakae blong yufala,” mi talem.
Wan long ol gel blong hem i faenem ol kuki ia mo i singaot, “!Kuki!” Ol brata mo sista blong hem oli glad mo kam tugeta. Wan pikinini gel blong hem we i gat seven yia i haggem mi. “!Tangkyu, Bisop!” hem i talem.
Mi bin lukluk i go insaed long haos blong olgeta mo luk se sista ia i stap wasem ol klos long wan sospen long floa. Famli ia i nogat tebol mo oli silip long wan matres long floa. Mi bin luk hamas oli stap long nid. Mi mekem ol arenjmen blong mekem sua se bae oli gat wan tebol mo wanwan bae i gat wan bed.
Eksperiens ia i helpem mi blong luk save se Lod i stap gaedem mo blesem ol wokman blong Hem. Yumi no nidim wan spesel koling blong helpem ol brata mo sista blong yumi. Yumi jes nid blong gat Spirit, blong luksave huia i nidim help blong yumi, mo wantem blong kam ol tul long han blong Lod.