!Mi No Wantem blong Stap Defren!
Man we i raet i stap long Yuta, YSA.
“Tingbaot se praes blong ol sol i bigwan tumas long ae blong God” (Doktrin mo Ol Kavenan 18:10).
Mika oltaem i stap glad blong go long klas blong danis. Hem i laekem blong lisin long miusik. Hem i laekem blong praktisim bataflae jiam blong hem mo blong kasem i stret. Mo hem i laekem speseli taem ful klas i muv tugeta. Taem oli mekem hemia, i olsem se ol man blong danis oli semmak. I filim olsem se i no hemwan nomo we i gat sik ia Down syndrome.
Tedei bae oli lanem wan niu step blong danis. Mika i lukluk tija blong hem i jiam i go antap. Hem i luk ol nara gel oli traem. Sam oli kasem wan taem nomo. Sam oli traem bakegen. Mika i traem bakegen mo bakegen, be hem i no kasem nomo.
“?Bae yu helpem mi, tija?” Mika i askem.
Gel we i stap kolosap long Mika i lukluk hem. Hem i muv i go kolosap long nara fren blong hem. “?From wanem hem i toktok olsem ia?” hem i wispa. Tugeta gel i tanem tufala mo lukluk Mika.
Long rod i gobak long haos afta long klas, Mika i stap kwaet long ful rod.
Taem oli kasem haos, Mama i stap tantanem flaoa long kijin. Hem i gat flaoa long jik blong hem. Samtaem i mekem Mika i laf. Be tedei hem i sakem basket blong hem long floa mo i sidaon long jea long saed blong tebol.
“?Olsem wanem long danis?” Mama i askem.
“I nogud,” Mika i talem. “Mi askem help, mo wan gel i se mi toktok fani. Afta hem i stap lukluk mi.” Mika i lukluk i go daon. “Mi nomo wantem go long danis bakegen.”
“!O, Mika!” Mama i talem. “Mi sore tumas. Mi mo Papa i laekem blong luk yu danis. !Mifala i praod tumas long hadwok blong yu!
Mika i filim wota blong ae i ron daon long fes blong hem. “Mi no laekem sik ia Down syndrome insaed long mi. Mi no laekem se fes blong mi i defren. Mi wantem tumas se i no had blong mi lanem ol niu samting. !Iven mi mas praktis blong toktok!”
Papa i sidaon kolosap long Mika mo putum han blong hem raonem hem. “Mika, mifala lavem yu tumas. Bae mifala i no wantem jenisim eni samting long yu.”
Be Mika i seksekem hed blong hem mo kavremap fes blong hem long han blong hem. “Mi no wantem blong stap defren. !Mi wantem sik ia Down syndrome i kamaot long mi!”
Mama mo papa i stap kwaet blong smol taem.
“Mi gat wan tingting,” mama i talem. Mika i spae tru ol han blong hem. “From wanem yu no prea mo askem Papa long Heven olsem wanem Hem i filim abaot yu?”
Mika i tingting long hemia. Hem i laekem blong mekem prea. Sloslo, hem i muvum hed blong hem. “?Yu save raetemdaon kwestin ia olsem bae mi tingbaot wanem blong askem?”
Mama i raetemdaon kwestin ia. Afta Mika i karem pepa ia mo i go long rum blong hem blong prea.
Taem hem i kam long kijin sam minit afta, fes blong hem i laet olsem ampul blong laet. “!Papa long Heven i bin ansa!” hem i talem.
“?Hem i bin talem wanem?” Mama i askem.
“Hem i talem,’Mika, Mi lavem yu olsem we yu stap,’” hem i talem. “Mo Hem talem wetem wan LAOD voes!”
Nekis wik long danis, Mika i no wari long wanem ol nara gel oli tingting long sik ia Down syndrome blong hem. Be, hem i luk wan nara gel, Sara, we i no luk hapi. Sara i stap gat hadtaem blong lanem sam niu muv tu.
Taem Mika i kambak long haos, hem i disaed blong raetem wan not i go long Sara. Hem i droem fulap hat. Mama i helpem hem wetem speling.
“Dia Sara,” Mika i raetem. “!Yu yu danis gud! Mi wantem kam fren blong yu. Mi glad se yu stap long klas blong danis blong mi.”
Mika i no save wet blong givim not ia long Sara. Hem i wantem Sara blong i hapi mo blong laekem danis tu.