Aot long Man blong Mekem Problem i go Baptaes
I Kam long Elda Hugo Montoya
Blong Olgeta Seventi
Frensip mo eksampol blong yu blong stap stret mo gud bae i blesem ol fren blong yu mo ol jeneresen we i stap kam.
Ol pikja oli kam long Brooke Smart
Taem mi gat seventin yia, mi fesem bigfala problem wetem ol fren we oli stap fosem mi blong mekem ol samting we i no stret long hae skul blong mi. Ol fren we mi bin gat oli nogat semmak valiu olsem mi. Ol fren blong mi mo mi i bin tekpat long plante gudgudfala aktiviti tugeta olsem basketbol o futbol. Be oli dring alkol mo smok tu—tu long ol aktiviti we mi no mekem wetem olgeta.
Wan dei wan grup blong mifala i bin stap aotsaed long skul mo stap stadi from wan tes we bae mifala i mekem long dei ia. Tufala we i stap wetem mi, i gat Juan mo Francisco (ol nem oli jenisim). I bin kam long wan taem we, wan i bin karemaot sam laeta mo sigaret. Mi ting se ol fren blong mi oli les blong stadi mo oli bin fogetem se mi bin stap ia. Mi lanem se mi bin rong taem oli tanem olgeta mo talem se, “Naoia i taem blong Hugo blong lanem olsem wanem blong smok.”
Bifo mi faenem janis blong tekem wan aksen, Juan mo Francisco i jiam i kam long mi mo tekem mi long han blong mi, wan long wan saed han mo narawan long narasaed han. Oli holem han blong mi i go daon taem wan i stap pusum sigaret long maot blong mi. Bodi blong mi hariap i no wantem samting ia, mo mi spet long sigaret ia i go long graon, longwe long mi. Afta long taem ia nomo, mi filim win blong han i fas long fes blong mi. Oli mekem mi fraet, mo talem, “Bae mifala i laetem sigaret bakegen mo bae yu mas lanem blong smokem. No sakem daon long graon. Sapos yu mekem, bae i nogud ia nao.”
Long taem ia mi save se mi stap long problem. Mi klosem ae blong mi mo bin talem wan kwik prea blong askem sam wei blong help. Sot taem afta mi finisim prea blong mi, tija blong mifala i stopem trak blong hem kolosap long mifala. Tija blong mifala i kamaot long trak mo askem long mifala wanem ia mifala stap mekem. Ol fren blong mi oli lego mi. “Mifala stap rere from tes,” oli mekem tija i bilivim. Mifala i go insaed long skul mo mekem tes, mo situesen i bin stop.
Nomata olsem wanem eksperiens ia i had, mi bin fogivim olgeta. Mi save se oli no bin andastanem ol standet mo ol desisen blong mi blong laef folem Tok blong Waes, mekem se mi bin fogivim olgeta mo jusum blong nogat eni nogud filing agensem olgeta. Taem mifala i finis skul, mi go long misin be mi gohed blong toktok wetem Juan mo Francisco. Mi raetem leta long tufala oltaem mo serem gospel mo testemoni blong mi long Jisas Kraes. Mi invaetem olgeta blong sakem sin mo blong go long jos. Long bigfala sapraes blong mi, wan long tufala i bin rili go long jos.
Mi stap oltaem invaetem ol fren blong mi blong kam long ol miting bifo, be nogat wan i akseptem kasem naoia nao. Nomata mi no save go long jos wetem Juan, ol brata mo papa blong mi oli stap blong helpem mo felosipim hem. Famli blong mi oli bin akseptem hem mo Juan i bin filim kamfot long jos. Hem i stat blong jenis smol afta smol kasem taem hem i mekem desisen blong kasem baptaes. Mi bin glad from hem mo iven glad tumas taem hem i bin talem long mi se hem i lanem blong lavem Jisas Kraes from ol leta blong mi. Taem mi kambak hom afta long misin blong mi, Mi bin stap kolosap tu wetem Francisco, mo samtaem i pas, hem mo waef blong hem i bin kasem baptaes tu. Tedei, Juan mo Francisco oli stil stap olsem tufala fren we mifala stap folfolem mifala oltaem.
Ol stori ia oli olsem wan mak long laef blong mi. Mi bin lanem se bes wei blong blong mekem jenis long laef blong ol narawan i taem we yumi laef long wan stret mo moa gud laef, lavem ol narawan mo go aot blong helpem ol narawan. Blong Yut Oli Kam Strong buklet i talem, “Blong gat ol gud fren, yu mas stap olsem wan gud fren. Soem tru intres long ol narawan; smael mo letem olgeta oli save se yu stap kea long olgeta.”1 Hemia nao wanem we Lod i helpem mi blong mekem wetem, Juan mo Francisco. From hemia. Mi gat tu(2) gudfala fren we mi eva save, mo naoia mifala i stap wok tugeta blong sapotem kingdom blong God olsem ol memba blong Jos.
Oltaem mas holemtaet ol standet blong Jos, iven spos yu stap long wan situesen we i had olsem we mi bin fesem. Blong Ol Yut Oli Kam Strong i talems, “Taem yu lukaotem blong kam wan fren long ol narafalawan, yu no salemaot ol standet blong yu i go.’ Sapos ol fren blong yu oli fosem yu blong mekem ol samting we oli rong, yu yu mas man o woman ia we bae i stanap from samting we i raet.”2 Iven sapos i luk olsem se evriwan i stap mekem samting i defren long ol komanmen, stanap strong from se eksampol blong yu i gat moa paoa. Stap olsem wan eksampol we ol fren blong yu bae oli save stap tingbaot long ol taem blong nid blong olgeta. Long sam kes olsem blong mi, frensip blong yu maet hem i samting ia nao we bae i helpem olgeta blong stap lan, sakem sin mo blong konvet.