No Fraet blong Serem Trutok
Testemoni we i gat evri tul blong gospel mo ol blesing blong hem, nomata Fabian i yang be hemia i no stopem hem blong kam memba misinari we i fulap long paoa mo nogat fraet.
San i stap go daon long Las Tomas, klosap long wan bilding long sanbij we yu save lukluk gud Antofagasta. Andanit, ol laet oli stat blong saen taem dei i klos long pot siti ples ia long not blong Jili.
Hem i Satedei naet, mo Fabian H. we i gat 13 yia i stap lafet wetem ol fren blong hem. Be Fabian, wan niu memba blong Jos i jusum blong spenem taem wetem ol fultaem misinari mo no go long lafet. I taem blong “help karembak Isrel i kam tugeta.”1
Aot long evri memba we oli givim taem mo paoa blong olgeta we Kellen VanNatter mo Jordan Shelton i bin wok wetem olgeta long taem we tufala i bin givim seves olsem ol fultaem misinari long Jile, Fabian nao i stanap antap bitim olgeta evriwan.
“Sapos hem i fri, bae hem i stap aot wetem mifala blong stap mekem misinari wok,” Kellen i talem. “Taem sama holidei i pas, hem i no glad be i no from se bae hem i mas gobak long skul be tu from we hem i no gat plante taem wetem mifala.”
Jordan we i bin spenem sam manis olsem kompanion blong Kellen, i bin ademap se, “Fabian i stap go aot wetem mifala fo o faef taem long wan wik—evri wik—taem mifala i bin givim seves tugeta long Antofagasta. Hem i bes misinari memba we mifala i bin wok wetem”.
?Wanem nao i mekem wan yang man we i wantem tumas blong mekem misinari wok nomata ol fren long skul oli se i no impoten mo ol strenja oli traem blong daonem tingting blong hem? Blong Fabian, ansa blong hem i kam insaed long ol blesing we hem mo famli blong oli bin kasem taem oli bin akseptem gospel—ol blesing we hem i wantem serem wetem ol narafalawan.
“Glad we Mi No Save Eksplenem”
Fabian i stat blong tekem lesen blong misinari sot taem nomo afta we oli kam noknok long doa blong olgeta. Hem i stil tingbaot fas sakramen miting we hem i bin atendem.
“Mi no bin save eniwan taem mi kam insaed long japel, mekem se mi fraet smol”. Fabian i talem. Be mi bin filim wan sapraes we i gud tumas. Mi bin filim olsem se mi stap long Jos ia blong plante manis o yia finis.
Wan wik afta long baptaes blong Fabian, “Mi bin filim wan glad we mi no save eksplenemabaot taem we mi bin draon insaed long wota mo kamaot bakegen. Mi bin filim olsem wan niu man, mo save se bae mi folem Jisas Kraes mo mekem evri bes blong mi blong folem ol komanmen blong Hem.
Taem mama mo papa blong Fabian we tufala no bin mared, Leonardo mo Angela, i bin joenem boe blong tufala long taem blong lesen blong ol misinari, tufala i bin lanem abaot tempol mared mo ol famli we i no save finis. “Wan wik i afta, papa blong mi i putum wan dei blong mared.” Fabian i talem. “Mama blong mi i glad tumas”.
Fo manis afta we Fabian i joenem Jos, Angela i folem hem i go insaed long wota blong baptaes. “Hemia i bin wan bigfala blesing,” hem i talem.
Kwiktaem ol nara blesing i folem. Leonardo we i bin baptaes taem i yang, i bin kambak aktiv long Jos. Gospel stadi long hom blong olgeta i bin hapen oltaem. Ol famli memba oli kam kolosap tugeta. Leonardo i faenem wan wok we i blong oltaem. Mo Fabian i kasem Aronik Prisud.
“Mi lavem blong holem prishud from se mi save pasem sakramen long ol memba blong wod mo helpem oli riniu ol kavenan blong olgeta bakegen,” Fabian i talem. “Mi glad speseli taem mi pasem long ol famli blong mi mo long ol elda we oli bin tijim mi. Dip glad ia long ae blong papa blong mi we hem i givim long mi from hem i praod long mi taem hem i luk mi pasem sakramen, i mekem mi glad bigwan.”
“Hemia Bae I Gud Tumas”
Fabian i bin stat blong mekem misinari wok bifo hem i bin baptaes.
“Mi talemaot long tri fren blong mi se bae mi baptaes. Tu long tufala i bin kam,” hem i talem. “Mi laekem blong serem gospel mekem se ol fren blong mi oli andastanem wanem yumi biliv long hem mo wanem yumi mekem long Jos mo mekem se oli save lanem gospel, kasem baptaes, mo lidim wan laef we i glad bigwan. Bae mi glad tumas sapos wan long olgeta i bin baptaes mo kam olsem wan memba long kworom blong mi. Hemia bae i gud tumas.”
Fabian i kipim wan Buk blong Momon wetem hem long skul, mo hem i karem ol pamflet blong misinari blong serem long ol fren blong hem. Hem i glad blong ansarem ol kwestin abaot Jos mo invaetem ol fren blong kam long ol miting blong Sandei mo aktiviti blong ol yut long naet. Mo hem i no fraet blong go kolosap long ol pipol long rod, olsem ol misinari oli tijim hem, invaetem olgeta blong lanem abaot Jos mo rere blong kasem baptaes.
“Fabian i no kea sapos wan narawan i ting se hem i no nomol blong stap serem testemoni blong hem,” Kellen i talem. “Hem i save se hem i stap mekem raet samting. Hem i save se ol samting long saed blong spirit oli moa impoten bitim eni narafala samting.”
Jordan i talem se, taem Fabian i serem testemoni blong hem, i gat paoa long storian blong hem, lav blong hem from gospel, mo ol blesing blong hem i kasem.
“Hem i bin luk ol blesing we i kam long famli blong hem, we i wanem we i givim insperesen long hem gat paoa long tingting mo tok stret long taem blong serem gospel wetem ol fren blong hem,” Jordan i talem. “Taem hem i stap testifae long wan investigeta abaot mared blong mama mo papa blong hem we i wan bigfala blesing be olsem wanem i had blong hem i wet fo manis afta long baptaes blong hem blong mama blong hem i baptaes. Filing blong sori ia i strong tumas we i mekem wota blong ae i ron. Afta hem i testifae se sapos yumi folem ol komanmen, God bae i lukaot gud long yumi.”
Testemoni blong Fabian i mekem hem i kam wan strong memba misinari, Kellen i ademap.
“Hem i no olsem, ‘O, mi harem wan i talem olsem long jos.’ Be, oltaem hem i stap serem ol eksperiens blong hemwan nomo—olsem wei we hem i filim taem hem i go long jos blong fastaem mo olsem wanem hem i filim taem hem i ridim Buk blong Momon. I tru tumas mo i ril.”
“Oltaem Mi Filim Moa Gud”
Blong Fabian, serem gospel i givim wan nara blesing.
“Samtaem ol nogud samting oli stap hapen long mi long skul, be afta ol misinari oli kam noknok long doa blong askem mi sapos mi wantem blong helpem olgeta blong tij,” hem i talem. “Afta we mi go aot wetem olgeta, mi filim olsem se mi no gat eni problem. Oltaem mi filim moa gud taem mi go aot wetem olgeta, blong ridim skripja wetem olgeta, blong helpem olgeta serem gospel. Blong serem gospel mo stori blong mi taem we laef blong mi i jenis i mekem testemoni blong mi i kam strong moa. Mo blong tijim gospel i givim mi wan janis blong stap olsem wan eksampol long ol narawan, mo smol sista blong mi tu.”
I no wan sapraes se wan long ol bigfala gol blong Fabian i blong kam wan fultaem misinari hemwan afta hem i graduet long hae skul.
“Mi wantem serem trutok wetem olgeta we oli no save,” hem i talem. “Mi wantem invaetem olgeta blong wasemaot ol sin blong olgeta. Mi wantem tijim olgeta olsem wanem oli save stapwan famli we i no save finis. Mi wantem invaetem olgeta blong stap hapi naoia mo blong laef long wanlevel blong hapines we i no gat en afta long laef ia.”