Lavem Ol Narawan olsem we Jisas i Lavem Yumi

I Kam long Elda Dallin H. Oaks

Fas Kaonsela long Fas Presidensi

Karemaot smol long “Loving Others and Living with Differences,” Liahona, Nov. 2014, 25–28.

Jisas i givim long ol disaepol blong Hem wan impoten komanmen: “Yufala i mas lavlavem yufala, olsem we mi mi lavem yufala” (Jon 15:12). Olsem ol man blong folem Kraes, yumi mas laef long pis wetem ol narawan. Hemia wetem ol pipol tu we oli no biliv long semsamting we yumi biliv long hem.

Hemia i sam wei we yumi save lavem ol narawan olsem Sevya i lavem yumi:

Stap kaen long ol pipol we oli defren.
Soem Respek long biliv blong olgeta.
Neva jikim o talem nogud wan man o woman.
Stap wan gudfala man o woman blong stap lisin.
Gat gud fasin. Yu no raorao wetem kros.
Stanap from wanem we i tru.
Talem gospel long ol narawan long wan wei wetem tingting i stap daon. “[Talem] trutok wetem lav” (Efesas f 4:15).

Komanmen blong Sevya long yumi blong lavlavem wanwan long yumi olsem we Hem i lavem yumi, i wan long ol bigfala jalenj. Mi prea se bae yumi traem blong soem lav long evri samting we yumi mekem.