Tu Pej We I Fulap long Fasin blong Talem Tangkyu

Elise Dahlen

Yuta, YSA

Papa blong mi i bin safa ful laef blong hem long fasin blong stap luk daon long hemwan mo gat ol filing se hem i no impoten. Hem i groap wetem wan papa we i wan alkolik mo oltaem i stap talem long hem se hem i man nating nomo olsem we hem i stap tingting long hem. Tangkyu tumas, we papa blong mi i neva kam wan alkolik, be hem i neva talem long mi mo ol brata mo sista blong mi se hem i praod long mifala o leftemap mifala long ol samting we mifala i mekem gud long hem. Taem mi stap groap, mi stap traem blong mekem hem i glad, be mi filim se mi no save kasem mak ia nomo. Hemia i mekem se rilesensip blong mitufala i no kolosap.

Wan yia, mi bin talem ol samting ia long waes bisop blong mi. Hem i kaonselem mi blong raetem wan leta i go long papa blong mi mo talem ol risen from wanem mi stap talem tangkyu from hem. Hemia bae i no wan isi samting long mi. Ol harem nogud blong mi i bigwan,mo mi no wantem leta blong talem tangkyu ia bae i kam wan long ol harem nogud ia. Mekem se mi prea. Wetem Spirit i stap lidim mi, ol risen we mi talem tangkyu from long papa blong mi i stat blong kam. I tekem taem, be taem mi finisim, mi fulumap tu pej.

Mi sendem leta blong mi i go, mo no save se bae papa blong mi bae i ansa o no. Be mi save se bae mi no save jusum ansa blong hem. Mi nidim nomo blong lukluk long hat blong miwan mo tingbaot from wanem mi bin raetem leta ia.

Nekis moning, mi kasem wan fon kol i kam long step mama blong mi. Hem i stap krae. Hem i talem se papa blong mi i bin ridim leta ia bakegen mo bakegen mo bakegen. Hem i talem se hem i no save toktok long mi from hem i stap krae tumas.

“!Tangkyu!” hem i talem. “Papa blong yu i nidim hemia.”

Samtaem afta long dei ia, papa blong mi i ring mo talem tangkyu. Hem i ringim mi evri dei blong sam dei afta blong talem hamas nao leta ia i minim long hem.

Mi wantem tumas blong talem se rilesensip blong mitufala i hil olsem wan merikel, be i gat fulap wok yet blong mekem. Sam taem afta, hat blong mi i stat blong hil, mo rilesensip blong mitufala i kam moa gud. Afta , mi bin save fogivim hem.

Sam yia pas, afta long wan bigfala faet blong kansa, papa blong mi i ded. Mi save se hem i stap eksperiensem bigfala glad naoia taem Sevya stap helpem hem blong hil long ol yia blong abius. Mi save se mi bin eksperiensem hiling tru long paoa blong Atonmen blong Jisas Kraes. Sevya i andastanem nid blong yumi mo i save helpem yumi karemaot posen ia blong harem nogud mo rabis filing long sol blong yumi. Mi save se fasin blong talem tangkyu, fogivnes, mo lav oli ol strong meresin.